Igor Mabano yaserutse neza mu gitaramo cya kabiri cya Iwacu Muzika Festival, ni inde utahiwe?

Yanditswe na Nsengiyumva Emmy
Kuya 28 Kamena 2020 saa 06:53
Yasuwe :
0 0

Iwacu Muzika Festival iri kuba ku nshuro yayo ya kabiri. Ibitaramo by’uruhererekane bizakorwa muri iri serukiramuco mu cyumweru gishize byafunguwe na Bruce Melodie wabaye umuhanzi wabimburiye abandi, kuri uyu wa Gatandatu tariki 27 Kamena 2020 hari hatahiwe Igor Mabano wari uwa kabiri utaramye.

Ibitaramo bya Iwacu Muzika 2020 biri gutambuka kuri Televiziyo Rwanda no ku mbuga nkoranyambaga zitandukanye bitewe n’uko Isi muri rusange iri mu bihe byo kwirinda icyorezo cya Coronavirus.

Ku mugoroba wo kuri uyu wa Gatandatu, tariki ya 27 Kamena 2020, nibwo igitaramo cya kabiri cyabaye. Kuri gahunda biteganyijwe ko umuhanzi umwe ariwe uzajya ataramira abakunzi b’umuziki Nyarwanda.

Igitaramo cya mbere cyatumiwemo Bruce Melodie, uwa kabiri yari Igor Mabano. Yabanjirijwe ku rubyiniro n’abanyempano banyuze mu irushanwa rya ArtRwanda-Ubuhanzi rigamije guhishura impano z’urubyiruko.

ArtRwanda - Ubuhanzi yibanze ku gushaka impano zo mu byiciro birimo Ubugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo.

Mu banyuze muri iri rushanwa bahawe umwanya mu gitaramo cya kabiri cya Iwacu Muzika Festival 2020, harimo Octave Muhakwa umuhanzi w’imideri na Faustin Havugimana umusizi akaba n’umwanditsi w’ibitabo.

Aba bose bahawe umwanya ngo bagaragaze impano zabo, mbere babanzaga kuganira n’umunyamakuru wa RBA, Lucky Nzeyimana, wari uyoboye iki gitaramo. Ni ikiganiro cyibandaga ku nyungu bakuye muri ArtRwanda- Ubuhanzi n’intambwe bamaze gutera.

Aba bose bashimye uburyo bungukiye byinshi muri ArtRwanda- Ubuhanzi ndetse bagaragaza ko kugeza ubu bari gukora cyane ngo inzozi zabo zibe impamo.

Nyuma y’aba bahanzi bakiri bato, Igor Mabano ni we wakurikiyeho acurangirwa na Symphony Band.

Nyuma y’iminota mike y’ikiganiro, Igor Mabano yaririmbye indirimbo ze zinyuranye ziganjemo izakunzwe nka Back, Iyo utegereza, Dear Mashuka, Too late n’izindi zinyuranye ziri kuri album ye nshya aherutse kumurika mu minsi mike ishize.

Ahagana saa yine z’umugoroba nibwo igitaramo cyahumuje, Igor Mabano asezera ku bakunzi be. Hahita hatangazwa ko Intore Masamba n’Itorero ry’Igihugu Urukerereza nk’abazatarama tariki 4 Nyakanga 2020 ibirori byahuriranye n’Umunsi mukuru wo Kwibohora ku nshuro ya 26.

Ibitaramo bya Iwacu Muzika Festival byatewe inkunga na Banki ya Kigali, Inteko Nyarwanda y’Ururimi n’Umuco (RALC), Minisiteri y’Urubyiruko n’Umuco, Tembera u Rwanda na ArtRwanda- Ubuhanzi.

Iwacu Muzika Festival ni ubwa kabiri iri kuba, cyane ko mu mwaka wa 2019 yazengurutse mu ntara zose z’igihugu abahanzi batandukanye bashimisha abakunzi babo.

Reba hano uko igitaramo cyagenze

Umuyobozi Mukuru ushinzwe Imenyekanishabikorwa muri BK Plc, Nshuti Thierry aganira na Lucky Nzeyimana wari uyoboye iki gitaramo
Igor Mabano aganira na Lucky Nzeyimana wari uyoboye iki gitaramo
Igor Mabano yakoze iyo bwabaga ngo ashimishe abari bamukurikiye
Igor Mabano yaririmbye nyinshi mu ndirimbo ziri kuri Album aherutse gushyira hanze
Urubyiniro rwari ruteguye neza cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .