00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya kuri Drama T, umuhanzi ugwije igikundiro i Burundi

Yanditswe na Nsengiyumva Emmy
Kuya 8 Ukuboza 2022 saa 11:36
Yasuwe :

Biragoye ko waganira n’abakurikirana umuziki w’i Burundi ubabaza abahanzi barangije umwaka wa 2022 bahagaze neza ngo uburemo izina Drama T, wakunzwe mu ndirimbo ‘Madamu’.

Ibi ni nako byagendekeye umunyamakuru wa IGIHE ubwo yari i Bujumbura akaza kumenya ko muri uyu mujyi hari umusore mushya umaze kwigarurira imitima y’abakunzi b’umuziki i Burundi.

Drama T ni izina rishya mu matwi ya benshi ariko akaba umuhanzi umaze kwigwizaho abakunzi i Burundi abifashijwemo n’indirimbo yise ‘Madamu’.

Iyo muganira, uyu musore ahamya ko nta rindi banga ridasanzwe ryamufashije kuba uwo amaze kuba we mu muziki w’i Burundi uretse gukora cyane.

Icyakora ariko ku rundi ruhande ngo ‘Madamu’ ni indirimbo yamutunguye cyane kuko igihe yayisohoreye yari afite imibare yo gukora amashusho y’indi yari yizeye.

Ati “Nanjye byarantunguye, mu buzima hari igihe ikintu kikubaho nawe ubwawe ugatungurwa gusa narabyishimiye cyane.”

Uretse iyi ndirimbo yamutunguye, Drama T no kwinjira mu muziki kwe bisa n’ibyamutunguye.

Drama T ni umwe mu basore bakiri bato umurebye mu maso, akaba yarakuriye i Muyinga ari naho yize amashuri ye yisumbuye.

Mu 2018 nibwo Drama T yinjiye mu Mujyi wa Bujumbura aho yari agiye gukurikira amasomo ya kaminuza, iki gihe akaba aribwo yatangiye gukora n’umuziki.

Uyu musore wakuze arerwa na nyina gusa kuko se yitabye Imana mu 2012, avuga ko byamwigishije byinshi.

Ati “Ni ibintu abantu baba batifuza ariko nanjye ntabyo nifuzaga ariko bimaze kuba byanyigishije byinshi. Icyo gihe ni njye wari umwana mukuru, bituma mba umugabo mu bandi. Hari ingeso ntashoboraga gukora kuko nagombaga gufasha umuryango bitewe n’uko nawe nabonaga imbaraga yakoreshaga ngo tubeho neza!”

Ni umwe mu basore bakora umuziki nyamara baranaminuje, kuko afite impamyabushobozi y’icyiciro cya kabiri cya kaminuza mu bijyanye na ‘Entrepreneurship’.

Uyu musore uherutse gutemberera mu Rwanda avuga ko yahigiye uburyo abahanzi bo mu Rwanda bacuruza umuziki wabo, ndetse agira n’amahirwe yo gukorana indirimbo n’abahanzi barimo Juno Kizigenza nubwo abandi bakoranye atigeze abakomozaho.

Asoza ikiganiro twagiranye Drama T, yahishuye ko yakuze akunda umuziki wo mu Rwanda by’umwihariko akaba umufana wa Butera Knowless.

Ati “Naranababaye kuba ubushize naravuye mu Rwanda ntabashije kumubona. Nashakaga guhura nawe ariko ntabwo nabibashije, nakuze mwumva kuva kera! Kuva icyo gihe niwe muririmbyi wanjye rwose!”

Ku rundi ruhande uyu muhanzi yahishuye ko iwabo yakuze akunda Big Fizzo uyu bakaba baranabanye muri Bantu Bwoy.

Uretse ‘Madamu’ igezweho cyane, Drama T afite izindi ndirimbo nka ‘your man’, ‘Carolight’ n’izindi nyinshi.

Drama T ni umwe mu bahanzi bagezweho i Bujumbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .