Abanyempano bo muri ArtRwanda- Ubuhanzi baserutse neza muri Iwacu Muzika Festival yatangijwe na Bruce Melodie

Yanditswe na Nsengiyumva Emmy
Kuya 20 Kamena 2020 saa 11:46
Yasuwe :
0 0

Iwacu Muzika Festival yatangiye ku nshuro yayo ya kabiri. Ibitaramo by’uruhererekane bizakorwa muri iri serukiramuco byaganuwe na Bruce Melodie wabaye umuhanzi wabimburiye abandi.

Ibitaramo bya Iwacu Muzika 2020 biri gutambuka kuri Televiziyo Rwanda no ku mbuga nkoranyambaga zitandukanye bitewe nuko Isi muri rusange iri mu bihe byo kwirinda icyorezo cya Coronavirus.

Ku mugoroba wo kuri uyu wa Gatandatu, tariki ya 20 Kamena 2020, nibwo igitaramo cya mbere cyabaye. Kuri gahunda biteganyijwe ko umuhanzi umwe ariwe uzajya ataramira abakunzi b’umuziki Nyarwanda.

Igitaramo cya mbere cyatumiwemo Bruce Melodie, uri mu bahanzi bubashywe mu Rwanda. Yabanjirijwe ku rubyiniro n’abanyempano banyuze mu irushanwa rya ArtRwanda- Ubuhanzi rigamije guhishura abanyempano no kubafasha kuzibyaza inyungu.

ArtRwanda - Ubuhanzi yibanze ku gushaka impano zo mu byiciro birimo Ubugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo.

Mu banyuze muri iri rushanwa bahawe umwanya mu itangizwa rya Iwacu Muzika Festival 2020, harimo Izere Antoine ufite impano yo gushushanya na Bisangwabagabo Sankara Salomon [Tsukara] wize Ubugeni ku Nyundo ufite ubuhanga mu kuririmba no gucuranga gitari.

Aba bose bahawe umwanya ngo bagaragaze impano zabo, icyakora mbere babanzaga kuganira n’umunyamakuru wa RBA, Lucky Nzeyimana, wari uyoboye iki gitaramo. Ni ikiganiro cyibandaga ku nyungu bakuye muri ArtRwanda- Ubuhanzi n’intambwe bamaze gutera.

Aba bose bashimye uburyo bungukiye byinshi muri ArtRwanda- Ubuhanzi ndetse bagaragaza ko kugeza ubu bari gukora cyane ngo inzozi zabo zibe impamo.

Nyuma yo kubakira Tsukara yahawe umwanya wo gutarama mu ndirimbo ze ebyiri; Ingimbi n’Amadeni zose yaririmbye mu buryo bwa Live. Uyu musore yaririmbye afashwa n’itsinda ry’abacuranzi banyuze muri ArtRwanda- Ubuhanzi bahuriye muri Umurage Band, iyoborwa na Ngabo Evode [Evy].

Tsukara wize ibijyanye n’Ubugeni ku Ishuri ryo ku Nyundo yaririmbaga afashwa n’abakobwa babiri; mu gihe mugenzi we Izere Antoine ufite impano mu bugeni na we yashushanyaga igihangano cye.

Nyuma y’aba bahanzi bakiri bato, Bruce Melodie ni we wakurikiyeho acurangirwa na Symphony Band. Uyu waserutse yambaye imyambaro yambitswe na Sacha Kate yabanje kuganira gato na Lucky Nzeyimana wayoboye iki gitaramo.

Nyuma y’iminota mike y’ikiganiro, Bruce Melodie yahise atangira gutarama ahereye ku ndirimbo "Twongere" yakoranye na Queen Cha, yakurikijeho indirimbo nyinshi zivangavanze kuko nta n’imwe yaririmbaga ngo irangire.

Nyuma yo kuvangavanga indirimbo mu minota nka 15, Bruce Melodie yabwiye abakunzi be ko igitaramo aribwo agitangiye ahita yinjira mu ndirimbo "Katerine" yo yaririmbye akayirangiza, yakomereje ku zindi nyinshi ze zakunzwe cyane.

Ahagana saa Yine z’umugoroba nibwo igitaramo cyahumuje, Bruce Melodie asezera ku bakunzi be. Byitezwe ko mu minsi iri imbere hazatangazwa undi muhanzi uzatarama mu mpera z’icyumweru gitaha.

EAP itegura Iwacu Muzika Festival yagerageje gukora urubyiniro rwiza ku buryo umuntu wakurikiye iki gitaramo atabasha gutahura ko nta bafana bahari uretse kuba atababona kuko yaba ibyuma cyangwa urubyiniro byari biteguye neza.

Ibitaramo bya Iwacu Muzika Festival byatewe inkunga na Banki ya Kigali, Inteko Nyarwanda y’Ururimi n’Umuco (RALC), Minisiteri y’Urubyiruko n’Umuco, Tembera u Rwanda, ArtRwanda- Ubuhanzi.

Iwacu Muzika Festival ni ubwa kabiri iri kuba, cyane ko mu mwaka wa 2019 yazengurutse mu ntara zose z’igihugu abahanzi batandukanye bashimisha abakunzi babo.

Iserukiramuco rya Iwacu Muzika Festival ryatangirijwe i Musanze ku wa 22 Kamena 2019 kuri Stade Ubworoherane risorezwa i Kigali ku wa 17 Kanama 2019 mu gitaramo cy’imbaturamugabo cyatumiwemo umuhanzi ufite izina ryamamaye mu muziki wa Afurika y’Iburasirazuba, Naseeb Abdul Juma [Diamond Platnumz] wataramiye ibihumbi by’abari muri Parking ya Stade Amahoro i Remera.

Reba igitaramo cya mbere cya Iwacu Muzika Festival

Izere Antoine ufite ubuhanga mu gushushanya yahawe umwanya wo kugaragaza impano ye
Bisangwabagabo Tsukara ari mu bahanzi bigaragaje muri ArtRwanda- Ubuhanzi. Yahawe umwanya yerekana impano ye
Umuhanzi Bruce Melodie ni we wabimburiye abandi mu bazaririmba muri Iwacu Muzika Festival iri kuba ku nshuro ya kabiri. Iki gitaramo kizajya kinyura kuri Televiziyo y'u Rwanda kugeza muri Nzeri 2020
Bruce Melodie ni we muhanzi wabimburiye abandi muri Iwacu Muzika Festival. Urubyiniro yaririmbiyeho rwari ruteguye neza ndetse n'ibyuma bivuga neza
Izere Antoine afite ubuhanga mu gushushanya
Bisangwabagabo Sankara Salomon [Tsukara] wize Ubugeni ku Nyundo ufite ubuhanga mu kuririmba no gucuranga gitari yabaye umuhanzi wa mbere waririmbye mu gutangiza Iwacu Muzika Festival ku wa 20 Kamena 2020
Umunyamakuru wa Televiziyo y'Igihugu, Lucky Nzeyimana (ibumoso) wayoboye itangizwa rya Iwacu Muzika Festival aganira na Izere Antoine ufite ubuhanga bwihariye mu gushushanya
Lucky Nzeyimana (ibumoso) yaganiriye na Bisangwabagabo Sankara Salomon [Tsukara] wamusangije ku rugendo rwe mu muziki n'inyungu yakuye mu irushanwa rya ArtRwanda- Ubuhanzi
Linda Umurerwa ukoresha amazina ya Linda Montez mu muziki ari mu bafashije Tsukara mu gihe yaririmbaga. Uyu mukobwa ari mu banyempano bitabiriye The Voice Afrique Francophone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .