00:00:00 IGIHE NETWORK KN KINYARWANDA EN ENGLISH FR FRANCAIS

Ubugeni bugiye kwifashishwa mu kumenyekanisha iby’ubuzima bwo mu mutwe mu Rwanda

Yanditswe na Mahoro Vainqueur
Kuya 10 Mutarama 2023 saa 10:51
Yasuwe :

Ibibazo by’ubuzima bwo mu mutwe ni bimwe mu bikomeje kwibasira benshi muri iki gihe dore ko Ikigo cy’Igihugu gishinzwe Ubuzima (RBC), giherutse gutangaza ko 20,5% by’Abanyarwanda bangana na miliyoni 2,6 bagendana indwara zo mu mutwe.

Ibi ni bimwe mu byasembuye umunyabugeni Kakizi Jemima bituma yiyemeza kugira uruhare mu gushakira ibisubizo iki kibazo ahuriza hamwe abanyabugeni 10 mu imurika ry’ibihangano by’ubugeni rigaruka ku bibazo by’ubuzima bwo mu mutwe.

Iri murika riri kubera ku Kacyiru mu mujyi wa Kigali ahitwa kuri L’Espace, ryatangiye ku wa 7 Mutarama rizageza ku wa 28 Werurwe 2023.

Akimanizanye Kakizi Jemima wateguye iki gikorwa akoze ku nshuro ya kabiri aganira na IGIHE, yavuze ko iri murika rigamije kwerekana uko ubugeni bwakwifashishwa mu kuganiriza urubyiruko ibyerekeye ubuzima bwo mu mutwe.

Agira ati “ Ubugeni budufasha gutangariza abandi ibyiyumviro, imbamutima n’amarangamutima byacu mu buryo bwisumbuye. Iri murika ry’ibihangano rigamije kwagura no gushimangira ibiganiro bikenewe ku buzima bwo mu mutwe no gushishikariza buri wese guhindura imyumvire abantu bafite ku bijyanye n’ubuzima bwo mu mutwe.”

Uyu munyabugeni avuga ko iri murika bise ‘Gendana nanjye’ rizahindura imyumvire ya bamwe bafite ku bibazo by’ubuzima bwo mu mutwe ndetse rigafasha mu gutanga impinduka mu muryango nyarwanda.

Ikindi ni ugusenyera umugozi umwe mu gukemura iki kibazo no kwirinda guhutaza ufite uburwayi bwo mu mutwe gufashanya no gushishikariza buri wese kubwitaho.

Abanyabugeni bamuritse ibihangano byabo bigaruka ku bibazo byo mu mutwe barimo; Uwera Odile , Teta Chel, Natacha Muziramakenga, Chritel Arras , Ines Ineza , Rutamu Fabiola, Kayibanda Alice, Ingride Mukundente, Poupoute na Birara Myriam.

Ibihangano byamuritswe bigaruka ku nkuru z’abafite ibibazo by’ubuzima bwo mu mutwe ndetse n’uko yagakwiye kwitabwaho.

Aba banyabugeni bagenda basobanurira buri wese uhageze igisobanuro cya buri gihangano, ubutumwa bukigize n’ibindi bitanukanye.

Mu ntangiro za Gashyatare, Kakizi Jemima afite gahunda yo kugeza iki gikorwa hirya no hino mu gihugu binyuze mu bigo bihuza urubyiruko ndetse n’ibigo by’amashuri, igikorwa gishobora gutwara amezi abiri.

Iki gikorwa cyatewe inkunga n’ikigo cy’Abadage, Goethe Institut na L’Espace ku munsi wa mbere cy’itabiriwe na benshi mu rubyiruko ndetse n’abanyamahanga batandukunye.

Kakizi Jemima ari mu bashinje umuryango w’abanyabugeni Rwandan Women Artists (RWA) afatanyije n’abandi banyabugeni b’igitsinagore batandukanye.

Ukigera ahabereye iki gikorwa hari ubutumwa bufasha gusobanukirwa ibikorwa biri kuhabera
Bimwe mu bihangano byamuritswe bigaruka ku bibazo by'ubuzima bwo mu mutwe
Bamwe mu bitabiriye iri murika ibihangano bitegereza neza ibyamuritswe
Iki gikorwa cyitabiriwe n'ab'ingeri zitandukanye
Iki gikorwa cyitabiriwe na benshi mu rubyiruko
Akimanizanye Jemima Kakizi wateguye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .