Iyo myanda yakusanyijwe n’umunyabugeni w’i New York witwa Justin Gignac, wayitoraguye mu mihanda yo hafi ya Madison Square Garden, ahabereye ubwo bukwe bwitabiriwe n’ibyamamare amagana.

Mu byagurishijwe harimo ibishirira by’itabi, imifuniko y’amacupa y’amazi, udukoresho two kunywesha, ibikoresho byo kuriraho, uduce tw’imigozi yifashishijwe na Polisi mu gukumira abantu n’ibindi bikoresho byatawe hafi aho.

Buri kintu cyashyizwe mu gakoresho gato ka pulasitiki, gifungwa neza nk’igihangano, hanyuma gishyirwaho umukono w’uwo munyabugeni.

Gignac yavuze ko icyo gitekerezo cyashimishije cyane abafana ba Taylor Swift, bazwi nka *Swifties, kuko bamwe bashakaga kugira agace gato kabibutsa ubukwe bw’icyamamare bakunda, nubwo kaba kari mu buryo butaziguye.

Buri kintu cyagurishwaga amadolari 25. Mu gihe kitarenze amasaha 24 nyuma yo gutangira kubigurisha, ibintu byose 50 byari byashyizwe ku isoko byari byamaze kugurwa. Uyu munyabugeni yatangaje ko yinjije amadolari 1250, ndetse ko ashobora kongera gushyira ibindi nkabyo ku isoko.

Gignac yavuze ko intego ye ari ugufata ibihe bikomeye biba mu buzima bw’umuco wa New York akabihindura urwibutso kugira ngo abantu bazajye babibona nk’akantu kabitse amateka y’icyo gihe.

Ubukwe bwa Taylor Swift bwakurikiwe cyane n’abafana benshi, bamwe muri bo bakaba bari bagiye i New York bagerageza kwegera aho bwabereye, ariko ntibabasha kuhagera kuko agace kose kari kafunzwe.

Taylor Swift na Travis Kelce basezeraniye muri Madison Square Garden, inzu y’imikino n’imyidagaduro yakira abantu barenga ibihumbi 19

Ubwo bari bamaze gusezerana, hanze ku byapa by'inyubako ubukwe bwabereyemo, hashyizwe iki kimenyetso