Interpol ishami ry’u Rwanda yashyikirije iya Uganda imodoka na moto zafashwe zibwe

Yanditswe na Mathias Hitimana
Kuya 29 Ugushyingo 2018 saa 03:58
Yasuwe :
0 0

Interpol ishami ry’u Rwanda yashyikirije Uganda ibinyabiziga birimo moto n’imodoka byafatiwe ku butaka bwarwo byibwe.

Ku bufatanye bwa Polisi Mpuzamahanga (Interpol), Ishami ryayo ry’u Rwanda ryafatiye ku mupaka wa Gatuna imodoka ya Fuso na moto ya BMW byibwe, byarambitswe purake za Uganda.

Umuvugizi w’Urwego rw’Ubugenzacyaha (RIB), Mbabazi Modeste, yatangarije IGIHE ko imodoka ya Fuso yibwe mu Buyapani yafatiwe ku mupaka wa Gatuna ku wa 27 Kamena 2018 naho moto yafashwe ku wa 5 Mata 2018, yo yibwe mu Bwongereza.

Yasobanuye ko bigeze ku butaka bw’u Rwanda, ikoranabuhanga rya I-24/7 rikoreshwa n’ibihugu bigize Umuryango wa Polisi Mpuzamahanga, Interpol, ryahise rigaragaza amakuru ko byibwe.

Interpol ishami ry’u Rwanda yahisemo gushyikiriza Uganda ibi binyabiziga bifite purake z’iki gihugu nyuma yaho u Buyapani butabashije kuza kuyifata na moto ya BMW yamenyekanishijwe na Interpol ishami ry’u Bwongereza rikorera i Manchester.

Interpol ishami rya Uganda ifite inshingano zo kuzavugana n’ibihugu byibwe mo ibyo binyabiziga ku buryo bibishyikirizwa.

U Rwanda rwakajije umutekano ku mipaka yarwo, hakoreshejwe ikoranabuhanga, bituma harwanywa ibyaha byambukiranya imipaka, ibinyabiziga byibwe mu mahanga bikandagira ku butaka bwarwo bigahita bitahurwa.

Imodoka ya Fuso yibwe mu Buyapani yafashwe yinjiye ku butaka bw'u Rwanda yambaye purake za Uganda
Interpol ishami ry’u Rwanda yashyikirije iya Uganda imodoka yibwe
Moto ya BMW yibwe mu Bwongereza
Interpol ishami ry’u Bwongereza yatinze kuza gufata moto yibwe muri icyo gihugu, bituma ishyikirizwa iya Uganda kuko yambaye pulake zayo

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza