DJ Marnaud yahakanye ibyo kuba ari umutinganyi, ahishura ko akunda abakobwa bafite ikibuno kinini

Yanditswe na Muvunyi Arsène
Kuya 20 Gashyantare 2019 saa 08:30
Yasuwe :
0 0

Mugisha Gatera Arnaud uzwi nka DJ Marnaud, yahakanye ibyo kuba umutinganyi aherutse gushinjwa, ashimangira ko akunda abakobwa n’ubwo ubu nta mukunzi afite.

Ibi yabivugiye mu kiganiro cyaciye kuri Instagram imbonankubone. Cyaje nyuma y’aho mu ntangiriro z’iki Cyumweru ku mbuga nkoranyambaga hasakajwe ko uyu musore akururwa na bagenzi be.

Ubwo butumwa bwavugaga ko ibi bikorwa aribyo yakuyemo imitungo irimo imodoka ya Benz, akabari kitwa Marnaud’s Bar n’inzu atuyemo.

Inkomoko y’ibi ni ifoto igaragaza uyu musore yambaye agakabutura kagufi k’umweru n’agapira k’amaboko magufi, yarengejeho igisa n’ikanzu ko kuranana y’abakobwa ku buryo utari kwitegereza neza yari kugira ngo ni inkumi y’ikizungerezi.

Abantu benshi ku mbuga nkoranyambaga bataramanye DJ Marnaud, bamwe bemeza ko nta makuru mashya bamwumviseho kuko byari bisanzwe bizwi, abandi bavuga ko batunguwe mu gihe hari n’ababyamaganiye kure.

Kuva icyo gihe nta kintu yigeze abivugaho, gusa mu ijoro ryo kuri uyu wa Kabiri, yahakanye ibyo kuba aryamana n’abo bahuje igitsina.

Uyu musore w’imyaka 23 uvuga ko nta mukobwa bakundana afite, yatangaje ko akunda abafite ikibuno kinini.

Ati “Nkunda umukobwa w’igikara, uteye neza. Aho ngira intege nke ku mukobwa ni ku kibuno. Iyo ufite ikibuno birankurura cyane. Mwiyumvamo na Marnaud’s Bar nayitanga.”

Ibyo kuba amaze kwigwizaho imitungo myinshi mu gihe gito, uyu musore yavuze ko abikesha kwizigama.

Aherutse gutangariza IGIHE ko mu ijoro rimwe ashobora guhembwa amafaranga ari hagati y’ibihumbi 500 Frw na miliyoni imwe.

Uyu musore yatangiye kwamamara mu 2017 acuranga mu tubari dukomeye dutandukanye no mu bitaramo nk’icyitabiriwe n’umuhanzi Mr Eazy.

Ari mu itsinda ryitwa Dream Team DJ ahuriyemo na DJ Miller, DJ Toxxky na Dj Jullz.

Afite n’indirimbo ze bwite harimo iyitwa Bape yakoranye Active yakunzwe cyane mu mwaka ushize, Ribuyu yakoranye na DJ Pius na Boku imaze iminsi mike igiye hanze yahuriyemo na King James.

DJ Marnaud yahakanye ibyo kuba ari umutinganyi
DJ Marnaud yahishuye ko akunda abakobwa bafite ikibuno kinini
Uyu musore amaze gukorana n'abahanzi benshi. Aha hari mu ifatwa ry'amashusho y'indirimbo yitwa 'Bape' yakoranye na Active

Amafoto: Serge Muhizi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza