Babaho mu munyenga w’urukundo bakanafatanya umurimo w’Imana: Couple z’abaramyi ziririmbana zimaze kwamamara

Yanditswe na Uwiduhaye Theos
Kuya 26 Kamena 2020 saa 07:42
Yasuwe :
0 0

Kuva mu mwaka ushize, amatsinda atandukanye mu muziki wo kuramya Imana yatangiye kunguka imbaraga ziganjemo iz’ama-Couple, yashyize hanze ibihangano byakunzwe na benshi.

N’ubwo hari abari basanzwe baririmbana abenshi babikoraga gake nabwo nko mu nsengero ariko ntibabishyiremo imbaraga ngo babe batangira gushyira hanze ibihangano.

Byaje guhinduka, ku buryo uyu munsi hari benshi bari gukorana nk’itsinda mu muziki ariko na none babana nk’umugabo n’umugore. IGIHE yakusanyije Couple zitandukanye zimaze kwamamara mu muziki wo kuramya Imana ukwiye gutega amatwi uburyohe bw’ibihangano bwazo.

James & Daniella

James Rugarama na Daniella Mukiza ni imwe muri Couple zimaze gushinga imizi mu muziki wo kuramya Imana. Yamamaye mu ndirimbo zirimo ‘Mpa Amavuta’, ‘Nkoresha’ n’izindi. Baherutse no kumurika album yabo ya mbere.

Iyi couple ifitanye abana babiri, ni imwe mu yakoze umuziki ukabasha kugera ku kigero nk’icyo uyu munsi bariho. Bavuga ko kuba indirimbo zabo zamamaye cyane mu buryo bwihuse ari ubushake bw’Imana ndetse n’amasengesho yabo adasiba.

Daniella avuga ko urukundo rwabo rwatangiye gututumba mu 2008 na 2009, mu 2012 bajya kwiga muri Uganda, umugabo yiga iby’ububanyi n’amahanga mu gihe umugore icyo gihe yigaga ibaruramari. Mu 2015 nibwo barushinze.

James avuga ko ajya guhitamo Daniella ikintu yamukundiye ari uko yari umukobwa w’umutima kandi ukunda Imana cyane.

Ati “Twari inshuti cyane ntabwo navuga ko namukundiye iki ariko yari umukobwa ukunda Imana, kandi burya hari n’ukuntu uhuza n’umuntu. Natwe twarahuye biba mahwi. Byahereye cyane ko yakundaga Imana ari umuririmbyi mwiza ugasanga duhuza ibintu byose.”

Daniella we yemeza ko umugabo ari umuntu w’inyangamugayo mu buryo bukomeye ku buryo ari ikintu ashimira Imana, ikindi akaba ari umuntu uvuga biri ngombwa. Yemeza ko kumusaba ko bakundana bitamugoye cyane ko akenshi babaga bari kumwe cyane ndetse babitsanya amabanga. Ubu bafite abana babiri umuhungu n’umukobwa.

Kuba ari couple ikora umurimo w’Imana wo kuririmba, bavuga ko ari ikintu kibafasha kuko kuba bafite icyerekezo kimwe ari ikintu gihambaye ama-couple yose yakabaye yitaho cyane.

Daniella we avuga ko umuryango ukorera Imana hamwe ntaho uba uhuriye na wundi usanga buri umwe aba muri ibi undi mu bindi.

Papi Clever & Dorcas

Iyi Couple nayo imaze kwamamara cyane mu muziki wo kuramya Imana wiganjemo uw’indirimbo zo mu gitabo. Bazwi mu cyo bise ‘Morning Worship’ aho baririmba ibihangano bitandukanye byo mu gitabo bigafasha benshi.

Papi Clever yasezeranye imbere y’Imana na Ingabire ku = wa Gatandatu tariki ya 7 Ukuboza 2019 muri Dove Hotel ku Gisozi.

Ubukwe bw’aba bombi bwabaye nyuma y’icyumweru Papi Clever asabye akanakwa Ingabire mu birori byabereye mu Karere ka Musanze ku wa 30 Ugushyingo 2019. Kuri uwo munsi banasezeranye byemewe n’amategeko y’u Rwanda mu muhango wabereye mu Murenge wa Muhoza.

Isezerano ryo kubana byemewe n’Itorero rya ADEPR babarizwamo ryaheshejwe umugisha na Pasiteri Ndayizeye Isaïe, ubarizwa muri Ntora English Church Service aho Papi Clever asengera.

Manzi & Eunice

Manzi Nelson n’umugore we Irakiza Eunice basanzwe ari abaririmbyi, batangiye kuririmbana nk’umugabo n’umugore (Manzi & Eunice) ndetse kuri ubu bamaze kuririmbana indirimbo eshatu.

Manzi & Eunice bambikanye impeta mu 2017. Ubu bafitanye umwana umwe bise Iriza Tona Manzi.

Bombi ni abaririmbyi bakomeye banabarizwa mu makorali afite izina rikomeye mu Rwanda. Manzi Nelson aririmba muri Ambassadors of Christ choir ndetse ari no mu bayobozi bayo naho umugore we Irakiza Eunice ni umwe mu baririmbyi b’imena muri Epee du Salut choir yavukiye i Gitwe gusa kuri ubu ibarizwa kuri Kigali SDA Bilingual church.

Manzi & Eunice bavuga ko kuririmbana ari babiri babitewe n’uko babikunda ndetse bakaba babisanzwemo nk’abantu babiri b’abaririmbyi babana.

Ben na Chance

Aba bazwi cyane mu ndirimbo zirimo ‘Amarira ya Yohana’, ‘Yesu Arakora’ n’izindi. Uyu muryango usanzwe uri nkingi za mwamba za Alarm Ministries, bamaze imyaka icyenda bakundana mu gihe bamaze itandatu babana nk’umugabo n’umugore.

Bigeze kubwira Kiss FM ko bafashe umwanzuro wo kuririmbana nyuma yo kubona andi ma-couple abikora bikaba byiza cyane. Bati “Tumaze kubona abaramyi benshi bubakanye ingo kandi bafasha benshi barimo James na Daniella, Kavutse Olivier na Amanda, Fabrice na Maya Nzeyimana, Ben na Chance n’abandi batandukanye.”

Icyo gihe Chance yavuze ko icyatumye yegurira umutima we Ben ari uko yakunze imico ye myiza ndetse akamubonamo impano y’Imana.

Ati “ Icya mbere naramukunze, kandi nkunda imico ye, nkunda uko ateye, mubonamo impano y’Imana, mubonamo ubukirisitu biranyorohera mu buzima kubana na we.”

Chance abajijwe icyamugoye ubwo yatangiraga kubana na Ben, yavuze ko ari uburyo umugabo we yamuhaga umwanya muto kurusha gitari, ibintu byaje no gutuma batangira kuririmbana.

Kugeza ubu Ben na Chance bamaze gushyira hanze indirimbo enye mu gihe bamaze batangiye gukorera hamwe umuziki, bakaba bavuga bazakomeza gushyira hanze n’izindi.

Maya na Fabrice

Fabrice Nzeyimana n’umugore we Maya Nzeyimana nabo ni bamwe mu bazwi cyane muri iki gihe nka couple ifite ibihangano bihembura benshi byo kuramya no guhimbaza Imana.

Aba bazwi cyane mu ndirimbo nka ‘Muremyi w’Isi’. Ni abakirisitu kuri CLA (Christian Life Assembly) i Nyarutarama ndetse Fabrice ni n’umucuranzi ukomeye muri iri torero.

Bakunze gutegura umugoroba wo kuramya ubanziriza inama y’iminsi itatu yiswe ‘Over Flow Africa Conference’ itegurwa n’itsinda rikorera mu bihugu birimo Kenya, Uganda, u Burundi n’u Rwanda Heavenly Melodies Africa (aha habarizwamo Fabrice na Maya) igamije guhuriza hamwe abaramyi batandukanye mu kurushaho kwimakaza ubwami bwo guhimbaza butajegajega.

Amanda Fung na Kavutse Olivier babarizwa muri Beauty for Ashes na Prayer House

Kavutse na Amanda Fung barushinze ku ya 9 Nyakanga 2016. Ubukwe bw’umuririmbyi Kavutse Olivier na Amanda Fung babarizwa mu Itorero New Life Bible Church, bwabereye ku nkengero z’Ikiyaga cya Kivu mu Mujyi wa Rubavu mu 2016 bwitabiriwe n’abarenga igihumbi.

Kavutse Olivier na Amanda Fung beruye urukundo rwabo mu 2014, muri Gicurasi 2016 basezeranye imbere y’amategeko muri Canada, ku wa 9 Nyakanga 2016 bambikana impeta mu rusengero mu Rwanda.

Bafitanye abana babiri, barimo imfura yabo y’umuhungu bibarutse mu 2018 bahaye izina rya Jireh Reign Shi-Rong Kavutse mu mpera za Mata uyu mwaka baherutse kwibaruka umukobwa bise Jadah Justice Asante Mei-En Kavutse.

Beauty For Ashes, aba bombi babarizwamo yamenyekanye cyane mu ndirimbo ‘Surprise’, ‘Turashima’, ‘Yesu ni we Super Star’, ‘Yesu ni sawa’, ‘Hari ayandi mashimwe’, ‘Ni wowe gusa’ n’izindi ziri mu njyana ya Rock n’umudiho wa Kinyafurika.

Baherutse gutangiza iri tsinda ry’abaramyi n’abanyamasengesho ryitwa ‘Payer House’ ririmo na Kwizera Peace Ndaruhutse wabaye igisonga cya mbere cya Miss Rwanda 2016 n’abandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .