00:00:00 IGIHE NETWORK KN KINYARWANDA EN ENGLISH FR FRANCAIS

Ikimenyetso cyo kwitinyuka! Uwa gatatu ufite ubumuga yitabiriye Miss Rwanda 2022

Yanditswe na Akayezu Jean de Dieu
Kuya 12 February 2022 saa 03:11
Yasuwe :

Irushanwa rya Miss Rwanda rikomeje kugaragaramo impinduka zidasanzwe ziganisha ku kuba iridaheza kandi riha umwanya umwana w’umukobwa wese wifitiye icyizere.

Kuri ubu hamaze kugaragaramo abakobwa batatu bafite ubumuga barimo babiri bafite ubwo kutumva no kutavuga ndetse n’uwe ufite ubumuga bw’ingingo.

Umukobwa usa n’uwatinyuye bagenzi be ni Uwimana Jeannette witabiriye ijonjora ryo mu Ntara y’Amajyepfo ndetse abasha gukomeza mu bagomba guhagararira iyi ntara.

Kuri uyu wa Gatandatu tariki 12 Gashyantare 2022, mu ijonjora ryo gushaka abazahagararira Umujyi wa Kigali muri Miss Rwanda, nabwo umukobwa witwa Umutoniwase Fredda yitabiriye iki gikorwa afite ubumuga bwo kutumva no kutavuga.

Uyu mukobwa wari wambaye numero 47, yageze imbere y’abagize Akanama Nkemurampaka yitwaje umusemuzi wamufashaga kumvikana nabo.

Umutoniwase yakoreshaga amarenga, noneho umusemuzi we akabwira abagize Akanama Nkemurampaka ibyo ashatse kuvuga.

Umurerwa Evelyine uri mu bagize Akanama Nkemurampaka yamubajije uko abona abafite ubumuga bafashwe hano mu Rwanda.

Uyu mukobwa yavuze ko kuri ubu abafite ubumuga bwo kutumva no kutabona bakomeje kugenda bahabwa urubuga mu iterambere ry’igihugu kuko batagihezwa.

Yatanze urugero rwa Miss Rwanda.

Ati “Impamvu ni uko leta cyangwa imiryango iharanira inyungu z’abafite ubumuga byakoze ubuvugizi, abafite ubumuga bakabasha kwitinyuka.”

Yavuze ko umushinga we ari uwo guhuza uburezi na serivisi zitangwa zikajya zifasha kugira ngo abafite ubumuga nabo babashe kuzisangamo.

Umutoniwase yavuze ko naramuka yambitswe ikamba rya Miss Rwanda azafatanya n’abayobora iri rushanwa ndetse na Leta mu kugira ngo abashe gukora ubukangurambaga.

Uyu mukobwa yahawe YES eshatu.

Ubuyobozi bwa Rwanda Inspiration BackUp itegura irushanwa rya Miss Rwanda, buherutse kuvuga ko mu gutegura iri rushanwa nta mukobwa uhezwa icya ngombwa ni uko aba yujuje ibisabwa.

Mu kiganiro aherutse kugirana na IGIHE, Umuvugizi wa Rwanda Inspiration BackUp, Miss Nimwiza Meghan, yagize ati “Ni irushanwa ryo gufasha abana b’abakobwa kwitinyuka, rero abafite ubumuga ntabwo baba bahejwe.”

Yakomeje agira ati “Icyo tubasaba ni ukuba yujuje ibisabwa aribyo ubwiza, ubwenge ndetse n’umuco.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .