Bamwe baminurije hanze: Amashuri y’abakobwa bahatanira ikamba muri Miss Rwanda 2021

Yanditswe na Nsengiyumva Emmy
Kuya 1 Werurwe 2021 saa 01:37
Yasuwe :
0 0

Bitandukanye n’imyaka yabanje mu irushanwa rya Miss Rwanda, uyu mwaka higanjemo abakobwa bageze muri kaminuza ndetse harimo na bamwe bayisoje mu byiciro binyuranye.

Nyuma yuko hatangajwe abakobwa 37 bahagarariye intara zose n’Umujyi wa Kigali, IGIHE yagerageje gukusanya amakuru y’abari guhatana hagamijwe kumenya ibigo bizemo, amashuri bafite ndetse n’amasomo bakurikiye.

Mu myaka yashize wasangaga irushanwa ryo gushaka Nyampinga w’u Rwanda ryitabirwa n’abiganjemo abasoje amashuri yisumbuye, ahanini bishingiye ku mabwiriza yagengaga ugomba kwiyandikisha.

Ni imigirire isa n’iyahindutse muri uyu mwaka kuko mu bakobwa bahataniye ikamba rya Miss Rwanda 2021, harimo babiri basoje amasomo muri kaminuza zo muri Leta Zunze Ubumwe za Amerika.

Buri mukobwa uhatanira ikamba rya Miss Rwanda, amashuri afite n’ibyo yize

Akaliza Amanda, ufite nimero ya mbere nk’umubare ari gutorerwaho mu irushanwa rya Miss Rwanda, ni umukobwa w’imyaka 24 akaba ahagarariye Umujyi wa Kigali. Yarangije Icyiciro cya Kabiri cya Kaminuza mu Ishami ry’Ububanyi n’Amahanga muri Wagner College iherereye muri Leta Zunze Ubumwe za Amerika.

Akaliza Hope ufite nimero ya kabiri muri Miss Rwanda, afite imyaka 20 akaba umwe mu bahagarariye Intara y’Uburasirazuba. Yiga mu mwaka wa Kabiri muri Kaminuza ya Kigali mu Ishami rya ‘Procurement’.

Akeza Grace nimero gatatu muri iri rushanwa, ni umukobwa w’imyaka 20, akaba ahagarariye Umujyi wa Kigali. Yarangije amashuri yisumbuye muri Glory Secondary School aho yize ‘Amateka, Ubukungu n’Ubumenyi bw’Isi’.

Dorinema Queen w’imyaka 18, ni nimero enye muri iri rushanwa, uyu mukobwa uri mu bahagarariye Intara y’Uburasirazuba, yarangije amashuri yisumbuye mu bijyanye n’Ubugenge, Ubutabire n’isomo ry’Ibinyabuzima muri Kayonza Modern Secondary School.

Gaju Evelyne uri mu bahagarariye Umujyi wa Kigali, ni umukobwa w’imyaka 21 ufite nimero gatanu. Yiga mu mwaka wa Gatatu wa Kaminuza ya ‘UTB’ aho akurikirana ibijyanye na ‘Business Management’.

Ingabire Esther, umukobwa w’imyaka 19 akaba umwe mu bahagarariye Intara y’Uburengerazuba, yahawe nimero gatandatu nk’umubare atorerwaho. Yasoreje amashuri yisumbuye muri APRED Ndera aho yakurikiye Amateka, Ubukungu n’Ubumenyi bw’Isi.

Ingabire Grace, nimero karindwi mu bahatanira ikamba rya Miss Rwanda, ni umwe mu bahagarariye Umujyi wa Kigali akaba inkumi y’imyaka 25 y’amavuko. Yarangije Icyiciro cya Kabiri cya Kaminuza muri Bates College muri Leta Zunze Ubumwe za Amerika. Yize ibijyanye na ‘Dance with a concentration in Globalization, Philosophy and Psychology’.

Ingabire Honorine uhagarariye Intara y’Amajyepfo afite nimero umunani muri Miss Rwanda 2021. Uyu mukobwa w’imyaka 23 yiga mu Mwaka wa mbere wa Kaminuza ya UTB, ibijyanye na ‘Hotels and Restaurant Management’.

Isaro Rolitha Benitha w’imyaka 20 yahawe nimero icyenda muri Miss Rwanda 2021, ni umwe mu bahagarariye Intara y’Amajyaruguru. Uyu mukobwa yiga mu Mwaka wa Mbere wa Kaminuza ya INES Ruhengeri mu bijyanye na ‘Applied Economics’.

Nimero 10 mu irushanwa rya Miss Rwanda 2021 ni Ishimwe Sonia, uyu mukobwa w’imyaka 18 ahagarariye Intara y’Uburengerazuba. Yasoreje amashuri yisumbuye muri College St Andre aho yakurikiye ibijyanye n’Ubugenge, Ubutabire n’Isomo ry’Ibinyabuzima.

Kabagema Laila w’imyaka 19 afite nimero ya 11 mu Irushanwa rya Miss Rwanda 2021, ni umwe mu bahagarariye Umujyi wa Kigali. Uyu mukobwa yiga mu mwaka wa Kabiri wa Kaminuza ya ‘Medical University of Warsaw’ muri Pologne aho akurikirana ibijyanye n’Ubuganga.

Umukobwa ufite nimero 12 muri Miss Rwanda 2021, ni uwitwa Karera Chryssie w’imyaka 23 akaba umwe mu bahagarariye Umujyi wa Kigali. Ari gusoza amasomo ye muri Kaminuza y’u Rwanda aho yakurikiye ‘Environmental Planning’.

Nimero 13 mu irushanwa rya Miss Rwanda 2021, ni Kayirebwa Marie Paul w’imyaka 24 y’amavuko akaba umwe mu bahagarariye Umujyi wa Kigali. Uyu mukobwa yarangije amashuri yisumbuye mu bijyanye n’Ubukerarugendo muri College Baptiste St Sylvestre de Kinigi.

Kayitare Isheja Morella w’imyaka 19, nimero 14 mu irushanwa rya Miss Rwanda, ni umwe mu bahagarariye Umujyi wa Kigali. Yasoreje amashuri yisumbuye muri Excella School aho yize Imibare, Ubugenge n’Ikoranabuhanga.

Mbanda Godwin Esther nimero 15 akaba umukobwa w’imyaka 18 ni umwe mu bahagarariye Intara y’Uburasirazuba, yarangije amashuri yisumbuye aho yize ibijyanye n’Amateka, Ubukungu n’Ubumenyi bw’Isi muri Nyamata High School.

Mugabe Sheilla ufite nimero 16, ni umukobwa w’imyaka 19 akaba umwe mu bahagarariye Intara y’Uburasirazuba. Yarangije amashuri yisumbuye mu bijyanye n’Isomo ry’Ibinyabuzima, Ubutabire n’Ubumenyi bw’Isi muri Bluelakes International School.

Mugabekazi Assouma w’imyaka 21, afite nimero 17, ni umwe mu bahagarariye Intara y’Uburasirazuba. Yiga mu mwaka wa Gatatu wa Kaminuza ya UTB muri ‘Hospitality Management’.

Musana Hense Teta w’imyaka 21 akaba nimero 18, ni umwe mu bahagarariye Umujyi wa Kigali. Yarangije amashuri yisumbuye muri Excella School aho yize ibijyanye n’Isomo ry’Ibinyabuzima, Ubutabire n’Imibare.

Musango Nathalie w’imyaka 22 akaba nimero 19, ni umwe mu bahagarariye Umujyi wa Kigali. Yiga mu Mwaka wa Kabiri muri Davis College Akilah Campus aho akurikirana ‘Business Management and Enterpreneurship.

Umukobwa ufite nimero 20 muri Miss Rwanda 2021 ni Mutesi Doreen w’imyaka 19 y’amavuko akaba umwe mu bahagarariye Intara y’Uburengerazuba. Yasoreje amashuri yisumbuye muri Kigarama Secondary School mu Icungamutungo.

Muziranenge Divine w’imyaka 19, afite nimero 21 mu irushanwa rya Miss Rwanda 2021, ahagarariye Intara y’Uburengerazuba; yarangije amashuri yisumbuye muri Groupe Scolaire St Bernadette aho yize Ubugenge, Ubutabire n’Imibare.

Teta Cynthia w’imyaka 21 y’amavuko, ni umwe mu bakobwa bahagarariye Intara y’Uburengerazuba mu marushanwa ya Miss Rwanda 2021. Uyu mukobwa ufite nimero 22 yiga muri Kaminuza ya UTB mu mwaka wa Mbere wa Kaminuza mu Ishami ry’Ubukerarugendo.

Teta Larissa Keza w’imyaka 21 afite nimero 23, akaba umwe mu bakobwa bahagarariye Intara y’Amajyaruguru muri Miss Rwanda 2021. Yiga mu Mwaka wa Mbere wa Kaminuza ya Kigali mu Ishami rya ‘Public administration and local governance.’

Ufitinema Berline w’imyaka 21 afite nimero 24, ni umwe mu bakobwa bahagarariye Intara y’Amajyaruguru muri Miss Rwanda 2021. Kugeza ubu yiga mu mwaka wa Kabiri muri Kaminuza ya Kigali mu Ishami ry’Amategeko.

Umunyana Divine w’imyaka 21 ni nimero 25 mu Irushanwa rya Miss Rwanda, ni umwe mu bakobwa bahagarariye Intara y’Uburengerazuba. Kugeza ubu yiga mu Mwaka wa Kabiri Icungamutungo muri Kaminuza ya Kigali.

Umunyurwa Melissa ufite nimero 26 akaba umukobwa w’imyaka 21 ahagarariye Intara y’Uburengerazuba mu Irushanwa rya Miss Rwanda. Yitabiriye irushanwa arangije amashuri yisumbuye mu Ishami ry’Imibare, Ubutabire n’Isomo ry’Ibinyabuzima, yize muri Ecole Secondaire Scientifique Islamique.

Umutesi Lea w’imyaka 22 ni nimero 27 mu Irushanwa rya Miss Rwanda, ni umwe mu bakobwa bahagarariye Intara y’Amajyaruguru yiga mu Mwaka wa Gatatu w’Ubukerarugendo muri UTB.

Umutoni Witness w’imyaka 20 ni nimero 28 akaba umwe mu bahagarariye Umujyi wa Kigali, yitabiriye Miss Rwanda ari mu mwaka wa mbere muri Kaminuza ya Adventist University of Central Africa mu Ishami rya ‘Customs and Tax Operations’.

Umutoniwase Sandrine afite nimero 29 akaba umukobwa w’imyaka 21 ni umwe mu bahagarariye Intara y’Uburengerazuba. Yitabiriye iri rushanwa arangije kwiga ‘Ubugeni’ ku Nyundo.

Umwaliwase Claudette w’imyaka 21 ni nimero 30 muri Miss Rwanda ahagarariyemo Umujyi wa Kigali. Kugeza ubu uyu mukobwa yiga mu Mwaka wa mbere muri Kaminuza ya Kigali aho akurikirana amasomo ya ‘Marketing’.

Umwali Diannah w’imyaka 21 ni nimero 31, akaba umwe mu bahagarariye Intara y’Uburengerazuba. Yitabiriye irushanwa yiga muri Kaminuza ya Kigali mu Mwaka wa Kabiri wa Kaminuza muri ‘Finance’.

Uwankusi Nkusi Linda w’imyaka 21 afite nimero 32, ni umwe mu bakobwa bahagarariye Intara y’Uburasirazuba. Yitabiriye iri rushanwa arangije amashuri yisumbuye muri Martyrs Secondary School aho yize Indimi, Ubukungu n’Ubumenyi bw’Isi.

Uwase Aline w’imyaka 22 afite nimero 33, ni umwe mu bahagarariye Intara y’Amajyaruguru mu irushanwa rya Miss Rwanda. Yaryitabiriye arangije Icyiciro cya Mbere cya Kaminuza muri Davis College Akilah Campus mu Ishami rya ‘Hospitality Management’.

Uwase Kagame Sonia ufite imyaka 20 ni nimero 34. Uyu mukobwa ahagarariye Intara y’Uburengerazuba mu Irushanwa rya Miss Rwanda, yaryitabiriye yiga ‘Marketing’ mu mwaka wa mbere muri Kaminuza y’u Rwanda.

Uwase Phionah ufite imyaka 21 ni nimero 35. Ni umwe mu bahagarariye Umujyi wa Kigali akaba yaritabiriye Irushanwa rya Miss Rwanda ari mu Mwaka wa Gatatu muri Kaminuza ya Kigali, aho yiga ibijyanye na ‘Business Marketing’.

Uwera Aline ufite imyaka 22 ni nimero 36 akaba umwe mu bahagarariye Umujyi wa Kigali mu irushanwa rya Miss Rwanda yitabiriye ari mu mwaka wa mbere muri Mount Kenya University aho yiga Ubukerarugendo.

Umukobwa ufite nimero 37 mu irushanwa rya Miss Rwanda, ni Uwimana Clementine w’imyaka 21, akaba ahagarariye Intara y’Amajyepfo. Yitabiriye irushanwa yararangije amashuri yisumbuye aho yize ‘Accounting’ muri Lycée de Ruhango Ikirezi.

Irushanwa rirambanyije

Kuva ku wa 23 Gashyantare 2021, ni bwo amatora ya Miss Rwanda yatangiye ku mugaragaro.

Gutora hifashishijwe ubutumwa bugufi ni ukujya ahandikirwa ubutumwa bugufi, ukandika ijambo MISS ugasiga akanya, ugashyiraho nimero y’umukobwa utoye hanyuma ukohereza kuri 1525.

Gutora binyuze kuri murandasi (online), bikorerwa ku rubuga rwa IGIHE.com. Amajwi y’abatoye binyuze kuri SMS afite 70% naho online ni 30%.

Amatora azahagarikwa tariki 6 Werurwe 2021, umunsi uzatangarizwaho abakobwa 20 bazajya mu mwiherero.

Abahatana 20 ba mbere bazagera mu cyiciro cya nyuma, bazajya mu mwiherero uzatangira ku wa 6 Werurwe kugeza kuwa 20 Werurwe. Gusoza irushanwa bizabera muri Kigali Arena kandi bizatambuka kuri Televiziyo y’u Rwanda.

Amafoto: Miss Rwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .