00:00:00 IGIHE NETWORK KN KINYARWANDA EN ENGLISH FR FRANCAIS

Abahanzi batanu ba mbere batunze agatubutse muri Nigeria

Yanditswe na Mahoro Vainqueur
Kuya 8 Mutarama 2023 saa 05:02
Yasuwe :

Uruganda rw’imyidagaduro muri Nigeria ni rumwe mu ziri gukura cyane ku mugabane wa Afurika, ndetse no hanze yayo.

Uko rukura ni nako abarugize binjiza amafaranga menshi, binyuze mu bikorwa bitandukanye bakora.

Aba ni abahanzi batanu bo muri Nigeria umwaka wa 2022 usize bari imbere mu binjije agatubutse, nk’uko imbuga zitandukanye zibitangaza.

Wizkid

Ayodeji Ibrahim Balogun wamamaye mu muziki nka Wizkid, umwaka wa 2022 usize abarirwa umutungo wa miliyoni 30$.

Mu 2022 uyu muhanzi yakoze ibitaramo byinshi birimo n’ibyamaze iminsi itatu yikurikiranya kandi byose byujuje inzu y’imyidagaduro ya O2 Arena, ijyamo abantu basaga 21,000.

Urubuga rwa Apple Music rugaragaza ko Wizkid ari we muhanzi wo muri Afurika wacuranzweho inshuro nyinshi mu 2022.

Mu 2022, Wizkid yishyuwe miliyoni 10$ kugira ngo ajye mu gitaramo muri Saudi Arabia cyahuriyemo imbaga y’abantu barenga ibihumbi 40.

Uyu muhanzi w’imyaka 32 afite inzu i Surulere ifite agaciro k’ibihumbi 28$, atunze imodoka enye zirimo BMW X6 crossover, Porsche Panamera, Mercedes Benz G63 AMG na Lamborghini Urus ifite agaciro k’ibihumbi 238$.

Davido

David Adedeji Adeleke wubatse izina mu muziki nka Davido, umwaka wa 2022 usize abarirwa umutungo wa miliyoni 29$.

Uyu muhanzi w’imyaka 30 ukorana Sony Records, ni umwe mu bahanzi bacuruje cyane mu 2022, dore ko yabashije no kuririmba mu birori bisoza imikino y’Igikombe cy’Isi cyabereye muri Qatar.

Mu 2022 yabaye Brand Ambassador w’imikino yo kuri internet ya GT7 Design, ahabwa amasezerano afite agaciro ka miliyoni 12£.

Davido atunze imodoka eshanu zihenze, dore ko iya make atunze ari Land Cruiser Toyota ifite agaciro k’ibihumbi 66$, mu gihe ihenze ari Rolls Royce Cullinan 2019 ifite agiciro k’ibihumbi 327$.

Don Jazzy

Micheal Collins Ajereh benshi bazi nka Don Jazzy, abarirwa umutungo wa miliyoni 25$. Atunganya umuziki akaba n’umuririmbyi ndetse na nyiri sosiyete ya Mavin records, yagize nyuma yo gutandukana na D’banj bari bafatanyije Mo’ Hits Records.

Mavin records yazamuye amazina akomeye mu muzika wa Nigeria nka Ayra Starr, Rema, Crayon, Ladipoe, Magixx, Korede Bello, Johnny Drille, n’abandi.

Don Jazzy w’imyaka 40 atunze imodoka zihenze enye harimo Bentley Continental Flying Spur ifite agaciro k’ibihumbi 219$.

Burna Boy

Damini Ebunoluwa Ogulu umaze kwamamara nka Burna Boy muri muzika, abarirwa agaciro ka miliyoni 20$.

Umwaka wa 2022 wahiriye uyu muhanzi cyane, dore ko album ’Love Damini’ iri mu zikomeje gukundwa cyane hirya no hino ku Isi kugeza n’ubu.

Spotify itangaza ko indirimbo ‘It’s Plenty’ y’uyu muhanzi iri mu zacuranzwe cyane kuri uru rubuga mu 2022.

Uyu muhanzi w’imyaka 31, mu 2022 yakoze igitaramo cyabereye mu nyubako ya Madison Square iri New York cyamwinjirije asaga miliyoni 6$.

Uyu muhanzi atunze imodoka enye zirimo Range Rover Autobiography, 2013 Ferrari 458 Italia, Rolls-Royce Dawn Convertible na 2022 Lamborghini Urus Novitec Edition ifite agaciro k’ibihumbi 399$.

2face Idibia

Innocent Ujah Idibia wamamaye nka 2Baba cyangwa 2Face, umwaka wa 2022 usize abarirwa umutungo wa miliyoni 18$.

Nubwo nta bikorwa byinshi byamuranze mu 2022, uyu muhanzi yaguze studio y’umuziki ayiha ishuri rya muzika rya Obafemi Awolowo University, riherereye muri leta ya Osun.

2Face Idibia w’imyaka 47 atunze imodoka eshatu zirimo Toyota Land Cruiser, Chevrolet Corvette Coupe na Ferrari Coupe ibarirwa agaciro k’ibihumbi 243$.

Umva hano ’2 Sugar’, imwe mu ndirimbo nshya za Wizkid

‘Stand Strong’ ni imwe mu ndirimbo nshya za Davido

‘Overloading (OVERDOSE)’ indirimbo iherutse guhuriza hamwe abahanzi babarizwa muri Mavin Records iyoborwa na Don Jazzy

‘Last Last’ imwe mu ndirimbo za Burnaboy zakunzwe cyane mu 2022

‘African Queen’,imwe mu ndirimbo z’ibihe byose kuri 2Face


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .