Ubukwe bwa Chryso Ndasingwa na Gatete Sharon bwagombaga kuba ku wa 22 Ugushyingo 2025, icyakora amakuru IGIHE ifite ni uko bwigijwe imbere ku buryo buzaba mu Ukwakira 2025.

Amakuru avuga ko aba bombi batifuje kongera gutangaza amatariki mashya nk'uko byari byagenze mbere.

Ku rundi ruhande, igitaramo aba bahanzi bagombaga gukorera mu Bubiligi ku wa 8 Ugushyingo 2025 cyamaze kwimurirwa ku wa 23 Ugushyingo 2025.

Mu kiganiro na IGIHE, Chryso Ndasingwa yirinze kugaruka ku mpamvu z’izi mpinduka.

Uyu musore aritegura ubukwe na Gatete Sharon nyuma y’uko ku wa 4 Nzeri 2025 basezeranye imbere y’amategeko.

Ku wa 25 Kamena 2025 nibwo Ndasingwa yambitse impeta Getete Sharon bemeranya kurushinga.

Ni umuhango wari ukurikiye uwo gufata irembo wabaye ku wa 22 Kamena 2025, ari nabwo benshi bamenye inkuru y’urukundo rwabo cyane ko mu mwaka bari bamaranye, abantu batari barigeze barutahura.

Baheruka kwerekanwa mu rusengero tariki 29 Kamena 2025. Berekanywe mu rusengero rwa Newlife Bible Church Kicukiro ari naho Ndasingwa asanzwe asengera.

Mu minsi ishize Chryso Ndasingwa na Sharon Gatete bagaragaje ko bakundanye nyuma y’imyaka icyenda baziranye cyane ko bamenyanye mu 2015, ariko bagatangira urugendo rwo gukundana mu 2024.