Filime ‘The 600’ yatangiye kwerekanwa kuri Amazon Prime

Yanditswe na Uwiduhaye Theos
Kuya 20 Ukwakira 2020 saa 09:07
Yasuwe :
0 0

Filime mbarankuru ‘The 600’ ivuga ku basirikare 600 bari kuri CND ubwo indege ya Habyarimana yaraswaga, yashyizwe mu zerekanwa kuri Amazon Prime muri Amerika y’Amajyaruguru.

Iyi filime yatangiye kwerakanwa kuri uru rubuga kuva ku wa 19 Ukwakira 2020, mu rwego rwo gufasha abantu baherereye muri ako gace batabashije kuyireba.

Abashaka iyi filime bazasabwa $4.99 ku bashaka kuyireba bayikodesheje gusa naho abashaka kuyigura bazishyura $7.99.

Ibyo wamenya kuri iyi filime

Mbere y’uko Jenoside yakorewe Abatutsi mu 1994 iba, ku wa 6 Mata uwo mwaka abasirikare 600 bo muri batayo ya gatatu b’ingabo za RPA boherejwe mu nyubako y’Inteko ishinga amategeko yahoze yitwa CND mu rwego rwo kubahiriza amasezerano ya Arusha.

Filime mbarankuru The 600’ ivuga ku rugendo rwabo mu rugamba rwo kubohora igihugu no guhagarika Jenoside.

Iyi filime yanditswe inakorwa na Richard Hall ukomoka muri Amerika, muri Great Blue Productions. Uyu yatwaye igihembo cya Emmy Award, akaba asanzwe atunganya ibiganiro bya za televiziyo i Los Angeles. Hall amaze imyaka 26 akora uyu mwuga.

Gutunganya iyi filime yabifashijwemo na A Wize Media y’i Kigali ya Annette Uwizeye ari nayo ihagarariye iyo filime.

‘The 600’ ni imwe mu nkuru zizwi ya batayo ya gatatu yari igoswe n’abasirikare ba Leta ya Habyarimana ariko ubwo Jenoside yatangiraga abasirikare RPA bakoze ibishoboka ngo bayihagarike. Iyi nkuru igaragaza abasirikare bakiri bato baratojwe ikinyabupfura.

Iyi filime igaragaramo ubutabazi bwabaye ahantu hatandukanye, nk’ubwo mu ijoro ryo ku wa 16 rishyira 17 Kamena 1994 muri St Paul ahabohowe abasaga ibihumbi bibiri bakanyuzwa ku Kinamba, Gisozi, bagakomereza i Batsinda bakagezwa i Kabuye ahari haramaze gufatwa na FPR Inkotanyi.

Hagaragaramo na Sergeant Theogene uri mu batangiye igitero cya mbere ku ku ngabo zarindaga Habyarimana. Theogene n’abandi bakusanyije abatutsi benshi bo mu gace abo mu muryango we bari batuyemo babanyuza ahantu hagoye harimo na za bariyeri interahamwe ziciragaho abatutsi.

Nyuma umugambi we mwiza waje kuvumburwa maze batangira kuraswa ijoro ryose ariko abo yari arokoye yabagejeje aho bari bagiye amahoro.

Filime inagaragaza uburyo abatutsi barimo abana n’abagore bari bagiye kwicirwa kuri St. Andre, bikaburizwamo n’inka yarogoye Interahamwe zigahitamo kuyibaga, ingabo za RPA zikahagoboka zigatabara abo batutsi.

Ushaka kureba iyi filime kuri Amazon Prime wakanda hano

Filime mbarankuru 'The 600’ ivuga ku rugendo rw'Ingabo za FPR Inkotanyi mu rugamba rwo kubohora igihugu no guhagarika Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .