Cyusa yahuje imbaraga na Riderman mu ndirimbo itaka ubwiza bw’umukobwa

Yanditswe na Uwiduhaye Theos
Kuya 1 Ukwakira 2020 saa 07:22
Yasuwe :
0 0

Cyusa Ibrahim umwe mu bahanzi baririmba indirimbo injyana gakondo bari kwitwara neza muri iki gihe, yashyize hanze indirimbo nshya yise ‘Umwiza’ yahurijemo imbaraga n’umuraperi, Riderman.

Cyusa yabwiye IGIHE ko iyi ndirimbo yayitekereje ashaka gutaka umukobwa, akanambika umwishywa wafatwaga nk’impeta zambikwa abageni muri iki gihe.

Ati “Ni indirimbo nakoze yo gutaka umukobwa ukunda. Mvugamo ko nzamwambika umwishywa nk’ikimenyetso cy’uko azambera umugore. Umwishywa ni icyatsi kirandaranda cyera bambikaga umukobwa mu ijosi, iyo wamwambikaga umwishywa yabaga abaye umugore wawe; nibyo byasimbuwe n’impeta kuri ubu.”

Yakomeje avuga ko nyuma y’iyi ndirimbo ateganya ibindi bikorwa bizatuma abakunzi be bakomeza kwiyumva mu muziki we kandi no kunyurwa n’ibyo akora nk’uko bisanzwe.

Cyusa Ibrahim ni umuhanzi uzwi mu muziki gakondo, akaba mwene Rutare Pierre wamamaye cyane mu Rwanda mu myaka ya mbere ya Jenoside yakorewe Abatusti mu 1994, akaba umuvandimwe wa Paul Van Haver [Stromae] igihangange mu muziki ku Isi yose.

Uyu musore uri gusatira imyaka 31 amaze kwamamara mu bihangano bitandukanye bigaruka ku muco nyarwanda.

Inyana ni iya mweru! Se Rutare Pierre yari inzobere mu bwubatsi ufite ibigwi i Kigali, wanagize uruhare rukomeye mu iyubakwa rya zimwe mu nyubako z’i Kigali mu gihe cye harimo n’imisusire y’amasangano yo mu Mujyi rwagati (Rond Point). Yanamamaye mu mukino wa Basketball na Volleyball.

Cyusa ni umuvandimwe wa Stromae nawe uri mu bahanzi bakomeye ku Isi wamamaye mu ndirimbo zitandukanye zirimo ‘Papaoutai’, ‘Alors on danse’, ‘Formidable’, ‘Racine carrée’ n’izindi.

Cyusa na we arakataje mu muziki. Mu gihe kirengaho gato umwaka amaze atangiye gushyira hanze ibihangano, ni umwe mu barangamiwe mu gisekuru cye kubera gutera umugongo injyana z’amahanga akimakaza gakondo.

Amaze gukora indirimbo zirimo ‘Umutako’, ‘Mbwire nde’, ‘Rwanda Nkunda Migabo’, ‘Umwitero’ ndetse n’iza kera yasubiyemo nka ‘Imparamba’, ‘Muhoza wanjye’ n’izindi.

Reba indirimbo nshya ya Cyusa na Riderman

Riderman na Cyusa muri iyi ndirimbo bagaragaramo bakenyeye
Riderman agaragara muri iyi ndirimbo abyina bya kinyarwanda
Cyusa ni umwe mu basore bake babashije gufata umwanzuro wo kwimariramo indirimbo gakondo gusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .