Ibitaravuzwe ku mibanire ya Miss Iradukunda na nyina wamushinje kumwirengagiza

Yanditswe na Muvunyi Arsène
Kuya 7 Mutarama 2019 saa 12:30
Yasuwe :
0 0

Mu bitekerezo bya benshi, Iradukunda Liliane ni umuntu wateye imbere akiyibagiza abo yari azi by’akarusho agakora amahano yo kwirengagiza umubyeyi wamugiriye ku bise nyuma y’amezi icyenda agenda yigengesereye.

Uyu mukobwa wabaye iciro ry’imigani ku mbuga nkoranyambaga, yagarutsweho cyane nyuma y’inkuru y’umubyeyi we wamushinje kumwirengagiza ku buryo urukumbuzi rw’uwo yibyariye rwamushenguye umutima.

Uyu mubyeyi witwa Uwimana Chantal yumvikanye avuga ko umwana we yamwirengagije ndetse bamaze amezi arindwi batarabonana. Icyiyongera kuri ibyo ni uko ngo yagize imvune ariko umwana akabura n’umutima wo kujya kumusura.

Mu gahinda kenshi, yavugaga ko icyo yifuza ku mwana we, atari amafaranga ahembwa, kugenda mu modoka ye, cyangwa ikindi ahubwo ko ashaka ko baganira bagahuza urugwiro nk’umubyeyi n’umwana.

Ni ibintu byatunguye abantu benshi bibajije ikintu cyatuma umubyeyi ashyira ku karubanda umwana we kabone n’ubwo baba bafitanye ikibazo.

Hari abemeye ibyavuzwe n’umubyeyi wa Iradukunda Liliane ndetse baramunenga, bamwuzuzaho ibitutsi, ahinduka impyisi yiyambitse uruhu rw’intama isura ya Nyampinga w’u Rwanda yuzura ikizinga.

Hari abandi birinze kugira icyo bavuga kuko bahamyaga ko imvugo y’uyu mubyeyi yerekanaga ko ibyo atavuze ari byo bifite ubukana kandi bihishe byinshi.

IGIHE yashatse kumenya byinshi ku mubano wa Iradukunda Liliane n’umubyeyi we. Uyu nyampinga ntiyifuza kugira ikintu na kimwe ashyira mu itangazamakuru ku bijyanye n’umuryango we ahubwo avuga ko iby’umuryango biguma mu muryango aho kujya mu itangazamakuru.

Gusa twamenye ko Iradukunda atigeze arerwa n’umubyeyi wamwibarutse. Mu gucukumbura twasanze yarakuriye kwa Nyirasenge nyuma y’aho ababyeyi be batandukaniye akiri muto. Aha kwa Nyirasenge yahabanaga na musaza we.

Uyu Nyirasenge witwa Niyoyankunze Odette atuye ku Kimironko mu Kagari ka Bibare. Abana na musaza wa Iradukunda Liliane kugeza ubu.

Ubwo twamusuraga twasanze uyu musaza wa Iradukunda uri mu kigero cy’imyaka 16 ahari.

Nyirasenge wa Iradukunda Liliane yavuze ko uyu mukobwa atigeze abana na nyina igihe kinini kuko batandukanye afite imyaka itanu. Icyo gihe we na musaza we wari ufite imyaka ibiri bahise batangira kurerwa na nyirasenge.

Ubusanzwe umubyeyi wa Iradukunda yashakanye na Se yari asanzwe afite abandi bana. Ni ukuvuga ko Iradukunda afite musaza we umwe bahuje amaraso y’ababyeyi bombi.

Uyu nyirasenge yabafashe ubwo ababyeyi bari bamaze gutandukana hanyuma mama wabo akabarekera Se na we akagumana abandi bana yari yarabyaye ku wundi mugabo.

Ati “Liliane yabanye na se na nyina, agize imyaka itanu bashobora kuba hari ibyo batumvikanye baratandukana. Mama wa Liliane aramufata na musaza we abashyira Se. Nabonaga ko papa we atashobora kubarera; kugira ngo umugabo arere abana bangana gutyo ntibiba byoroshye. Narabafashe mbazana hano ndabarera.”

Iradukunda yabaye kwa nyirasenge kuva ubwo kugera arangije amashuri abanza, ahava ajya kwa mubyara we (umukobwa wa Niyoyankunze Odette) utuye mu Rwampara ari na ho akiba ubu.

Nyirasenge wa Iradukunda Liliane, Niyoyankunze Odette, yavuze ko ariwe wareze uyu Nyampinga w'u Rwanda kuva afite imyaka itanu

Bamaze imyaka isaga itandatu batarabonana bahuzwa n’urupfu

Uyu mubyeyi wareze Iradukunda Liliane na musaza we, yavuze ko nyuma y’aho nyina yanze gukomeza kubana na bo, yahise anaburirwa irengero ku buryo banamushakaga ngo abana be bamuramutse bakamubura.

Ati “Kuva afite imyaka itanu twarabanye, mama we tukayoberwa amakuru ye kuko nta telefone ye twagiraga ariko njye kuko nari nzi ahantu bigeze kuba nkajya numva mfite ikibazo cyo kurera abana batabona nyina. Nohereza umukobwa wanjye ngo bajye kumushaka bageze yo baramubura ubwo turaza turatuza.”

Bajya guhura ngo byaturutse ku rupfu rwa musaza wa Iradukunda Liliane (bahuje nyina gusa), icyo gihe hari hashize imyaka irenga itandatu batarabonana.

Uyu mukobwa yari yaramaze no gutangira amashuri yisumbuye, kuva ubwo bongera kunga ubumwe bakajya banamusura mu biruhuko na we akamusura amusanze kwa mubyara we.

Niyoyankunze ati “Hari umuntu abereye nyina wabo utuye inaha Kimironko niwe waje ansaga aho nkorera mu Mujyi arambwira ati ‘Mama Liliane yapfushije umwana w’umuhungu’ ubwo tujya kubatabara, nibwo twongeye kumubona. Kuva ubwo twatangiye kujya dushaka aho aba tukamwohereza akagenda akamusura. Urupfu rw’uwo musaza we nirwo rwatumye bongera kubonana.”

Baguye mu kantu

Nyirasenge wa Iradukunda Liliane avuga ko bakibona inkuru y’uko uyu mukobwa yanze nyina, bakubiswe n’inkuba kuko bari bazi neza ko nta kibazo afitanye n’umubyeyi we.

Ati “Byaradutunguye, twumva tubuze n’icyo tuvuga kuko twumva atamwanga. Tubona amusura mbese twaratunguwe ntabwo twatekerezaga kujyana umwana mu binyamakuru.”

Uyu nyirasenge yakomeje avuga ko mbere y’uko Iradukunda akorera ingendo muri Amerika no mu Bushinwa muri Miss World yari yaramusuye akanamufasha kwivuza imvune yagize.

Ati “Nzi ko yamusuye, nziko yanamuvuje kandi ndumva yaravunitse kera. Ni nko mu kwezi kwa gatanu cyangwa mu kwa gatandatu […] Urabona ko muri iki gihe ashobora kuba adaheruka yo, yagiye muri Amerika no mu Bushinwa. Ayo mezi yose natwe ntitwamubonaga. Simbizi uko wenda umubyeyi akumbura umwana we ariko twe nta kibazo twabibonyeho. Kugeza ubu ntabwo twigeze dusonanukirwa icyabimuteye.”

Niyoyankunze yavuze ko kugeza ubu atazi icyo Iradukunda Liliane yaba yarapfuye n’umubyeyi we kuko ajya kuba Nyampinga w’u Rwanda na nyuma y’aho bari babanye neza.

Igikomere ku mutima wa Iradukunda Liliane na musaza we

Inkuru y’umubano wa Iradukunda Liliane n’umubyeyi we yakwirakwijwe cyane mu itangazamakuru benshi bamwuka inabi bamushinja kwirengagiza umubyeyi we.

Ibi byamukomerekeje umutima cyane ku buryo ku munsi w’ubunani ubwo abandi bishimiraga umwaka mushya we ngo agahinda kari kamwegetse, amarira ari yose.

Niyoyankunze ati “Nyuma yo kubibona naramuhamagaye nsanga yababaye, atasohotse no mu nzu, yarize. Ndamukomeza numva ntabwo ari kubyumva neza nawe atari gusobanukirwa impamvu yabimuteye. Yiriwe mu rugo yikingiranye arira, byamukozeho cyane.”

Musaza wa Iradukunda Liliane, Rubangura Valentin, nawe avuga ko yababajwe cyane n’uburyo umubyeyi we yashyize ku karubanda mushiki we abeshya.

Ati “Byarambabaje kandi nawe (Iradukunda) byaramubabaje cyane. Mu by’ukuri ntabwo numva ko ari amezi arindwi. Mushiki wanjye amuba hafi cyane nubwo tutabana. Wenda sinzi niba hari ikindi kintu yaba amukeneyeho kirenze kuba amuba hafi ariko amuba hafi mu buryo bwose.”

Imvune irakemangwa

Mu mashusho yafashwe umubyeyi wa Iradukunda Liliane avuga ku kibazo cye, ukuboko kwe kw’iburyo kugaragara nk’ukwavunitse bikabije dore ko kwari kuziritse, gusa abo mu muryango we basa n’ababifashe nko kuremereza ikibazo kuko bazi ko yari yarakize.

Umuhungu we ati “Nzi ko yaguye kuri moto ariko bidakabije, nta na sima yari yambaye. Hashize nk’ibyumweru bibiri cyangwa bitatu, nabonaga ari ibintu byoroshye sinzi nyine kubona mu mashusho yambaye kiriya kintu cy’imvune byarantunguye.”

Niyoyankunze nawe avuga ko mbere y’uko inkuru isohoka, ngo bari bahuriye ahantu mu munsi mukuru ari muzima gusa ngo batunguwe no kumubona aziritse.

Umugayo

Yaba nyirasenge wa Iradukunda Liliane cyangwa musaza we, bahuriza ku kuba uyu mubyeyi yarakoze amakosa akomeye kuko atari akwiye kujya mu itangazamakuru ngo ashyire umwana we ku karubanda.

Rubangura ati “N’ubwo ibyo byose byaba ntabwo ari ngombwa kwandagaza umwana wawe. Icyo nabwira ababyeyi ni ukuba hafi y’abana babo si ngombwa kwandagaza umwana kuko biriya ni ibintu birangirira mu muryango.”

Niyoyankunze utemera ko Iradukunda Liliane yakoshereje umubyeyi, avuga ko niyo byari kuba byarabaye byari kurangirira mu muryango aho kwiha amenyo y’abasetsi.

Ati “Namubwira ko atakoze byiza. Niyo yaba yaramukoshereje uretse ko nta makosa mubaraho ntabwo yamujyana mu itangazamakuru. Wenda yamuzana mu muryango akavuga ati ‘umwana yarananiye’, umuryango urahari tukamuhana ariko nk’umwana wawe wibyariye kugira ngo umujyane umuteze rubanda numva atari ibintu byiza.”

Musaza wa Iradukunda Liliane, Rubangura Valentin avuga n’ubwo umubyeyi we yabababaje, bitazababuza kumukunda no kumuha agaciro akwiye.

Biteganyijwe ko Iradukunda Liliane azatanga ikamba rya Nyampinga w’u Rwanda ku wa 26 Mutarama 2018.

Iradukunda Liliane ubwo yambikwaga ikamba rya Nyampinga w'u Rwanda, ibyishimo byari byasaze ababyeyi be
Iradukunda Liliane na Musaza we barerewe kwa nyirasenge nyuma y'aho ababyeyi be batandukaniye
Nyirasenge wa Iradukunda Liliane yahishuye ko uyu mukobwa yiriwe arira nyuma y'aho umubyeyi we amuvuzeho amagambo atari meza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza