Abakobwa bo muri diaspora: Ishyiga ry’inyuma ku mibereho y’abasore b’abahanzi n’abandi b’ibyamamare?

Yanditswe na Uwiduhaye Theos
Kuya 16 Nzeri 2020 saa 02:19
Yasuwe :
0 0

Hambere aha ibintu bitaradogera ngo icyorezo cya Coronavirus cyugarize Isi, ababa mu mahanga bafite abakunzi babo b’ibyamamare mu Rwanda impeshyi iba yarabasanze i Kigali cyangwa i Rubavu ku mazi n’ahandi.

Bamwe mu bahanzi n’abandi b’ibyamamare baba bafite abakobwa bo hanze y’u Rwanda bafitanye urukundo rukomeye. Abakobwa b’aba-Diaspora n’ibyamamare ni nk’ipata n’urugi! Uzabibona mu mpera z’umwaka cyangwa se mu mpeshyi.

Akenshi usanga mu tubyiniro dutandukanye utubari twihagazeho muri Kigali no mu Mijyi ikomeye mu Rwanda aba bakobwa basohokana n’abasore bazwi cyane bakishimisha.

Hari n’abakundana mu buryo bw’ibanga ntibishimire ko ibyabo n’abasore bo mu Rwanda bimenyekana; rimwe na rimwe bigasandara umwe ari kwishyuza undi amafaranga yamugurije n’ibindi.

Byageze kure, umuhanzi Jack B anabikoramo indirimbo n’ubwo ateruye ngo agaragaze aho yakuye inganzo byashoboka ko ari kuri we ubwe cyangwa se ku bandi bazwi cyane mu Rwanda.

Aba bakobwa hari n’abadatinya kubita ‘Visa’ kubera ko umusore wamaze kumufatisha birangira amusanze i Bwotamasimbi ibyo kugaruka kuba mu Rwanda bikaba amateka.

Abasore b’ibyamamare bakunze kuvugwa mu nkuru z’urukundo n’abakobwa bo muri Diaspora, ariko iyo ukomoje kuri iyi nkuru mu mitwe ya benshi hazamo Safi Madiba na Nizzo kuko aribo bavuzwe cyane; mu gihe abandi usanga babikora bucece.
Safi yigeze kubwira IGIHE ko urukundo rw’iyakure rwe n’umugore we wabaga muri Canada [akaza kumusangayo n’ubwo mu minsi ishize batandukanye] undi aba mu Rwanda nta nkomyi iba irimo kuko ikoranabuhanga ryoroheje ibintu byose muri iki gihe.

Ati “Turavugana buri munsi buri kanya. Hari n’ubwo tuvugana inshuro eshanu kimwe n’uko hari ubwo tutavugana gusa bibaho ko tuvugana inshuro nyinshi cyane. Iyo urukumbuzi ruhari turavugana byaba ngombwa mfite akazi nkamubwira nti fata indege vuba vuba uze. Biroroshye ni amasaha 12 aba ageze aha.”

Safi yavuzwe cyane mu nkuru z'urukundo n'aba-Diaspora birangira akoze ubukwe na Niyonizera Judith

Abakobwa bafite amafaranga bakunda abasore bayarusha!

Umusore w’umunyamakuru utashatse ko amazina ye atangazwa, ukundana n’umwe mu bakobwa b’aba-Diaspora yabwiye IGIHE ko abakobwa bafite amafaranga menshi akenshi baba bashaka gukundana n’abasore bayarusha noneho bigahumira ku mirari iyo basanze ari umwe mu bafite izina.

Ati “Abakobwa benshi bafite ubushobozi. Mbega bafite amafaranga birangira bakundanye n’abasore bayarusha. Sinzi impamvu abakobwa bifite bazirana n’abasore bafite ubundi bushobozi. Umusore nawe icyo gihe usanga avuga ati “Ngize Imana niboneye umukobwa unkunda kandi ufite akantu ubwo se namwitesha?” Iri tangazamakuru namwe murarizi ntabwo warikora ngo uzashinge urugo.”

Ikigaragaza ko aba bakobwa baba bafite amafaranga menshi ni uburyo bafata abakunzi babo b’abahanzi cyangwa abandi b’ibyamamare.

Nka Safi na Parfine batandukana, mu bucukumbuzi IGIHE yakoze mu nshuti z’aba bombi hagaragaye ibimenyetso bihishura icyabaye gishigisha. “Ni Judithe waguriraga Safi ibintu bihenze, [Safi] akarenzaho no gukomeza gusaba Parfine amafaranga”.

Ikindi ni uko abenshi iyo bamaze gukora ubukwe iby’umuziki cyangwa ibindi bijyanye n’akazi katumaga bamenyekana, babishyira ku ruhande bakajya kurya ifaranga ry’abagore babo.

Hari ababeshya abakobwa ko babakunda, i Kigali iraha ari ryose

Gukundana n’abakobwa baba hanze y’u Rwanda kuri bamwe hari ababa babakurikiyeho ifaranga nta rukundo rundi. Mu gihe abandi baba birirwa birya bakimara bakora ijoro n’amanywa ngo bashimishe abakunzi babo.

Urugero rwa hafi ni inkuru ya Sano Olivier yasakaye ku mbuga nkoranyambaga muri Kanama 2019 aho uyu muhanzi w’indirimbo zo kuramya no guhimbaza Imana, byavugwaga ko yatandukanye n’umukunzi we Uwera Carine [Cadette] bari barashyingiranywe byemewe n’amategeko mu mezi atatu ashize.

Ibyo gupfa k’ubukwe bwabo bwari bwitezwe mu Ukuboza uwo mwaka byatangajwe baranamaze gusezerana mu mategeko.

Hari amajwi y’uyu mukobwa uba muri Leta Zunze Ubumwe za Amerika yakwirakwijwe n’abantu ku mbuga nkoranyambaga avuga uburyo yizeye uyu musore, akamuha umutima wese nyamara atazi ko amukurikiyeho imitungo.

Yumvikanaga avuga ati “Uri umuhemu, uri umutindi, nta n’aho utaniye n’abantu bicanye. Nawe uri umwicanyi kuko wishe umutima wanjye, nta na kimwe uzigera ugeraho mu buzima bwawe ngo ugire amahoro n’ubugome ukoze bungana gutyo.”

Mu ijwi ririmo ikiniga cyinshi, uyu mukobwa yumvikana yishyuza Sano imitungo ye yose yamuhaye azi ko ayihaye umugabo we.

Ati “Ibi bintu ntabwo birangirira aha. Unsubize ibyanjye naguhaye iyo mitwe mwagiye gukina, ukankoresha Umurenge w’ibinyoma.”

Muri iyi mitungo harimo imodoka n’ikibanza ngo bari baraguze ariko bikarangira akigurishije miliyoni umunani nk’uko byagaragaraga mu nyandiko y’amasezerano yari yagiranye n’uwitwa Ntakirutimana Djuma. Hari n’andi makuru yavugaga ko Sano yari yifitiye undi mukobwa mu Rwanda.

Indi mvano y’isenyuka ry’uru rugo ngo yari ukutumvikana ku ikoreshwa ry’umutungo, aho ngo Sano yagiye asaba umukunzi we amafaranga y’umurengera bakagera n’aho babipfa.

Abo bihiriye birangira bajyanywe n’abakunzi babo mu mahanga ubundi ibyo kugaruka mu Rwanda bikarangirira mu magambo.

Ni abasore benshi bari ibyamamare mu Rwanda bavuzwe mu rukundo n’abakobwa baba hanze y’igihugu bikanarangira babanye. Ingero zitangwa ni nka Bagabo Adolphe [Kamichi] wamamaye nk’umunyamakuru kuri Voice of Africa, wanabaye umuhanzi w’ikirangirire mu Rwanda.

Yerekeza muri Leta Zunze Ubumwe za Amerika mu ijoro ryo kuwa 15 rishyira 16 Mata 2014 ahagana saa sita z’ijoro. Yagiye avuga ko azagaruka ku wa 08 Kamena 2014, yemeza ko agiye gusura inshuti gusa kuva ubwo ntiyagarutse.

Muri Kamena 2018 hasakaye inkuru zigaragaza ko yasezeranye imbere y’amategeko ya Leta Zunze Ubumwe za Amerika n’umugore bari bamaze igihe babana witwa Ireen Maburuki.

Undi muhanzi ni Umutare Gabby. Yamenyakanye mu ndirimbo zirimo ‘Ntukangure’, ‘Mesa kamwe’, ‘Ntawundi’, ‘Ayo bavuga’, ‘ Urangora’ n’izindi nyinshi.

Muri Werurwe 2017 nibwo hatangiye gucicikana inkuru zivuga ko Umutare Gaby [ubusanzwe witwa Nikuze Gabriel] agiye kurongora umukobwa witwa Joyce agahita ajya gutura muri Australia.

Nyuma inkuru yabaye impamo amakuru y’ubu bukwe ajya hanze ndetse ku wa 16 Nyakanga 2017 habaho imihango yo gusaba no gukwa kuri uwo munsi bahamiriza isezerano ryabo mu itorero ry’Abadivantisiti b’umunsi wa karindwi.

Rutamu Elie Joe wari umunyamakuru ukomeye w’imikino, nawe yavuye mu Rwanda yerekeza muri Amerika muri Nyakanga 2018, asiga avuze ko agiye gukomerezayo amasomo mu ishuri ryigisha ibyerekeye gushakira isoko abakinnyi ku ruhando mpuzamahanga.

Hari n’andi makuru yavugaga ko yari asanzeyo umukobwa wari umukunzi we witwa Nyinawabeza Rebecca.

Nyuma y’igihe gito ageze muri Amerika, Rutamu yaratunguranye ashyira hanze ifoto amaze gusaba umufasha we ko barushinga. Nta gihe cyatambutsemo cyane ko bahise banakora ubukwe.

Ramjaane Niyoyita wamenyekanye nka Ramjaane Joshua Inyenyeri nawe ni umwe mu bakunzwe cyane mu rwenya ndetse no mu itangazamakuru ryo mu Rwanda kuko yanyuze mu bitangazamakuru bikomeye.

Ku wa 19 Mata 2016 yerekeje muri Leta Zunze Ubumwe za Amerika. Yavugaga ko agiye gukomereza ibikorwa bye by’urwenya muri iki gihugu.

Bivugwa ko uyu musore yagiye muri Amerika ari muri gahunda zo gukora ubukwe ariko byari bizwi n’abantu mbarwa. Mu 2017 nibwo hasakaye amakuru avuga ko we n’umukobwa witwa Gentille Umuhoza bari bamaze igihe bakundana bateganya gukora ubukwe ku wa 8 Nyakanga 2017.

Inkuru y'urukundo rwa Sano na Cadette yaciye igikuba mu itangazamakuru umwaka ushize
Kamichi yavuye mu Rwanda avuga ko agiye muri Amerika gusura abantu akazahita agaruka ariko hashize igihe mu 2018 hakwirakwira inkuru y'uko yasezeranye n'umukunzi we mu mategeko
Nzere Joyce na Umutare Gabby bakoze ubukwe bahita bajya gutura muri Australia
Ramjaane yavuye mu Rwanda avuga ko agiye gukomereza ibikorwa muri Amerika ariko yagezeyo ahita ashinga urugo
Rutamu yavuye mu Rwanda agiye kwiga birangira akoreye ubukwe muri Leta Zunze Ubumwe za Amerika
Umutare Gabby n'umugore we baherutse kwibaruka umwana wabo w'imfura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .