Bad Rama! Umufundi wanze kuba umugambanyi agashora ibihumbi 200$ mu muziki

Yanditswe na Uwiduhaye Theos
Kuya 15 Mutarama 2019 saa 03:42
Yasuwe :
0 0

Uwavuga ko The Mane iri mu nzu zifasha abahanzi zihagaze neza muri iki gihe ntiyaba abeshye, ni inzu ibarizwamo Safi Madiba, Marina ndetse na Queen Cha. Igitekerezo, imishinga n’ibikorwa byose biri mu maboko y’umunt umwe, Mupenda Ramadan uzwi nka Bad Rama.

- Yize ubufundi
- Yabanye mu nzu imwe na Rafiki na Kamichi
- Yabaye umu-guide muri pariki, umuhanzi none ubu ni manager w’abahanzi
- Yavangaga iby’ubufundi no gutegura ibitaramo
- Ari mu bagize uruhare mu ihangwa rya Coga Style
- Safi na Nizzo bari mu bamuhaye ibitekerezo by’uko azakora ubujyanama

Mupenda Ramadan yaje mu muziki yiyita Bad Rama, ari muri bari gukangaranya benshi kubera akayabo ashora mu muziki ndetse bamwe bakibaza aho avoma ubukungu bwisukiranya ashyira muri aba bahanzi bataratangira kugaruza ibyo atanga.

Iyo muganira akubwira ko amaze imyaka myinshi mu muziki ndetse ko kera yari umuhanzi witwaga Jaku Malox, bikaza kumwangira agasubira kwikorera isima n’imicanga ariko afite ku mutima kuzagarukana ubukana amaze kugwiza agatubutse.

Mu mwaka umwe inzu yashinze abahanzi bayikoreramo bamaze gukora ibihangano bitandukanye kandi byakiriwe neza.

Uhereye kuri ’Fine’ Safi yahuriyemo na Rayvanny, ’Love you’ ya Marina na Harmonize n’izindi nyinshi, ababarizwa muri The Mane bamaze kwandika amateka mu karere.

Ni umugabo w’imyaka 34 umaze kwamamara cyane muri muzika nyarwanda. Mu kiganiro kirambuye yahaye IGIHE yavuze birambuye iby’ubuzima bwe muri muzika.

IGIHE: Bad Rama ni muntu ki?

Bad Rama: Navukiye Kicukiro ni n’aho ababyeyi banjye batuye. Nahigiye amashuri abanza, mu yisumbuye nize ibijyanye n’ubwubatsi mu bihaye Imana b’Abaporoso.

Nyuma y’aho naje gufata amahugurwa y’Ubukerarugendo muri Makerere University ndetse mbere y’uko nza mu muziki nayoboraga abantu baje mu bukerarugendo.

IGIHE: Winjiye muri muzika gute?

Bad Rama: Dusubiye inyuma gato nakuze nkunda umuziki na Siporo. Mbese nakuze nkunda ibintu byinshi. Nibuka ko mu gihe cyanjye niga mu mashuri yisumbuye nakundaga Karata cyane bitewe n’umukinnyi Jean-Claude Van Damme.

Nkunda uburyo yabikoraga, nkunda na filime ze cyane. Byaje gutuma nkunda karate nagarukiye ku mukandara witwa ‘marron’ ubanziriza Ceinture Noire.

Nyuma yo gukina karate nari ndi mu mashuri yisumbuye, ndabyibuka muri ibyo bihe nabanaga na Rafiki na Kamichi.

Rero muri uko kubana turi inshuti, twahuye bitewe n’itsinda ryabyinaga ryitwaga Hot Side, icyo gihe ikintu cyashobokaga byari ukubyina. Hakaba amarushanwa yo kubyina tukayitabira.

Ntabwo nari umubyinnyi mu gihe Kamichi yari umubyinnyi mwiza cyane n’aho Rafiki agasubiramo indirimbo z’abandi bahanzi.

Nkakunda ibyo bintu kuko nabonaga nyuma y’amashuri na Karate aribyo byampaga kuruhuka mu mutwe, niho ibyishimo byanjye byabaga biri.

Dukomeza kubana muri ubwo buzima tugeze aho turavuga tuti kubyina biri kugenda bita agaciro reka dushaka ikindi twakora. Dutangira itsinda ryo kuririmba duhuza ibitekerezo.

Buriya ni n’aho havuye ijambo ‘Coga Style’ Rafiki yaturushaga kuba yarabaye mu Majyaruguru cyane Kamichi nawe yari yarahize agitangira mu mashuri yisumbuye. Tubana na Producer Jay P, inzu twabagamo yari yegeranye n’iwabo.

Tugize amahirwe yo kubonana nawe biradushimisha cyane, turavuga tuti birashoboka. Twatangiye dukorera mu rusengero rwitwa Rwanda for Jesus aho Jay P yacurangaga akenshi indirimbo twazikoreraga kuri ‘Disquette’.

Nyuma avayo ajya gukorana na groupe yitwaga Sowers natwe tukajya dukurikirana ibikorwa bye. Hashize igihe haza Contact FM yazanye studio Jay P aba umwe mu bayikuriye, dutangira kwiyumvamo kuririmba bitangira gutyo.

IGIHE: Indirimbo yawe yagiye hanze bwa mbere yari iyihe?

Bad Rama: Ntangira kuririmba hariho Producer Mozey yakoraga muri studio y’umugabo witwa Happy. Hari Studio ya Dj B na Jackson Dado. Nibwo nakoze indirimbo ya mbere ikozwe na Dj B.

Icyo gihe yagiye hanze icurangwa ku maradiyo arimo C Fm na Flash Fm, nta Youtube mbese byari bigoye […] nagarukiye ku ndirimbo ya gatatu mbona iby’umuziki ntibinkundira ndabireka.

Ibyanjye byari karate nza kubwira bagenzi banjye nti nshuti zanjye mwebwe umuziki murawushoboye ariko njye ndabona nshoboye karate kuko niyo nzi.

IGIHE: Karate yo byarangiye bite?

Bad Rama: Nasoje kwiga nshaka icyo gukora, nsanga karate nta kigo kibyishyurira ndetse n’ibi tubona byaje bya ba Bouncer ntabwo byabagaho mu gihugu.

Naje no kwitabira irushanwa rya Karate ryo kujya mu marushanwa ya Jeux Olympiques icyo gihe igihugu cyari cyazanye Umutoza wo muri Korea.

Ryari irushanwa bakoraga batitaye ku mukandara, narakoze mba uwa gatatu ariko kubera amikoro n’uko gahunda zari ziteye nabyo biranga.

Ntabwo twigeze tujyayo, karate nayo nyireka ubwo. Nisubirira mu bufundi nari narize. Nari mfite marume wari ugiye kubakisha inzu Kimironko nyibera umuyobozi w’abubatsi.

Iyi nzu n’ubu iyo nyirebye inyibutsa byinshi, nakomeje ubwubatsi hari n’indi iherereye Kacyiru nakozeho iri munsi ya Ambasade ya Amerika nayo njya nyinyuraho nkibuka byinshi. Nakoze no muri Sogea-Satom Rwanda nyuma nza kubivamo kuko n’ubwo nize kubaka ntabwo nabikundaga.

Nahinduye akazi nkora ahantu henshi hatandukanye ndetse mu 2010 nubaka ku ingomero zitandukanye zirimo Mukungwa, Butaro, Gashashi n’ahandi nkorana na Hydro Power mba i Musanze, amasezerano yacu arangiye ntangira kwibaza niba ndasubira iwacu i Kigali cyangwa nkaguma i Musanze.

Mupende Ramadan yatangaje ko iyo adashora imari muri muzika yari kuba abaye nk'umugambanyi

IGIHE: Wahise wigumira i Musanze rero?

Bad Rama: Yego, nahise mfungura ibikorwa bitandukanye mu karere ka Musanze harimo iduka ryitwaga The Winners n’akabari kitwaga the Poch kanyuzemo abahanzi batandukanye bari bagezweho muri icyo gihe.

Nyuma niga ikindi kintu nakora, mu Ruhengeri nk’uko mubizi ni igicumbi cy’ubukerarugendo nagiye mpura n’abantu batandukanye barabinkundisha [umuziki nasaga nk’uwawibagiwe muri icyo gihe].

Njya muri sosiyete ikorera i Musanze y’ubukerarugendo yampaye akazi ntangira kubyiyumvamo gutyo, gusa ngezemo hagati mbona ko hari ubumenyi ntafite njya muri Uganda muri Makerere University nkora amahugurwa muri Kaminuza yaho mu gihe cy’umwaka.

Nakoze mu bigo bitandukanye by’ubukerarugendo nkajya mbika udufaranga duke, mu 2016 ndavuga nti igihe kirageze noneho ko mvanga iby’ubukerarugendo n’umuziki kubera ukuntu nawukunze kuva kera ndetse tukanawukora mu bihe byari bigoranye.

Twatangiye umuziki nyarwanda nta Radio, nta mbuga nkoranyambaga, nta studio. Nararebye nsanga ngomba kuza gutanga umusanzu kuko numvaga ntereranye urugamba twatangije naba mbaye umugambanyi.

Hari ikindi abantu batazi. Navangaga iby’ubufundi no gutegura ibitaramo bitandukanye kuko ndabyibuka nk’igitaramo cya nyuma The Ben, K8 Kavuyo, Kitoko, Meddy, Riderman na Ally Soudy nk’Umu-Mc bahuriyemo ni njye wari wagiteguye.

Icyo gihe cyabereye i Musanze nza i Kigali kubafata dukora igitaramo bambwira uko umuziki umeze nyuma y’igihe numva ngo The Ben na Meddy bagiye muri Amerika.

IGIHE: Ni ukuvuga ngo wagarutse i Kigali uje mu muziki?

Bad Rama: Nageze i Kigali, Safi wari usanzwe ari inshuti yanjye ari mu banyakiriye dutangira kuganira mubwira ko nje kuba naba Manager w’abahanzi agenda angira inama, icyo gihe yari akiri muri Urban Boyz.

Ndamubwira nti ariko mfite gahunda ahubwo reka mbanze nzenguruke ahantu hatandukanye ku Isi nkora ubushakashatsi.

Hari aho abantu bagenda bitiranya gahunda z’umuntu, buriya umuntu niwe uzi ukuri kwe n’uko yayoboye ibintu. Umuziki ni ibintu natekerejeho ndetse nkora n’ubushakashatsi.

IGIHE: Ubwo bushakashatsi wabukoreye h?

Bad Rama: Ntangira kuvuga ngo ngiye kwinjira muri ibi bintu nabanje kuzenguruka i Burayi, hari abahanzi b’Abanyarwanda bariyo mbakurikirayo kugira ngo ndebe uko bigenda n’aho babahamagara bigenda bite? Ese bakwinjiza iki? Ese umuziki wacu urakunzwe i Burayi?

Nsanga hari Guma Guma yari irimo ndayikurikirana, mbona Queen Cha, nari nsanzwe muzi nka mubyara wa Safi cyangwa undi muntu w’inshuti yanjye isanzwe.

Namubonyemo impano itangaje mbona ko nyuma y’uko yari inshuti afite ubundi buhanga ku buryo abonye umukurikirana yakora neza. Iyo Guma Guma narayikurikiranye yose.
Irangiye mvugana na Safi kuko ni we mujyanama nari mfite wa hafi, mubwira ibyo nabonye, mubwira ko nshaka gutangira kuba umujyanama w’umuhanzi arambwira ati ‘Nta mwanzuro nagufatira wowe bisaba kuba umuhanzi mugiye gukorana hari icyo wamubonyemo’ nkomeza ubushakashatsi bwanjye njya mu bitaramo bitandukanye.

Habe umuhanzi w’umunyamahanga cyangwa uwo mu Rwanda nabaga mpari.

IGIHE: Umuhanzi wa mbere mwakoranye ni inde?

Bad Rama: Njya gutangira gushaka uwo dukorana nahereye kuri Queen Cha, duhana gahunda ngo tuganire ariko ntabwo byakunze kuko yari afite gahunda nyinshi cyane ari no gukora indirimbo ye yise ‘Baby Love’. Muri icyo gihe Safi yagaragaye muri iriya ndirimbo yitwa ‘Too Much’ ahuriramo na Marina.

Nizzo nawe yari inshuti yanjye ndetse yari azi kuri icyo kintu cyo kuba umujyanama w’abahanzi nari ngiye kwinjiramo. Safi ahuye na Marina ambwira ko yabonye umuhanzi witwa Marina ufite impano.

Safi yampaye igitekerezo, Nizzo noneho we arankurura ambwira byose kuri uyu mukobwa.

Nari nziranye na Austin wakoranaga na Marina biza kunyorohera mwereka ibyo nteganya byose turumvikana mbona Marina gutyo.

Nyuma yo kubona Marina nibwo nicaye nshaka izina ryo gukoresha mu muziki. Niyiziho impuhwe no gukunda gufasha cyane. Rero ngiye mu muziki nibwo niyise Bad mu buryo bwo gufunga umwuka no gutangira urugamba rwo kwirinda amarangamutima ndangije nongeraho Rama nk’izina nari nsanganywe.

Ntibivuze ko niyise Bad kugira ngo mbangamire abantu ahubwo nashakaga kuba mubi ku muziki, mubi mu rwego rwo kuvuga ngo nyiriho nyishakamo byinshi ariko [musique] ndanayikunda. Ntabibayeho Bad nkaba Good numvaga hari uburyo bitagenda neza kuko burya izina rigufasha kuba uwo uri we.

Nakomeje akazi kanjye, igihe kigeze Safi ava muri Urban Boyz kubera ko yari inshuti yanjye duhita dutangira gukorana gutyo.

Queen Cha nawe kuko nari naramushatse kera igihe cyarageze turongera turapanga tuganira kuri gahunda zibyara inyungu za muzika aza kubyemera turakorana.

Safi Madiba yinjiye muri The Mane nyuma y'igihe kinini ari inshuti na Bad Rama

IGIHE: Washoye amafaranga angahe muri muzika?

Bad Rama: Narabanje nkora ibindi byose. Nshaka ibizamfasha mu gihe nzaba ntagiye mu muziki. Akazi k’ubukerarugendo ni keza cyane ushobora kubyuka uri umukene ukarara uri umukire.

Ni akazi gahemba neza. Nicyo kintu ntigeze nsezera, kuko nari mfite ibikorwa bitandukanye birimo ubuhinzi, ubworozi na studio ikora amafoto byose ndabireka ariko ikompanyi yanjye yo muri uyu mwuga sinigeze nyireka.

Sinjya nkunda rimwe na rimwe kuvuga ngo ntunze ibi cyangwa ibi kuko hari abantu babyuririraho bagaca imanza gusa njye nakoze ingengo y’imari mu myaka itanu kugira ndebe uko bizaba bimeze. Gusa umuziki niyo nahomba ntabwo nzawureka.

IGIHE: Mu minsi ishize wigeze kuvuga ko washoye $ 100 000 waba umaze kuyagaruza?

Bad Rama: Ntabwo ari $100 000 ahubwo ni $200 000 ariko birimo ibintu, bitandukanye birimo ibintu bifatika, Harimo Studio, camera, ibijyanye no gutunganya amajwi, imodoka twifashisha ku rubyiniro ndetse no mu kubaka abahanzi.

Iri niryo shoramari rikomeye ryabayeho mu buzima bwanjye. Inyungu ya mbere n’uko ibyo bikoresho byose bihari, abahanzi bari kuri youtube kandi nayo ubwayo yayishyura.

IGIHE: Ni izihe mpinduka ubona The Mane imaze kuzana mu muziki w’u Rwanda ?

Bad Rama: Ni nyinshi. Icya mbere niyo label ibayeho mu gihugu ishobora kureberera inyungu abahanzi batatu nta n’umwe usigaye.

Ugiye no muri Nigeria wasangayo label usanga zifite abahanzi benshi ariko bamwe batazwi. Bitandukanye na The Mane, twebwe abahanzi bacu bagendana nta n’umwe usigaye.

Haciye imyaka myinshi cyane mu Rwanda hanyura ibyamamare bitandukanye usibye nibyo ntabwo byari byoroshye kuba umuhanzi wa hano yakorana n’umuhanzi ukomeye.

Nemeranya n’umutima wanjye ko Wasafi ikomeye muri Afurika, ariko kuba The Mane yarabashije gukorana nabo indirimbo zirenze eshatu ni ikintu kitari cyarigeze kibaho mu Rwanda.

Ikiganiro kirambuye na Bad Rama

Marina, ni we muhanzi wa mbere Bad Rama yasinyishije muri The Mane Records
Uyu mugabo amaze kugira uruhare runini mu bikorwa bitandukanye bya muzika mu Rwanda
Ni umwe mu bafite ifaranga ritubutse mu bari muri muzika nyarwanda
Amaze gushora amafaranga arenga miliyoni 170 Frw mu bikorwa biteza imbere muzika nyarwanda

Zimwe mu ndirimbo zakorewe muri The Mane ya Bad Rama


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza