Ibi yabigarutseho mu gitaramo Sengabo Jodas yamurikiyemo album ye ya mbere yise ‘Bene u Rwanda’ kuri uyu wa Gatanu tariki 3 Gashyantare 2023.

Iki gitaramo cyaririmbyemo abahanzi batandukanye nka; Audia Intore, Iganze Gakondo, Itorero Indangamirwa, Inkindi, Angel na Pamela ndetse na Junior Rumaga.

Benshi mu rubyiruko bitabiriye iki gitaramo ntibakanzwe n’imbeho yari ihari bacinye akadiho kuva gitangiye kugeza umurishyo wa nyuma uvuze.

Cécile Kayirebwa wari witabiriye iki gitaramo yanyuzwe bikomeye n’impano ya Junior Rumaga ndetse na Sengabo abaha umukoro wo gukomeza gushyigikira iyi nganzo bakayitoza abato n’abandi bakibyiruka.

Ubwo yari ahawe ijambo yagize ati “Kwibyara bitera ababyeyi ineza, Ndashima inganzo ya Sengabo, mu by’ukuri ibi bintu biteguye neza , nanyuzwe cyane n’inganzo y’aba bana , uburyo uyu musore (Junior Rumaga) akurikiranya amagambo atondetse neza kandi adategwa, nabikunze cyane, muri abahanga.”

Cécile Kayirebwa yashimiye Sengabo Jodas nyuma yo kumurika album y’indirimbo icumi yise ‘Bene u Rwanda’ asaba abahanzi gushaka umwihariko mu byuma by’umuziki bakoresha.

Ati “Ndashimira Sengabo wakoze iki gitaramo , natunguwe no kubona abantu bangana gutya bitabiriye , ibintu biratunganye nta bantu bahekeranye nakwemeye.”

“Ariko rero nanjye ibi byuma ndabikunda narabikoresheje rimwe na rimwe ariko ntakintu kiruta amajwi yihariye y’abantu bajyanirana, iyo hari akagoma cyangwa inanga bigufasha kujyana nibyo uririmba biba ari byiza cyane.”

Kayirebwa yasabye urubyiruko rwitabiriye iki gitaramo gusigasira uyu muziki gakondo bakagerageza kusa ikivi cy’abababanjirije.

Yagize ati “Iyo mvuye i Burayi ngerageza gukorana cyane n’aba bana , mbasaba ko inganzo yabo bakwiye kuyigaragaza ndetse bakabyigisha abandi bagakomeza urugendo nkuko nanjye nagerageje kugira ngo urubyiruko rutazasigarana ubusa muri gakondo.”

Iki gitaramo cyabereye kuri Cayennes Resort Launge Kimironko mu mujyi wa Kigali , umurishyo wa nyuma wavugijwe saa sita z’ijoro.

‘Bene u Rwanda’ ni album Sengabo yatangiye gutunganya mu 2018, yishimiye ubutumwa yagenewe na Cécile Kayirebwa batangiye bahuye bwa mbere mu 2017 amwizeza ko azasohoza ubutumwa yamuhaye.

Ababishoboye bageragezaga kubyina bajyana n'indirimbo zacuranzwe

Ababishoboye bafashe amashusho azahora abibutsa ibi bihe

Abakobwa bagize Kigali Protocal nibo bakiraga abantu batandukanye binjiraga muri iki gitaramo

Abakuru banyuzwe no kubona urubyiruko rwitabira igitaramo nk'iki cy'umuziki gakondo

Abakuru n'abato banyuzwe n'umuziki gakondo wacuranzwe muri iki gitaramo

Abasore bagize itorero 'Indangamirwa' banyuze benshi

Abato n'abakuru bagaragaje urukundo bakunze umuziki gakondo

Akanyamuneza kari kose ku rubyiruko rwitabiriye iki gitaramo

Album Sengabo Jodas yamuritse yatangiye kuyitegura mu 2018

Ange na Pamela banyuze benshi bari muri iki gitaramo

Ange na Pamela basabwe gukomera ku muco no kuwutoza abakiri bato

Audio Intore yaririmbye indirimbo zirimo Rwera imfura , simbi ryanjye na Rwangabo

Byari ibyishimo kuri buri wese witabiriye iki gitaramo

Bataramye biratinda

Cécile Kayirebwa yanyuzwe n'inganzo ya Junior Rumaga

Cécile Kayirebwa yanyuzwe n'inganzo ya Sengabo Jodas amusaba gukundisha abato umuziki gakondo

Cécile Kayirebwa yasabye urubyiruko gukora ibishoboka byose basigasira umuziki gakondo

Iganze Gakondo banyuze urubyiruko rwitabiriye iki gitaramo

Iki gitaramo cyari kiyobowe na MC Mukiza

Indangamirwa zanyuze abitabiriye iki gitaramo

Inkindi muri iki gitaramo yifashishije indirimbo zirata ibigwi by'Inkotanyi

Itorero Indangamirwa niryo ryafunguye iki gitaramo

Iyi album ye ya mbere yayituye umubyeyi we witabye Imana atabonye inganzo y'umuhungu we

Muri iki gitaramo Audia Intore yasoje ahishurira abacyitabiriye ko afite igitaramo ku itariki 8 Werurwe 2023

Ubishoboye yafataga agafoto ku urwibutso

Umusizi Junior Rumaga yasogongeje abari muri iki gitaramo bimwe mu bisigo biri kuri Album 'Mawe' igizwe n'Ibisigo 10

Sengabo Jodas yishimiye kumurika album ye ya mbere yise 'Bene u Rwanda'

Urubyiruko rwanyuzwe runyuzamo rucinya akadiho

Amafoto: Shumbusho Djasiri