Jolly Mutesi azatanga ikiganiro mu nama ihuza Urubyiruko rwa Afurika iri kubera muri Angola

Yanditswe na Nsengiyumva Emmy
Kuya 18 Nzeri 2019 saa 12:56
Yasuwe :
0 0

Muri iyi minsi Jolly Mutesi ari muri Angola aho yitabiriye inama ihuza urubyiruko rwa Afurika yiga ku muco w’amahoro n’ubutabera, akaba azatanga ikiganiro cye ku wa Kane tariki 19 Nzeri 2019.

Iyi nama iterwa inkunga na UNESCO yatangiye kuri uyu wa Gatatu tariki 18 Nzeri 2019 bikaba byitezwe ko izasozwa tariki 22 Nzeri 2019.

Usibye Jolly Mutesi, iyi nama yitabiriwe na Minisitiri w’Umuco na Siporo w’u Rwanda Nyirasafari Espérance, hakaba hari n’itsinda ry’abanyeshuri bo mu ishuri rya muzika rya Nyundo bazasusurutsa abayitabiriye.

Mu kiganiro na IGIHE, Jolly Mutesi yavuze ko azatanga ikiganiro gifite intero igira iti ”Uruhare rw’urubyiruko mu nzira y’amahoro n’umutekano”.

Ni ku nshuro ya kabiri Jolly Mutesi yitabiriye iyi nama, yaherukaga kujyamo muri 2017 aho yari yabereye muri Gabon.

Iyi nama yitabiriwe n’abantu barenga 400 barimo aba Minisitiri b’umuco mu bihugu bya Afurika.

Moussa Faki Mahamat umuyobozi wa Komisiyo ya Afurika yunze ubumwe ndetse n’Umukuru w’Igihugu cya Angola, João Manuel Gonçalves Lourenço n’abandi banyacyubahiro batandukanye bitabiriye umuhango wo gufungura iyi nama iri kubera mu mujyi wa Luanda muri Hotel ya ‘Central Convention Center Talatona’.

Miss Mutesi Jolly kugeza ubu niwe Muhuzabikorwa w’Ihuriro ry’Urubyiruko ‘Africa Unesco Youth Forum’ mu Rwanda nyuma y’uko ubuyobozi bwa Unesco bwanyuzwe n’umusaruro w’ibiganiro yatangije bya ’Intergeneration Dialogue’, akunze gutegura.

Jolly Mutesi muri Angola yitabiriye inama yakenyeye kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza