BK yatangije ikiganiro kigamije guhugura urubyiruko n’abandi banyarwanda ku kwiyubaka

Yanditswe na Uwiduhaye Theos
Kuya 30 Kamena 2020 saa 10:59
Yasuwe :
0 0

Banki ya Kigali (BK) yatangije ikiganiro kigamije guhugura urubyiruko n’abandi baturarwanda ku nzira zizabafasha kwiyubaka mu bijyanye n’ubukungu.

Ni ikiganiro cyiswe ‘Financial Literacy Clinic’ kizajya gica kuri Isibo TV na shene ya YouTube ya Banki ya Kigali, buri cyumweru guhera saa tatu z’ijoro.

Intego nyamukuru gifite ni uguteza imbere urubyiruko ndetse n’abaturarwanda bose muri rusange harimo n’abahanzi nka bamwe mu bantu bakirigita ifaranga ariko akenshi bamwe ntibarikoreshe mu buryo bukwiriye. Muri iki kiganiro hazajya hatangwa ibihembo ku bantu bakurikiye neza.

Mu kiganiro cyabaye kuri iki Cyumweru tariki 28 Kamena 2020, hari hatumiwemo Mushyoma Joseph [Boubou] uyobora East Africa Promoters itegura Iwacu Muzika Festival ndetse na Nshuti Thierry ushinzwe Imenyekanishabikorwa muri Banki ya Kigali.

BK isanzwe iri mu baterankunga b’imena muri Iwacu Muzika Festival. Nizeyimana Philbert uzwi nka Phil Peter wari ukiyoboye, yatangiye abaza Nshuti icyo bisobanuye kuri bo ku gukorana n’ibigo nk’ibi biteza imbere umuziki muri rusange.

Mu gusubiza ati “gukorana n’abanyamuziki ntabwo tuza gusa ngo abantu babyine baryoherwe. Nka Banki ya Kigali dushaka ko ibi bitaramo biba inzira yo kuganira n’urubyiruko n’abanyarwanda ku buryo umuntu yubaka ubukungu buhamye.”

Ati “Iyo tuganira na Boubou ndavuga nti ni byiza abahanzi murabagaragaza ariko se umuhanzi w’Umunyarwanda azaba umukungu ryari? Ahinduke umukire yubake ubukungu, duterekeza ko ubuhanzi ari umwuga. Dushaka ko kuba turi muri Iwacu Muzika bizatuma abahanzi bumva icyo banki yamarira umuhanzi naho umuhanzi yagera, tugamije kubaka ubuhanzi nk’umwuga cyangwa ikintu cyatunga umuntu mu buzima bwa buri munsi iyo niyo nshingano yacu. “

“Si abahanzi gusa, n’urubyiruko rukunda iki kiganiro twifuza ko rwamenya uko umuntu yubaka ubukungu. Niyo mpamvu tuvuga ko iki kiganiro ari ‘Financial Clinics’ turashaka kuvura ikibazo kijyanye no kubaka imikoranire n’amabanki n’uko umuntu yubaka ubukungu kugira ngo agire aho agera.”

Nshuti Thierry yabajijwe niba hari umwihariko ku bahanzi wo kuba bakoroherezwa kubona inguzanyo cyangwa se izindi serivisi za banki, asubiza ko hari uburyo Banki zikoramo ari nabwo bakwiye kubanza kumva neza.

“Ni byiza ko abantu bumva uko amabanki akorana n’abantu. Iyo umuntu agiye kuguza tugomba kumenya aho ubwishyu buzava kubera ko amafaranga banki iguriza ntabwo aba ari ayayo. Ni ay’abantu baba babikije, banki irayafata ikayaguriza umuntu ariko ufite uko azishyura. Ni byiza ko urubyiruko, abahanzi ndetse n’abandi baturarwanda bumva inama tubagira bakanyuza amafaranga yabo kuri konti. Ibi bizabafasha kubaka amateka ya konti zabo, bityo igihe bakeneye kwaka inguzanyo amateka ya konti yifashishwe mu kureba ayo umuntu yinjiza.”

Thierry Nshuti yasoje atanga inama ati: “Tanga umusanzu wawe wo kudatuma amafaranga aguca mu ntoki ahubwo uyanyuze muri konti yawe ya BK dukorane, nta hantu utazagera.”

Nshuti Thierry yavuze ko BK yiteguye gufasha buri wese uzayigana, asaba abahanzi by'umwihariko kuzuza ibisabwa hanyuma bakayigana ikabafasha kwagura impano zabo
Mushyoma Joseph utegura Iwacu Muzika Festival iterwa inkunga n'ibigo bikomeye birimo na BK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .