Iyo utaragera ku nzozi zawe ukomeza kurota- Gaju Evelyne witabiriye Miss Rwanda bwa kabiri

Yanditswe na Nsengiyumva Emmy
Kuya 25 Gashyantare 2021 saa 03:57
Yasuwe :
0 0

Gaju Evelyne ni umwe mu bakobwa 37 batangajwe mu bahagarariye intara zose n’Umujyi wa Kigali mu irushanwa rya Miss Rwanda 2021 ariko akaba afite umwihariko kuko ari ku nshuro ya kabiri yarisubiyemo.

Mu 2020, Gaju yagerageje amahirwe ye muri Miss Rwanda ariko ntiyabasha guhirwa kuko yagarukiye mu cyiciro cya Pre-Selection.

Uyu mukobwa utaracitse intege no muri uyu mwaka wa 2021 yongeye kwitabira iri rushanwa.

Avuga ku mpamvu yatumye yongera kwitabira irushanwa rya Miss Rwanda, Gaju yagize ati “Impamvu itumye ngaruka mu irushanwa rya Nyampinga w’u Rwanda ku nshuro ya kabiri, ni uko ku nshuro ya mbere ntigeze ngera ku cyo nashakaga kugeraho, kandi iyo utaragera ku cyo warose nturekera kurota.”

Uyu mukobwa ariko kandi yahishuye ko gusubira mu irushanwa rya Miss Rwanda ari ibintu bitashimishije iwabo gusa nk’umukobwa wari uzi icyo ashaka, ntibyamuciye intege.

Gaju avuga ko ikintu yiteze mu irushanwa rya Miss Rwanda ari uko rizamufasha gushyira mu bikorwa umushinga we.

Ati “Irushanwa rya Nyampinga w’u Rwanda rishyigikira umwana w’umukobwa, natwe tuba tujemo ngo bashyikire ibitekerezo byacu, bityo mba numva kwitabira iri rushanwa bizamfasha gushyira mu bikorwa umushinga wanjye.”

Uyu mukobwa yavuze ko aramutse yegukanye ikamba, afite umushinga wo gukangurira urubyiruko by’umwihariko abana b’abakobwa kwihangira imirimo no kuzamura impano zabo, bikazafasha igihugu mu kugabanya ubushomeri.

Nubwo buri wese wegukanye ikamba afite ibyo yakoze byiza mu gihe cye, uyu mukobwa avuga ko uwo yigiraho byinshi, anafata nk’icyitegererezo ari Mutesi Jolly waryegukanye mu 2016.

Gaju Evelyne ufite nimero eshanu nk’umubare bamutoreraho, uburyo bwo kumushyigikira ni ukujya ahandikirwa ubutumwa bugufi ‘sms’ ukandika ijambo Miss ugasiga akanya, ukandika 5 ukohereza kuri 1525.

Usibye ubu buryo, ushobora no kumushyigikira binyuze kuri IGIHE, ufungura aho gutorera ukareba ku rutonde rw’abari guhatana ukamuha ijwi ryawe.

Gaju Evelyne ni umwe mu bitabiriye Miss Rwanda 2020 ntiyabasha kugera mu cyiciro cya nyuma cy'irushanwa/ Ifoto: Miss Rwanda
Gaju Evelyne yongeye kwitabira Miss Rwanda ku nshuro ya kabiri yikurikiranya /Ifoto: Muhizi Serge -IGIHE
Uko washyigikira Gaju Evelyne mu irushanwa rya Miss Rwanda 2021
Akiva mu irushanwa rya Miss Rwanda2020, yahise afata icyemezo cyo kuzasubiramo umwaka ukurikiye/ Ifoto: Miss Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .