Ibitangazamakuru bidashoboye kwishyura ibihangano by’abahanzi nibishaka bifunge- Mukurarinda

Yanditswe na Nsengiyumva Emmy
Kuya 1 Ukwakira 2020 saa 08:52
Yasuwe :
0 0

Muri iyi minsi abahanzi babyukije ikibazo cy’ibitangazamakuru bicuranga ibihangano byabo ariko ntibabibonemo inyungu. Umunyamategeko akaba n’umuhanzi umaze igihe mu muziki w’u Rwanda Alain Mukurarinda asanga igihe kigeze ngo umuhanzi atungwe n’akazi ke.

Umurindi w’abahanzi bavuga ko baharanira inyungu zabo wazamutse nyuma y’aho Urwego Ngenzuramikorere (RURA) rwibukije ibigo by’itangazamakuru ko bigomba kwita ku kwishyura amafaranga y’ibihangano bakoresha umunsi ku wundi.

Uyu mwuka mubi wongeye kuzamurwa n’uko bimwe mu bitangazamakuru byafashe ingamba zo kudacuranga indirimbo z’abahanzi badafitanye amasezerano.

Umuhanzi ushaka gucurangwa kuri ibi bitangazamakuru byamaze gufata izi ngamba, yegera ubuyobozi bwabyo agasinyana nabo amasezerano abaha uburenganzira busesuye bwo gucuranga igihangano cye.

Kugeza ubu bimwe mu bitangazamakuru birimo Radio1 na TV1 byafashe icyemezo cyo guhagarika gukoresha ibihangano by’abahanzi b’abanyarwanda badafitanye amasezerano.

Ibi bitangazamakuru byatangiye guhamagarira abahanzi kubegera bakagirana amasezerano yo gucuranga ibihangano byabo.

Alain Mukurarinda asanga ibitangazamakuru bitakwitwaza ubushobozi buke ngo byange kwishyura ibihangano by’abahanzi

Abinyujije mu kiganiro yanyujije kuri shene ye ya Youtube, Mukurarinda yavuze ko abahanzi bagomba guharanira uburenganzira bwabo ndetse ibihangano byabo bigatangira kubabyarira inyungu kuko nta handi bakura.

Ati ”Ayo maradiyo akurikirwa cyane kubera ibihangano by’abahanzi, kubera iki bifuza ko ikintu kigize 50% y’ibituma bakurikirwa bagikoresha ku buntu?”

Yakomeje agaragaza amakosa abiri akomeye ubuyobozi bw’ibitangazamakuru bushobora kugwamo.

Ikosa rya mbere ni ukumva ko abahanzi bo mu Rwanda nibakomeza guharanira uburenganzira bwabo, bo bazacuranga indirimbo z’abanyamahanga.

Aha yagize ati ”Ese bazaba bafite impapuro zerekana ko bafite uburenganzira bubemerera kuzicurangira ubuntu? Ese bwo nibasanga sosiyete y’abahanzi nyarwanda ifitanye amasezerano n’iyo muri ibyo bihugu abo bo hanze baturukamo?”

Ikosa rya kabiri ni iryo yise gukubirana umuntu mu ntege nke bakamusinyisha amasezerano yo gucuranga ibihangano bye ku buntu.

Kuri iki cyo yagize ati” Ubundi mu mategeko urabizi ko iyo ukubiranye umuntu mu ntege nke ukamusinyisha amasezerano aba ashobora kuzayatesha agaciro?”

Abajijwe niba abona izi gahunda zo kwishyuza ibitangazamakuru zitihutishijwe cyane ko uru rwego narwo ruri kwiyubaka, yagize ati” Aho umuntu yanavuga ko kuba bari kwiyubaka bitareba umuhanzi, ni irushanwa nkuko abahanzi barushanwa gukora indirimbo nziza zizakundwa, ni nako amaradiyo azarushanwa kwishyura ngo acurange indirimbo nziza. Abo bizananira nibashaka bazafunge.”

Uyu mugabo w’umuhanga mu mategeko yavuze ko igihe kigeze ngo abahanzi babyaze umusaruro ibihangano byabo, hatitawe ku bwoba bari guterwa ko nibaramuka bishyuje ibihangano byabo ama radiyo atazongera kubacuranga.

Alain Muku yagaragaje ko Sosiyete y’abahanzi nyarwanda ikwiye gushyiraho uburyo bunoze bwo kwishyuriza abahanzi ndetse no kubagabanya amafaranga yabo.

Anasaba abahanzi kwiyandikisha muri iyi Sosiyete kuko ariyo ishinzwe kubishyuriza ibihangano bikaba byababyarira umusaruro.

Alain Mukurarinda yavuze ko igihe kigeze ngo abahanzi babyaze umusaruro ibihangano byabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .