Big Fizzo yatakambiye Perezida w’u Burundi amusaba gushyiraho itegeko rikumira indirimbo z’abanyamahanga

Yanditswe na Nsengiyumva Emmy
Kuya 17 Nzeri 2020 saa 07:54
Yasuwe :
0 0

Umuhanzi Big Fizzo yatakambiye ubuyobozi bw’u Burundi na Perezida Evariste Ndayishimiye, ngo bashyireho itegeko rikumira indirimbo z’abanyamahanga zikomeza kwigarurira isoko ry’umuziki mu Burundi, bityo hacurangwe iz’abenegihugu gusa.

Ni ubusabe yatangiye mu birori ngarukamwaka byiswe Flambeau de la Paix, byabereye mu mujyi wa Bujumbura kuri uyu wa 16 Nzeri 2020, imbere y’imbaga y’Abarundi n’abayobozi banyuranye, barimo umuyobozi w’Umujyi wa Bujumbura.

Big Fizzo yabivuze nyuma yo kumara umwanya afatanya n’abahanzi bo muri Bantu Bwoy, gushimisha abitabiriye ibyo birori.

Kimwe n’ahandi mu bihugu bigishakisha uburyo bwo guteza imbere umuziki waho, mu Burundi abahanzi bahora bibaza icyakorwa ngo bisubize icyubahiro bahoranye mu muziki w’akarere mu myaka yo ha mbere.

Kenshi usanga abahanzi baterana amagambo n’abanyamakuru n’aba Djs, babashinja kudacuranga indirimbo zabo ahubwo bagahitamo kubasumbisha abanyamahanga.

Byatumye Big Fizzo nk’umuhanzi mukuru afata icyemezo, avuga mu izina ry’abandi bahanzi. Yatakambiye umukuru w’igihugu amusaba gutanga itegeko rikumira ibihangano biva hanze, bagacuranga gusa iby’Abarundi.

Mu gihe cy’iminota ine, Big Fizzo cyangwa se Farious nkuko benshi bamwita, yagize ati ”Sinava hano ku rubyiniro ntabivuze, ese mwibaza ari iyihe mpamvu umuziki w’u Burundi udatera imbere? Ntabyo muzi. Reka dushimire abanyamakuru, aba Djs n’abateza imbere umuziki.”

“Abarundi turi miliyoni 12 ariko nta na rimwe indirimbo y’umurundi iragira abayirebye miliyoni [ku mbuga zinyuzwaho umuziki]. Ndashaka gutanga ubutumwa bwagera ku mukuru w’igihugu n’abayobozi bakuru bose. Turabasaba ko batanga itegeko ko mu bubari bwose, ku maradiyo no mu tubyiniro bacuranga umuziki w’i Burundi.”

Big Fizzo yikomye bamwe mu ba Djs n’abanyamakuru bacuranga indirimbo zo hanze cyane, abasaba ko bazatemberera mu bindi bihugu bakareba uko bateza imbere umuziki waho.

Yavuze ko Abarundi bafite ibihangano byinshi kandi byiza, asaba abanyamakuru n’aba Djs kubashyigikira umuziki ugakomeza gutera imbere.

Ati ”N’umuyobozi w’Umujyi wa Bujumbura ari hano, nyakubahwa muyobozi, by’umwihariko mu mujyi turabasabye mutange itegeko, mu bubari no mu tubyiniro bacurange indirimbo z’i Burundi tuzatera imbere. Ndabizi ko abarundi bakunda indirimbo zacu ariko batazihabwa kenshi.”

Big Fizzo yatakambiye Perezida w’u Burundi ngo ashyireho itegeko rikumira indirimbo z'abanyamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .