Mu kiganiro na IGIHE, Ruti Joël yavuze ko iyi album bayise ‘Rutakisha’ bashaka gusobanuro ko igomba gutakisha amahanga yumvaga ko abakora umuziki gakondo batabasha kuririmba mu ndimi zabo.

Ati “Bajyaga bavuga ko tutaririmba indimi z’amahanga, iyi album hafi yose twayikoze mu Gifaransa no mu Cyongereza nibaza ko nabo bari buze kuzumva bakamenya ko no muri gakondo yacu twaririmba indimi zabo.”

Ikindi Ruti Joël yishimira ni uko iyi album yakozwe na Clement Guitalist usanzwe anamufasha gucuranga gitari mu bitaramo binyuranye.

Ati “Icyo kwishimira kurushaho ni uko iyi album nayikoranye na Clement, murabizi ko ariwe uncurangira mu bitaramo, kuri iyi nshuro rero niwe watunganyije n’indirimbo ziyigize. Utanumva niratisha indimi naririmbyemo kuko ahenshi ni nawe wambwiraga uko naziririmba.”

Iyi album igizwe n’indirimbo zirimo; Rutakisha, Mama we, African girl,Dore,Baby, Ingabire,Mannequin, Lisa,Umumararungu na Gospel.

Iyi izaba ibaye album ya mbere kuri Clement Guitalist ikaba iya kabiri kuri Ruti Joël uherutse gusohora ‘Musomandera’ yamurikiye mu gitaramo ‘Rumata wa Musomandera’ yakoreye ku Intare Conference Arena mu Ukuboza 2023.