East Africa’s Got Talent yasobanuye iby’ingoma u Burundi bushinja u Rwanda kwiyitirira

Yanditswe na Muvunyi Arsène
Kuya 21 Kanama 2019 saa 04:51
Yasuwe :
0 0

Ku Cyumweru tariki 18 Kanama 2019 herekanywe agace ka gatatu k’irushanwa rya East Africa’s Got Talent rihuje abanyempano batandukanye baturuka mu Rwanda, Kenya, Tanzania na Uganda.

Ryagaragayemo abaserukiye u Rwanda batatu harimo itsinda ry’ababinnyi rya Kaza Kids, umukobwa ukora imyiyereko ngororamubiri wiyise “African Snake Girl” na Himbaza Club igizwe n’abakaraza b’ingoma z’i Burundi.

Nyuma y’aho iri rushanwa ryerekaniwe kuri televiziyo no ku mbuga nkoranyambaga, Abarundi batandukanye ntibishimye kuko bagaragaje ko batanyuzwe n’uburyo ingoma zifite inkomoko mu muco wabo zerekanywe aho bavuga ko byakozwe mu izina ry’u Rwanda.

Ibi byafashe indi ntera kuko na Minisiteri y’Umuco na Siporo mu Burundi yashyize hanze itangazo yamagana itsinda rya Himbaza Club kuba barakoresheje nabi ndetse rikitirira ingoma z’u Burundi u Rwanda.

Rigira riti “Minisiteri y’Umuco na Siporo iramenyesha Abarundi ko yababajwe kandi inanenga imyitwarire y’itsinda rigizwe n’abashatse kwiba, kwitirira umurishyo w’ingoma z’u Burundi.”

“Tukaba dufashe aka kanya ngo twamagane abo bose barimo kugerageza gushaka gukoresha mu nzira zitarizo no kwiyitirira ingoma z’u Burundi babanje kuzambura umwimerere n’amateka yazo haba mu myambaro cyangwa mu byerekanwa nyir’izina inkomoko y’ingoma ari bwo Burundi bwacu ndetse no kudakurikiza amategeko asanzwe akurikizwa mu kuvuza ingoma.”

Kuva mu 2014, ingoma z’u Burundi zanditse mu murage ndangamuco rya UNESCO nk’umwihariko w’iki gihugu, ari nayo mpamvu bamaganye itsinda rya Himbaza.

U Burundi bwumvise nabi?

Ubwo bari bageze imbere y’Akanama Nkempurampaka, umukemurampaka Makeda Mahadeo yababajije inkomoko y’ingoma bari bafite maze umwe asubiza ko zikomoka i Burundi ndetse abagize iri tsinda bagizwe n’Abanyarwanda n’Abarundi.

Yagize ati “ Zikomoka i Burundi ariko dukorera i Kigali guhera mu 2015. Nageze mu Rwanda mu 2015 mpunze nshaka abandi bakaraza bahunze bava i Burundi duhura n’abandi bo mu Rwanda bari basanzwe bari mu matorero atandukanye i Kigali dukora iri tsinda. Turavanze Abarundi n’Abanyarwanda.”

Umuyobozi w’irushanwa rya East African Got Talent, Lee Ndayisaba, yabwiye IGIHE ko mu bahatana nta n’umwe uba woherejwe n’igihugu ndetse ko batika ku nkomoko y’igihangano cyerekanywe.

Ati “Nta muntu woherejwe na leta nk’uko babivuga [u Burundi]. Icya kabiri abitabira irushanwa ntabwo bavuga ko ibyo berekana ari umwimerere wabo. Niba umuntu avuze ko ashaka kuririmba indirimbo ya Micheal Jackson turamwerera.”

Yongeyeho ko impamvu bemeye ko Himbaza Club ihatana nk’iturutse mu Rwanda, ari uko mu bayigize harimo Abarundi baba mu Rwanda ndetse n’Abanyarwanda, bityo ko nta mategeko bigeze bica.

Ati “ Barabyivugiye neza ko ingoma zikomoka mu Burundi ndetse ko n’abakaraza harimo abaturuka mu Burundi no mu Rwanda. Kuko ari igikorwa kimwe, bakaba bavanze n’abanyarwanda nabo batuye mu Rwanda bibaha uburenganzira bwo kujya mu irushanwa. Nta kwiyitirira umuco birimo nk’uko bivugwa mu itangazo.”

U Burundi bwavanze imyidagaduro na Politiki

Minisitiri w’Umuco na Siporo mu Burundi, Pelate Niyonkuru, wasinye kuri iri tangazo yahuje iki kibazo cy’ingoma n’ibibazo bya politiki bisanzwe biri hagati y’ibihugu bombi kuva mu 2015.

Ati “Twakwibutsa ko igihugu cy’u Rwanda hari byinshi tutumvikanaho mu mibanire none kikaba kigeze aho kwiyitirira ingoma z’u Burundi.”

Alphonse Rugambarara, wabaye Minisitiri ushinzwe Umuco n’Imikino mu Burundi yabwiye BBC mu bihugu bitandukanye birimo Abarundi benshi hari amatorero avuza ingoma kandi bisanzuye.

Yongeyeho ko icyabiteye ari impamvu z’imibanire y’ibihugu byombi isanzwe itameze neza.

Ati “Nibaza ko ari ibintu bya politiki, kuko iyo biba byakozwe n’abandi atari [abavuye] mu Rwanda ntibari kubivuga cyane.”

Reba igice cya gatatu cya East Africa Got Talent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza