Hillsong London yasendereje ibyishimo Abanya-Kigali mu gitaramo cyitabiriwe ku rwego rwo hejuru(Amafoto)

Yanditswe na Uwiduhaye Theos
Kuya 7 Ukuboza 2019 saa 01:37
Yasuwe :
0 0

Hillsong London yasigiye ibyishimo ibihumbi by’abitabiriye igitaramo gikomeye yakoreye mu Rwanda.

Hashize amezi atatu abakunda umuziki wo kuramya no guhimbaza Imana bafite amashyushyu yo kuzareba imbona nkubone Hillsong London mu gitaramo cyabereye mu Rwanda kuri uyu wa 6 Ukuboza 2019.

Ni igitaramo cyavugishije benshi ku mbuga nkoranyambaga, ubukana bwacyo bwongeye kwitamurura ubwo aho cyabereye muri Kigali Arena hakubitaga hakuzura.

Guhera saa kumi z’umugoroba mu mihanda ya Kigali yari isibaniro ry’imodoka abantu basiganwa bajya kwihera ijisho iri tsinda rifite amateka akomeye mu guhimbaza Imana ku Isi.

Kuri Kigali Arena, guhera saa kumi n’imwe hari huzuyeyo abantu batonze umurongo bashaka kwinjira mu gitaramo, abandi batonze imirongo bagana aho cyabereye. Hari hari abantu bo mu bihugu bitandukanye baba mu Rwanda kuko wasangaga indimi ziganje zakoreshwaga n’abari bitabiriye ari Igifaransa n’Icyongereza gusa.

Iki gitaramo cyatangiye saa mbili zirengaho iminota kandi cyari gutangirwa saa kumi n’ebyiri bitewe n’uko abantu bari benshi cyane biragorana ko cyatangirira igihe.

Ku rubyiniro habanje Aimé Uwimana n’itsinda yamufashaga mu miririmbire, aririmba indirimbo ze zitandukanye zakunzwe cyane zirimo iyitwa ‘Inkovu’, ‘Urakwiriye’ n’izindi nyinshi zatumye abantu bizihirwa mu buryo bukomeye. Uyu muhanzi yagiye ku rubyiniro saa moya n’iminota 44 avaho saa mbili n’igice.

Uyu mugabo uri mu banyabigwi mu muziki wo kuramya Imana yishimiwe mu buryo bukomeye asigira abantu bakanyamuneza .

Itsinda rya Hillsong London ryari ritegerejwe ryinjiye ku rubyiniro saa mbili na 44, abantu bose bavugiriza icyarimwe amashyi ubona akanyamuneza ari kose.

Kuva ku ndirimbo ya mbere kugeza ku ya nyuma iri tsinda ryaririmbye abantu bari bihiwe mu buryo bukomeye hari n’abasukaga amarira kubera ibyishimo.

Uko ryasozaga indirimbo abantu bamwe bikirizaga icyari mwe bati ‘Amen’ abandi bakagaragaza ibyishimo bavuza akaruru gaherekejwe n’amashyi menshi.

Ryaririmbye indirimbo zitandukanye zirimo nka ‘Hozana’ ryagezeho abantu bakagira mu bicu icyarimwe, ‘Oceans’, ‘Take it all’, ‘Lord you’re all I Need’ , ‘What a beautiful name’, ‘Surrender’, ‘Behold’ n’izindi nyinshi.

Iri tsinda ryamaze igihe kigera ku mashaha atatu ku rubyiniro ryari rifite umuziki uyunguruye bivugwa ko wari waturutse muri Afurika y’Epfo.

Riri kuririmba ryanyuzagamo rikaganiriza abantu rizabwira ko ‘nta wundi wo guhangwa amaso uretse Imana’ rikabwira abantu ko ariwe utajya utererana abantu ayaba bari mu byiza cyangwa mu bibi.

Kwinjira mu myanya isanzwe muri iki gitaramo byari 10,000 Frw, VIP ari 20,000 Frw naho muri VVIP bibe 50,000 Frw.

Iri tsinda ryo mu Bwongereza rishamikiye kuri Hillsong United Worship yo muri Australia.

Iki gitaramo ryatumiwemo cyateguwe na Rwanda Events Group Ltd, sosiyete isanzwe itegura ibitaramo bitandukanye bikomeye. Icy’uyu mwaka cyiswe ‘Hillsong London Live in Kigali’.

Hillsong London yageze mu Rwanda ku wa 4 Ukuboza 2019 mbere ho iminsi mike ngo igitaramo kibe, ikora ibikorwa birimo n’icyo gusura urwibutso rwa Jenoside yakorewe Abatutsi ruri ku Gisozi mu Mujyi wa Kigali.

Iri tsinda rishamikiye kuri Hillsong United Worship Band yakomotse ku rusengero rwa Hillsong Church ruherereye mu mujyi wa Sydney muri Australia.

Urusengero rwa Hillsong ni rumwe mu zikomeye z’ivugabutumwa ku Isi yose, rwashinzwe mu 1993.

Uretse kuba rwaratangiriye muri Australie ubu rumaze gushinga imizi ku Isi yose ndetse rwagabye amashami mu bihugu 21 no mu migabane itandatu. Rukorera i Londres mu Bwongereza, Paris mu Bufaransa, Sao Paulo na Rio de Janeiro muri Brésil, Cape Town, muri Afurika y’Epfo, Tel Aviv muri Israel ndetse no mu mijyi itatu muri Leta Zunze Ubumwe za Amerika.

Hillsong London yasigiye ibyishimo ibihumbi by’abitabiriye igitaramo gikomeye yakoreye mu Rwanda muri Kigali Arena ku wa 6 Ukuboza 2019
Abantu bari bitabiriye ku bwinshi!
Kigali Arena yari yuzuye abaje kuramya no guhimbaza Imana
Hillsong London yasendereje ibyishimo abanya-Kigali mu gitaramo cyitabiriwe ku rwego rwo hejuru
Abantu banyuzagamo bagacinya akadiho
Hillsong London yagaragarijwe urukundo i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza