Ibyo wamenya kuri Don Moen utegerejwe i Kigali

Yanditswe na Ishimwe Israel
Kuya 8 Gashyantare 2019 saa 02:30
Yasuwe :
0 0

Amasaha arabarirwa ku ntoki ngo umuramyi ukomeye ku Isi, Don Moen, akandagize ikirenge cye i Kigali aho ategerejwe mu gitaramo gikomeye ‘MTN Kigali Praise Fest Edition I’.

Iki gitaramo giteganyijwe kubera muri Kigali Conference and Exhibition Village [Camp Kigali] ku wa 10 Gashyantare 2019.

Don Moen azagihuriramo n’abahanzi bo mu Rwanda barimo Israel Mbonyi, Dinah Uwera, Columbus n’itsinda ry’abaramyi bo mu Rwanda bibumbiye mu Ihuriro rya Gikirisitu AFLEWO (Africa Let’s Worship). Abazacyitabira bazanafashwa kwegerana n’Imana binyuze mu muziki w’aba-dj bazwi mu ruhando rw’iziramya uwiteka nka DJ Spin na DJ Shawn.

Uyu muhanzi ni ubwa mbere azaba ageze mu rw’Imisozi 1000. Yanditse indirimbo zigaruriye imitima ya benshi ku Isi ndetse zikoreshwa mu nsengero zitabarika mu gihe cyo kuramya.

Amateka avunaguye ya Don Moen

Donald James Moen [Don Moen] yavukiye mu Mujyi wa Minneapolis muri Leta ya Minnesota ho muri Amerika ku wa 29 Kamena 1950. Ni umuririmbyi, umwanditsi w’indirimbo, umupasiteri ndetse anatunganya umuziki wo kuramya Imana.

Uyu muhanzi yasoje amashuri yisumbuye mu 1968, akomereza muri Kaminuza ya Oklahoma aho yakuye Impamyabushobozi mu bijyanye n’umuziki mu 1972.
Don Moen w’imyaka 68 yashakanye na Laura Moen mu 1973, babyaranye abana batanu barimo Melissa Moen, James Moen, John Moen, Rachel Moen na Michael Moen.

Don Moen ari mu baramyi bakomeye ku Isi

Mbere yo guhabwa akazi muri Label ya Gikirisitu ya Integrity Music, Don Moen yize muri Kaminuza ya Oral Roberts aza guhabwa inshingano zo kugenzura ibyuma bya muzika mu Muryango ubarizwa muri Oklahoma wa ‘Terry Law Ministries’ aho yamaze imyaka 10.

Uyu mugabo yakoranye na Integrity Media mu myaka irenga 20, ayobora Integrity Music na Integrity Label Group yatunganyaga umuziki.

Yavuye muri Integrity Media mu Ukuboza 2007, atangiza ikigo cye cyagutse gihuriyemo serivisi z’itangazamakuru n’iz’urusengero mu 2009 yise ‘Don Moen’. Muri uyu mwaka yatangiye ikiganiro cyo kuri radio cya Don Moen & Friends.

Don Moen yahawe ibihembo byinshi akesha umuziki we w’umwimerere. Yegukanye icya Dove Award, gihabwa abakomeye mu ndirimbo zihimbaza Imana muri Amerika, inshuro esheshatu kuva mu 1992 hahembwa indirimbo ye ‘God Will Make A Way’ kugera mu 2004.

Mu 2002, bagenzi be bamuhaye ishimwe ry’umuhate we mu ivugabutumwa bamuha ‘Ray DeVries Church Ministry Award’.

Don Moen azwi ku bihebeye umuziki uhimbaza Imana mu ndirimbo zirimo ‘Our Father’, ‘God Is Good All The Time’, ‘God With Us’, ‘God Is Good I Will Sing’, ‘Sing For Joy’, ‘Hallelujah To The Lamb’, ‘God Will Make A Way’ n’izindi.

Yakoranye n’abahanzi batandukanye barimo Claire Cloninger, Paul Overstreet, Martin J Nystrom, Randy Rothwell, Ron Kenoly, Bob Fitts, Paul Baloche, Tom Brooks n’abandi.

Yanandikiye indirimbo abaririmbyi nka Justo Almario, Carl Albrecht, Abraham Laboriel, Alex Acuna, Paul Jackson, Lenny Le Blanc na Chris Graham.

Yagize uruhare mu ivuka n’iyaguka ry’impano z’abahanzi barimo Paul Baloche, Darlene Zschech, Israel Houghton na Hillsong United.

Don Moen yakoze album z’indirimbo 11, zirimo iyo yise ‘Worship with Don Moen’ yamuritse mu 1992.

Album ye ya mbere yitwa Hosanna, yaracuruje cyane, ahaguzwe CD zirenga miliyoni eshanu. Yanakoze izindi album zirimo Tu resencia na Trono De Gracia ziri mu rurimi rw’Icyespagnol.

Mu 2003, yashyize ahabona album ‘God Will Make a Way’ igizwe n’indirimbo 19. Iyi ndirimbo yayitiriwe yayanditse nyuma y’impanuka yaguyemo umwana w’imfura wa muramu we n’umugabo we, ikanakomerekeramo abandi batatu.

Mu rugendo rw’ibitaramo yakoreye muri Aziya mu 1999, Moen yafashe amashusho ya album ‘The Mercy Seat’ muri stade iri i Singapore no muri Pariki imwe muri Koreya y’Epfo. Yayisohoye mu 2000. Album ye yise ‘I Will Sing’ yafatiwe kuri Christian Broadcasting Network.
Uyu mugabo amaze imyaka 30 mu muziki, aho yasohoye indirimbo zirenga 100. Azi gukoresha ibicurangisho bitandukanye birimo piano n’ibindi by’amajwi anyura amatwi.

Yitabiriye ibitaramo bikomeye ku migabane y’Isi mu bihugu nka Ghana, Afurika y’Epfo, Singapore, Philippines, Korea y’Epfo, Brésil, Canada, Australia, u Bwongereza, u Bushinwa, Malaysia, Indonésie, u Buyapani, Guatemala, Honduras n’ahandi.

Don Moen afite inzu itunganya umuziki ya Don Moen Production ikorera i Nashville muri Leta ya Tennessee, aho atuye we n’umuryango we.

Uyu muramyi azagera mu Rwanda ku wa 9 Gashyantare avuye muri Uganda aho ategerejwe mu gitaramo cy’imbaturamugabo cya Kampala Praise Fest 2019, kibera Kololo Airstrip ku wa 8 Gashyantare 2019.

Amatike yo kwinjira mu gitaramo MTN Kigali Praise Fest Edition I, agurishirizwa ku mashami ya MTN arimo irya Giporoso, CHIC na Remera Corner, Camellia (CHIK), Camellia (UTC), Camellia (Makuza), Caritas Book Shop, BemBonita Saloon, Kigali Serena Hotel, Blessed Shop Merez II Gikondo.

Kugura itike wifashishije Mobile Money ukoresha *182*1*8*000555 ukagabanyirizwa 5%. Ukoresheje ubu buryo ayihabwa ku 11,400 Frw mu myanya isanzwe, 23,750 mu y’icyubahiro na 237,500 ku meza y’abantu umunani.

Don Moen ategerejwe mu Rwanda mu gitaramo gikomeye azahakorera ku Cyumweru, tariki ya 10 Gashyantare 2019
Don Moen azava mu Rwanda akomereza i Abidjan aho yatumiwe muri ‘Love Côte d’Ivoire Festival’ ku wa 17 Gashyantare 2019
Don Moen azaza i Kigali ari kumwe n'itsinda rimufasha gucuranga no kuririmba
Don Moen azahurira muri iki gitaramo n'umuhanzi ukunzwe Israel Mbonyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza