Abanyarwenya bo mu Rwanda bigaragaje mu gitaramo cyatumiwemo Aki na Pawpaw (Amafoto&Video)

Yanditswe na Muvunyi Arsène
Kuya 15 Gashyantare 2019 saa 11:11
Yasuwe :
0 0

Abanyarwenya bo mu Rwanda batanze ibyishimo bisesuye mu gitaramo cy’urwenya cyari cyatumiwemo ibyamamare byo muri Nigeria, Aki na Pawpaw, batakoze nk’ibyo bari bitezweho.

Iki gitaramo cyabaye mu ijoro ryo kuwa 14 Gashyanyare 2019 mu ihema rinini ryo muri Kigali Conference and Exhibition Village [Camp Kigali].

Cyari cyateguwe mu rwego rwo gufasha abakundana kwizihiza umunsi wa Saint Valentin, ari ko hanamurikwa umushinga wiswe Naija-Rwanda Connect, ugamije guteza imbere sinema nyarwanda ifashijwe n’iyo muri Nigeria.

Abanyarwenya bamamaye muri filime zisetsa Aki na Pawpaw nibo bari abashyitsi b’imena, aho bafatanyije n’abandi banyarwenya bo mu Rwanda.

Ni igitaramo cyatangiye gitinze, ahanini bitewe n’ubwitabire buri hasi cyane. Saa moya mu ihema cyabereyemo harimo bake banyuranuranagamo batunganya ibitari byarangiye.

Hanze naho hari udutsiko tw’abantu bake barimo abanyarwenya bo mu Rwanda, abanyamakuru n’abandi bari bashinzwe imirimo muri iki gikorwa.

Saa mbili n’igice nibwo Uncle Austin yagiye ku kabuga, atangira kuganiriza abantu ashyiramo n’urwenya rwinshi. Yahamagaye umunyarwenya wa mbere witwa Sept, akurikirwa n’abasore babiri bari mu itsinda rya Daymakers, Japhet na 5k Etienne.

Aba basore bakunzwe muri iyi minsi kubera amashusho asekeje bakunda gushyira ku mbuga nkoranyambaga, bahaye abantu mbarwa bari aho ibyishimo bisesuye, kubera urwenya bateye ku ngingo ziyandukanye.

Biturutse ku munsi wa Saint Valentin, bavuze ku myitwarire y’abakobwa mu gihe umusore ateye ivi, amusaba ko bazabana. Ngo mu gihe abakobwa bakiri bato babambika impeta ibyishimo byabarenze ugeze mu myaka 30 we abahagaze yemye avuga ati ‘yinyambike, bari bazi ko ntazabona umugabo, Imana irigaragaje.” Byatumye abantu baseka bajya hasi.

Hakurikiyeho Joshua nawe ukunzwe n’abatari bake muri iki gihe. Urwenya rwe rwagarukaga cyane ku kugereranya abakire n’abakene cyangwa se abo mu mujyi no mu cyaro.

Yavuze uko wamenya umukobwa wagusuye niba ari umunyamujyi. ‘uwo mu mujyi iyo ashatse kujya mu bwiherero akubaza impapuro z’isuku waba utazifite ukajya kuri butiki kuzigura, ariko uwo mu cyaro arakubaza ati ‘nta Hobe ufite ko nshaka kujya mu bwiherero? Oya. None se iriya si televiziyo, mpereza igikarito wayiguriyemo.”

Uretse aba kandi hari abandi banyarwenya bakomeye nka Kibonke, Babu na Divin bagiye bashimisha abantu mu buryo butandukanye.

Aki na Pawpaw bari bategerejwe na benshi baje kugerwaho bakora agakino bize Rosa. Kagaruka ku mukobwa witwa Rosa (Pawpaw) usigara mu rugo mu gihe umubyeyi we (Aki) aba yaragiye mu rugendo, yagaruka agasanga baramuteye inda.

Icyasekeje abantu ni uburyo Pawpaw yerekanaga uburyo yakozemo imibonano mpuzabitsina.

Nyuma y’aka gakino kamaze iminota itanu, hakurikiyeho gusobanura iby’umushinga wa Naija-Rwanda Connect.

Guhera kuri uyu wa Gatanu kugera ku Cyumweru bazatanga amahugurwa yerekeranye na sinema, bakazagaruka muri Werurwe gukina filime bazahuriramo n’abanyarwanda.

Ni igitaramo cyitabiriwe n'ab'ingeri zose
Ntawatashye adasetse
Nubwo abantu bari bake cyane basetse biratinda
Aki na Pawpaw bagiye gukinira filimi mu Rwanda
Aki yakinnye ari umubyeyi wa Pawpaw
Ameza yari yateguwe bijyanye n'umunsi w'abakundanye
Babu yateye urwenya anacuranga gitari
Daymakers bateye urwenya ku bakobwa bakuze iyo bagiye kwambikwa impeta
George yavuze ko Miss Jolly Mutesi atitukuje
Iki gitaramo cyitabiriwe ku kigero cyo hasi cyane
Japhet na 5K Etienne basekeje abantu baratembagara
Kibonke yateye urwenya ku mwana we wonka ateze akaboko
Pawpaw yakinnye ari umukobwa utwite
Pawpaw yerekanye uburyo yakoze imibonano mpuzabitsina bisetsa benshi
Sept, umunyarwenya ukizamuka yigaragaje
Umunyarwenya Joshua amaze kwigarurira imitima ya benshi
Umunyarwenya Divin uzwi nka Mr Fyoo
Uncle Austin wari uyoboye ibi birori yerekanye ko na we afite impano yo gusetsa
Yerekanaga uburyo abana bo mu bakene bisukura iyo bavuye mu bwiherero

Amafoto: Muhizi Serge

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza