Inkuru ya Akayezu Christine wamaze imyaka isaga 26 atazi irengero ry’abe yakozweho indirimbo

Yanditswe na Uwiduhaye Theos
Kuya 15 Ukwakira 2020 saa 09:53
Yasuwe :
0 0

Inkuru ya Akayezu Christine wari waraburanye n’umuryango we muri Jenoside yakorewe Abatutsi mu 1994, yatambukijwe ku IGIHE mu minsi ishize ikomeje kuvugisha benshi ndetse abahanzi batangiye kuyifashisha bakora mu nganzo.

Akayezu (wasanze amazina ye ya nyayo ari Uwizeye Sarah), inkuru ye yatambutse ku wa 21 Nzeri 2020. Uyu mubyeyi w’imyaka 28 ufite abana babiri, yavugaga agahinda yatewe no kuba nta foto agira y’ababyeyi be cyangwa se abavandimwe yewe n’abandi bo mu muryango.

Yavugaga ko atazi aho avuka ariko akeka ko ashobora kuba ari mu Ruhango cyangwa Nyanza, cyangwa hafi y’utwo turere kuko yabanje kurererwa mu kigo nk’imfubyi nyuma agatwarwa n’undi wamureraga.

Uyu mubyeyi yamwenyuye bidasanzwe ku wa 6 Ukwakira 2020, nyuma yo kubona ibisubizo bya ADN, byatumye ahura n’abavandimwe be babiri n’abandi bo mu muryango we; ku bw’amahirwe make yasanze ababyeyi be bose baritabye Imana.

Umusore uri mu bahanzi bari kuzamuka witwa Maiter Dodian, wakozwe ku mutima n’iyi nkuru yahise akora mu nganzo kubera ndetse mu mashusho y’indirimbo akoreshamo aba bavandimwe bari bamaze igihe baraburanye.

Yabwiye IGIHE ko yahisemo gukora indirimbo ishobora guhumuriza benshi barimo n’abandi bafite ibibazo bimeze nk’icyaba bavandimwe.

Ati “Iyi ndirimbo nayikoze nyuma yo gusoma inkuru ku IGIHE y’umudamu warangishaga umuryango we avuga ko atazi inkomoko ye; byankoze ku mutima, mu gihe nayisomaga gusa biza kunezeza nyuma y’iminsi mike mbonye ko Imana yamusubije nyuma y’imyaka myinshi yari amaze atazi umuryango avuga ko yawubonye.”

“Numvise ari inkuru nziza cyane ku buryo yakinnwamo na filime. Njye nk’umuririmbyi rero mpita nkora mu nganzo. Ni indirimbo nanditse mu gihe gito cyane kuko yari yatwaye ibyiyumviro. Nafashe guitar yanjye ntangira kuririmba numva amagambo yisuka.”

Akomeza avuga ko yanashatse uyu muryango, awusaba kuwukoresha mu mashusho y’indirimbo urabyemera.

Ati “Nyuma y’uko bayikunze nabasabye ko baza mu mashusho yayo barabinyemerera ndetse ubona ko indirimbo yabakoze kumutima.”

Maitre Dodian waririmbye iyi ndirimbo ubusanzwe yitwa Ngarukiyintwali Jean de Dieu. Uyu musore w’imyaka 27 avuka mu Karere ka Rulindo.

Avuga ko yatangiye gukora umuziki kuva mu buto bwe gusa bitewe naho yavukiye ntibihite bimukundira ko awukora ahubwo akajya yandika indirimbo azibika. Ubu afite indirimbo zibarirwa muri 400.

Maitre Dodian yinjiye muri studio 2018 ari nabwo urugendo rwe muri muzika rwatangiye. Amaze kugira indirimbo zirenga icumi, harimo izifite amashusho zirindwi n’izo yafatanyije n’abandi bahanzi batatu.

Amaze gukora indirimbo zirimo ‘Iruhande’, ‘Bya nyabyo’, ‘Nzahagera’ yakoranye na Generous 44, ‘Ikiganza’ yakoranye na Mr Kagame, ‘Reka kurira’, ‘Narabyemerewe’, ‘Ntawamenya’ n’izindi zose ziboneka ku mbuga zicururizwaho umuziki nka Apple Music, Spotify, Amazon, Deezer Music, iTunes n’ahandi.

-  Reba iyi ndirimbo

-  Reba ikiganiro uyu muryango wagiranye na IGIHE nyuma yo kubonana

Maitre Dodian yakozwe ku mutima n'inkuru ya Akayezu ahitamo kumuhimbira indirimbo
Uyu musore avuga ko yakozwe ku mutima mu buryo bukomeye n'inkuru ya Akayezu agahitamo kumuhimbira indirimbo we n'abo mu muryango we
Aba bavandimwe bari bafite akanyamuneza nyuma y'ibizamini bya ADN
Aba bavandimwe bavuga ko bahura bwa mbere amaraso yabo yahise akururana
Bayizere Geraldine mukuru wa Uwizeye Sarah wari warabuze umuryango we
Kwizera Bertin musaza wa Uwizeye Sarah wahoze yitwa Akayezu Christine

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .