Abakobwa bari muri Miss Rwanda bahishuye agahinda batewe na Ingabire wavuyemo kubera uburwayi

Yanditswe na Nsengiyumva Emmy
Kuya 21 Gashyantare 2020 saa 09:57
Yasuwe :
0 0

Hagati mu mwiherero wa Miss Rwanda 2020 nibwo umwe mu bakobwa bahataniraga ikamba Ingabire Ange Jolie yasabye ubuyobozi ko yasezera mu irushanwa kuko yari yahuye n’uburwayi bwamusabaga kuba kwa muganga akitabwaho ari mu bitaro.

Tariki 17 Gashyantare 2020 nibwo ubuyobozi bwa Miss Rwanda bwatangaje ko Ingabire yavuye mu irushanwa kubera uburwayi.

Nyuma y’iminsi avuye mu irushanwa abakobwa bahataniraga ikamba rya Miss Rwanda babwiye IGIHE ko bababajwe n’uyu mugenzi wabo utarabashije gukomeza guhatana kubera impamvu z’uburwayi.

Benshi muri aba bakobwa bahishuye ko ryari ijoro ribi cyane igihe basezeraga kuri Ingabire. Bahamya ko bababajwe nuko ibyamubayeho ari impamvu zatunguranye kandi nta yandi mahitamo bari bafite.

Ikindi aba bakobwa uko ari 19 bahurizaho ni uburyo Ingabire yababaniye neza mu mwiherero ku buryo kuvamo kwe byabaye agahinda gakomeye.

Kirezi Rutaremara Brune umwe mu bahatanira ikamba rya Miss Rwanda 2020 yagize ati ”Jolie Ange sinzi uko namuvuga; aritonda, mu bantu nabonaga bashoboraga gutwara n’ikamba na we yari arimo. Kumva ko avuye mu irushanwa atari iyindi mpamvu ari uburwayi, njye ku giti cyanjye byarambabaje.”

Uyu mukobwa avuga ko bose byabababaje cyane ku buryo iyo baganira muri rusange basanga iyaba hari ikindi cyashobokaga bari kugikora ariko byarenze ubushobozi bwabo.

Teta Ndenga Nicole wiganye na Ingabire mu mashuri yisumbuye we yavuze ko yababajwe bikomeye nuko uyu mukobwa w’inshuti ye yavuye mu irushanwa.

Akaliza Hope yavuze ko Ingabire ari umukobwa wakundaga kubatera imbaraga kenshi kabone n’iyo babaga bari gukora ibintu bigoye akababwira ko we yumva ntacyo bimutwaye.

Aba bakobwa bose bababajwe no kuva mu irushanwa kwa mugenzi wabo bamusabira gukira akamera neza ariko kandi akanihanganira ibyabaye bamwibutsa ko atari ryo herezo ry’ubuzima.

Ingabire Jolie Ange yasezeye mu irushanwa nyuma yuko yari yaryinjiyemo atsindiye guhagararira Intara y’Amajyepfo.

Itike yakuye mu Ntara y’Amajyepfo niyo yamwinjije muri Pre-Selection, aha naho yahanyuranye umucyo bituma yinjira muri 20 berekeje mu mwiherero.

Uyu mukobwa yasezeye muri Miss Rwanda nyuma y’icyumweru yari amaze mu mwiherero uri kubera La Palisse Hotel i Nyamata. Kuri ubu abakobwa basigaye bahatanira ikamba bakaba ari 19.

Umukobwa uzambikwa ikamba rya Nyampinga w’u Rwanda 2020 uzasimbura Nimwiza Meghan ufite irya 2019, azamenyekana mu birori biteganyijwe kubera muri Intare Conference Arena i Rusororo mu ijoro ryo ku wa 22 Gashyantare 2020.

Ingabire Jolie Ange yari ahagarariye Intara y'Amajyepfo muri Miss Rwanda 2020
Ingabire Jolie Ange yari afite nimero 9 muri Miss Rwanda 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza