00:00:00 IGIHE NETWORK KN KINYARWANDA EN ENGLISH FR FRANCAIS

Ishimwe rya Nganzo umaze kuzamurwa n’indirimbo yakoze mu irushanwa rya Art Rwanda-Ubuhanzi

Yanditswe na Muvunyi Arsène
Kuya 2 September 2019 saa 08:38
Yasuwe :

Tariki 16 Ukuboza 2018 nibwo hasojwe Irushanwa rya Art Rwanda- Ubuhanzi ryabaye ku nshuro ya mbere rigamije gushakisha abanyempano mu nganda ndangamuco zitandukanye.

Shyaka Jean Pierre wiyise "Nganzo" ni we wegukanye igihembo cy’amafaranga y’u Rwanda miliyoni imwe ahigitse abandi bahatanaga mu cyiciro cy’imbyino n’indirimbo.

Icyo gihe uyu musore yaririmbye indirimbo yise “Gusaza Ni Ugusahurwa” aho yanicurangiraga gitari.

Nganzo yabwiye IGIHE ko afite ishimwe rikomeye ry’uko yabashije kwegukana irushanwa rya Art Rwanda-Ubuhanzi ari imbere ya Madamu Jeannette Kagame wanagize uruhare mu itegurwa ryaryo.

Ati “Ikintu cya mbere cyari kinshimishije ni uko nari ngiye kuririmba imbere y’umugore w’Umukuru w’Igihugu nyakubahwa Madamu Jeannette Kagame, kumubona imbere yanjye byari iby’agaciro, kumva ko irushanwa nari ndimo ndahanganamo ari we wariteguye, ryari ishyaka kuri njye kandi numvaga ko ngomba kwerekana impano yanjye nk’uko nyifitemo.”

Indirimbo y’amateka

Nganzo avuga ko amafaranga yahembwe ubwo yegukanaga irushanwa rya Art Rwanda-Ubuhanzi igice kimwe yagikoresheje mu gutunganya indirimbo ye mu buryo bw’amajwi n’amashusho.

Iyi ndirimbo ni nayo ya mbere yashyize hanze kuva iri rushanwa ryarangira. Yabanje kuyikorera amajwi muri The Sound Studio nyuma ashyira hanze amashusho yayo.

Nganzo yabwiye IGIHE ko iyi ndirimbo ifite amateka akomeye mu muziki we guhera aho igitekerezo cyo kuyikora cyaturutse kugera ku byo yamugejejeho.

Ajya kuyikora igiterekerezo yagikuye kuri sekuru wari ugeze mu za bukuru akabacira umugani mugufi “Gusaza ni ugusahurwa” ugaragaza uko intege nke zamubujije gukora ibyo yashakaga.

Ati “Ni inkuru yambayeho ubwo umusaza wari sogokuru yatabarukaga. Yubatse ikigonyi yashakaga gusiga urwibutso noneho aravuga ati ni amaboko yanjye azabikora. Kubera yari asheshe akanguhe birangira atayisakaye ni ko guca uwo mugani ati ‘gusaza ni ugusahurwa.”

Iyi ndirimbo kandi niyo yanditse nk’umushinga ubwo yasozaga amasomo mu Ishuri rya Muzika rya Nyundo mu 2015 inaba indirimbo y’umwaka mu kigo cyose.

Uyu musore wemeza ko kwitabira irushanwa rya Art Rwanda-Ubuhanzi byamugiriye akamaro gakomeye haba mu kwagura umuziki we no kwinjiza amafaranga kuko we na bagenzi be babonye akazi mu bukangurambaga bwa Baho Neza bugamije gukangurira Abanyarwanda kwirinda no kurwanya indwara, kwita ku buzima bw’umwana n’umubyeyi, kwitabira no gukoresha serivisi z’urugo mbonezamikurire y’abana bato, kurwanya inda ziterwa abangavu, kugana no gukoresha serivisi zo kuboneza urubyaro n’ibindi.

Intego ya Nganzo ni ugukomeza gukora umuziki kandi wo mu njyana ya Kinyafurika, akizirika ku Kinyarwanda cyiza kuko ari wo mwimerere we ashimirwa na benshi barimo n’abahanzi bafite uburambe.

Nganzo aririmba mu bukangurambaga bwa Baho Neza nyuma yo gutsinda muri Art Rwanda-Ubuhanzi
Nganzo yahembwe miliyoni 1 Frw nyuma yo gutsinda mu irushanwa rya Art Rwanda-Ubuhanzi
Indirimbo ye ishingiye ku mugani yaciriwe na sekuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .