Ni weekend abanyabirori biteguye cyane ko yanahuriranye n’uwa Gatanu w’Ikiruhuko cy’Umunsi w’Umuganura ku wa 1 Kanama 2025.

Ibi ni bimwe mu birori bikomeye bitegerejwe muri iyi weekend.

Ayra Starr ategerejwe muri Giants of Africa

Ayra Starr n’abahanzi barimo Timaya, Kizz Daniel na The Ben batumiwe mu gitaramo cyo gusoza iserukiramuco rya ‘Giants of Africa’ ritegerejwe gusozwa ku wa Gatandatu tariki 2 Kanama 2025.

Ni igitaramo byitezwe ko kizabera muri BK Arena.

MTN Iwacu Muzika Festival izerekeza i Huye

Abakunzi b’umuziki b’i Huye bazaba bataramana n'abahanzi bari guca ibintu mu bitaramo bya MTN Iwacu Muzika Festival bitegerejwe kuri uyu ku wa 2 Kanama 2025.

Byitezwe ko abahanzi nka King James, Riderman, Bull Dogg, Juno Kizigenza, Nel Ngabo, Kivumbi King ndetse na Ariel Wayz ari bo bazasusurutsa abakunzi b'umuziki i Huye.

Ibirori by'abambaye umweru bizerekeza i Huye

Igitaramo cy'abambaye umweru gitegerejwe kuzabera i Huye kuri uyu wa 1 Kanama 2025, aho kizabera ahazwi nka 'City Snake lounge'.

Ibi birori bizaba biyobowe na Muyango Claudine afatanyije na Patycope, mu gihe DJ Brianne ari we uzaba avangira umuziki.

Muri Kigali Universe bazizihiza Umuganura binyuze mu muziki gakondo

Kigali Universe yateguye igitaramo cyo kwizihiza Umunsi w'Umuganura, cyahujwe n’umuziki gakondo.

Iki gitaramo gitegerejwe ku wa 3 Kanama 2025, cyatumiwemo Cyusa uzaba ari kumwe n’abarimo Alouette, Itorero Indashyikirwa n’abandi batandukanye.

Itorero Inganzo Ngari rizatarama

Itorero Inganzo Ngari ryatangiye imyiteguro y’igitaramo bise ’Tubarusha Inganji’ kizaba ku wa 1 Kanama 2025, kigamije kugaragaza uko u Rwanda rwahanganye n’ibibazo rukagera ku ntsinzi.

Byitezwe ko rizakinamo umukino ugaragaza uko u Rwanda rwagiye ruhura n’ibibazo bikomeye ariko rukabasha kubyigobotora, kikazabera muri muri Camp Kigali.

Iri torero rigiye gukora iki gitaramo rinitegura kwizihiza imyaka 20 rimaze cyane ko ryashinzwe mu 2006, ndetse mu 2009 bakora igitaramo cyabo cya mbere cyiswe ‘Inganzo twaje’.

Clapton Kibonge agiye kumurika filime nshya

Mugisha Emmanuel umaze kwamamara nka Clapton Kibonge muri sinema Nyarwanda, agiye kumurikira abakunzi ba sinema filime ye ya mbere irangira yise 'Deceiver' igaruka ku buhemu abantu bamwe bakorera bagenzi babo.

Uyu mugabo agiye kumurikira iyi filime muri ‘Century Cinema’ ku wa 1 Kanama 2025 aho buri wese wifuza kuyireba asabwa kwitwaza 5000 Frw.

Alyn Sano agiye guhurira mu gitaramo na Sir Elvis

Alyn Sano agiye guhurira mu gitaramo ‘Country Music’ n’Umunya-Kenya Sir. Elvis.

Iki gitaramo byitezwe ko kizabera ahitwa Paramount Hotel ku wa 2 Kanama 2025, aho abifuza kucyitabira bazasabwa kwishyura ibihumbi 20 Frw ku bishyuye mbere kandi yose bakayakoresha. Abandi bazishyura ibihumbi 30 Frw ku bazagurira itike ku muryango, gusa nayo bakazayakoresha.