Ingabire Marie Immaculée yaganirije abari muri Miss Rwanda2020 ku ihohoterwa rikorerwa abana b’abakobwa

Yanditswe na Nsengiyumva Emmy
Kuya 12 Gashyantare 2020 saa 02:02
Yasuwe :
0 0

Kuri uyu wa Kabiri tariki 11 Gashyantare 2020 umuyobozi wa Transparency Rwanda yasuye abakobwa 20 bari mu mwiherero wa Miss Rwanda 2020 abaganiriza ku burenganzira bw’umwana w’umukobwa n’uruhare rwa Nyampinga mu kurwanya ihohoterwa rikorerwa uwo mwana.

Ingabire atangira kuganiriza aba bakobwa yabanje kubamenyesha ko mbere ya 2019 atakurikiranaga cyane iby’iri rushanwa ati ”Mbere y’umwaka ushize sinakurikiraga Miss Rwanda, ariko hari ikintu nayikundiye ko iha umwanya umwana w’umukobwa akigirira icyizere.”

Yibukije aba bakobwa ko ari abana b’Igihugu atagiye kubaganiriza nka bo ubwabo ati” Njya nkunda kubibwira abantu nubwo hari abo bidashimisha ariko simba ngambiriye kugira uwo nshimisha ahubwo mba nshaka kubabwiza ukuri. Mwebwe ntimuri abana b’ababyeyi banyu, muri abana b’igihugu. Ejo ni uba muganga uzatuvura twese, niyo mpamvu nkunda kuvuga ngo ’Fata umwana wese nk’uwawe’.”

Yakomeje abwira aba bakobwa ko umwana afite uburenganzira bwo kurindwa ihohoterwa iryo ari ryo ryose n’icyo rishingiyeho cyose. Yagaragaje ko mu ngaruka z’ihohoterwa harimo kutigirira icyizere.

Ati "Burya no kudakundwa ni ihohoterwa, niba umuntu yambaye neza bimubwire, niba yasokoje neza bimubwire.”

Yasobanuriye aba bakobwa ubwoko bw’ihohoterwa abana bakunda guhura naryo, aha yatanze ingero zibabaje kandi ziba mu muryango. Ati”Ukubita umwana ukamuvuna ukuboko gute? Uraza umwana ubusa gute? Ubwo se uko ni ukumuhana cyangwa uri kwimara umujinya? Ibyo ntabwo ari ibihano ni iyicarubozo, kandi hari ababyeyi bakibikorera abana babo.”

Ingabire afata ababyeyi batuzuza inshingano zabo zo kwita ku bana nk’abanyabyaha, ati”Niba uzanye ku Isi umwana utazabasha kugaburira ngo arye, uzanye umwana utazishyurira ubwisungane mu kwivuza, ubwo umunyabyaha ukurenze ni uwuhe?”

Yibukije abakobwa ko ibintu byo gukorakora umuntu atabishaka ari ihohoterwa. Ati”Ndagira ngo ibi bintu bijye bibababaza kandi mubyerekane. Buriya nta na rimwe ndajya mu kabari ngo ntahe ntarwanye, kuko niho nkunda kubibona.”

Ingabire yanenze imigani yapfobyaga abagore nka uruvuze umugore […] n’indi myinshi, ashimira Perezida Kagame ko yakuye habi abagore.

Ati” Perezida Kagame yadukuye habi, abagore bakwiye kuzashaka inka bakamugabira. Uzi ko kera nta mugore wemererwaga gufunguza konti muri banki. Hari itegeko ryarimo ko umuntu ugiye guhagararira igihugu agomba kuba afite umugore nyamara ibyo bigatuma na wa wundi ushaka gushyiraho ambasaderi atatekereza umugore.”

Yibukije abakobwa bari muri Miss Rwanda ko bagomba kugira uruhare mu kurwanya iri hohoterwa, ati” Wibaza ko mudafitiye imyenda uwabazanye ahangaha? Mufitiye umwenda ababareze, igihugu n’ababafashije bose...Ni ukuvuga ko muri ab’agaciro gakomeye.”

Ingabire yemereye ubufatanye abahataniye ikamba rya Miss Rwanda 2020 mu mishinga yabo.

Uyu mubyeyi uvuga ko atigeze akurikira Miss Rwanda mbere y’umwaka ushize ahamya ko iri rushanwa ryabayemo impinduka nziza zirimo kuba baraciye kuba umukobwa yarashoboraga kwiyamamaza mu ntara zose z’u Rwanda.

Ikindi yishimiye muri Miss Rwanda uyu mwaka ni imishinga ifatika abakobwa bafite yumvikanamo kuba yagirira abanyarwanda bose akamaro ndetse no kuba uyu mwaka ari irushanwa ritaranzwe n’impaka zirirwanya cyane ku mbuga nkoranyambaga.

Yanabibukije kandi ko bafite uruhare rukomeye mu kurwanya ihohoterwa rikorerwa abana b'abakobwa
Ingabire Marie Immaculée aganira n'abakobwa bari guhatanira ikamba rya Miss Rwanda 2020
Abakobwa nabo bahawe umwanya bamubaza ibibazo binyuranye
Bafatanye ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza