Se ni umunya-Oman! Ibyo wamenya kuri Okkama, umuhanzi mushya mu muziki nyarwanda

Yanditswe na Nsengiyumva Emmy
Kuya 19 Ukwakira 2020 saa 02:04
Yasuwe :
0 0

Osama Massoud Khaled winjiranye mu muziki izina rya Okkama, ni umusore w’imyaka 19 y’amavuko wasohoye indirimbo ye ya mbere ‘Toto’, yahishuye ko Se ari umunya Oman naho nyina akaba umunyarwandakazi washatse undi mugabo muri Portugal.

Mu minsi ishize Okkama yasohoye indirimbo ye ya mbere yise “Toto”. Abakurikiranira hafi umuziki batunguwe n’impano itangaje uyu musore afite ariko ntibabasha kumumenya kuko atamenyerewe mu ruhando rwa muzika.

Mu kiganiro cyihariye yagiranye na IGIHE, uyu musore yavuze ko nawe ubwe yatunguwe n’uko indirimbo ye ya mbere ‘Toto’ yakiriwe neza cyane.

Uyu muhanzi uri mu mwaka wa nyuma w’amasomo y’umuziki, mu ishuri rya muzika rya Nyundo, yavuze ko iyi ndirimbo yamubereye ikiraro kimwinjiza neza mu ruganda rw’imyidagaduro.

Okkama ni imfura mu muryango w’abana batanu, Se ni umwarabu ukomoka muri Oman nubwo hari imirimo akorera mu Rwanda, naho Nyina akaba umunyarwandakazi.

Nyuma y’uko ababyeyi be batandukanye mu 2015, nyina akajya gushaka undi mugabo muri Portugal, uyu musore yatangiye kuba kwa sekuru i Karongi.

Ibi byatumye akurira i Karongi kugeza agiye mu mashuri yisumbuye yize i Rubavu. Urukundo yakundaga umuziki rwatumye afata icyemezo cyo kujya kuwiga ku Nyundo ubwo yari arangije icyiciro rusange cy’amashuri yisumbuye.

Inkuru yo kujya kwiga umuziki ntabwo yakiriwe neza na se. Ati “Data ntabwo yabyumvise vuba kubera wenda n’imyumvire y’Abarabu ku muziki, ariko yari amahitamo yanjye yarabyubashye kandi ababyeyi banjye baranshyigikiye.”

Okkama avuga ko ari gukora umuziki nta yindi nkunga afite uretse ababyeyi be. Nyuma y’uko indirimbo ‘Toto’ yakiriwe neza, uyu muhanzi byamuteye imbaraga zo gukomeza gukora cyane ndetse mu minsi iri imbere yiteguye gusohora izindi ndirimbo.

Iyi ndirimbo ya mbere ya Okkama mu buryo bw’amajwi yakozwe na Element Pro mu gihe amashusho yayo yo yafashwe anatunganywa na CHID The Director.

Ikiganiro n’uyu musore w’umuhanga mu muziki

Indirimbo "Toto" ya Okkama yakiriwe neza n’abakunzi b’umuziki

Okkama wiga umuziki ku Nyundo yiyemeje kuwugira umwuga ahereye ku ndirimbo ye Toto yakiriwe neza
Amashusho y'indirimbo ye Toto yakiriwe neza n'abakunzi b'umuziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .