00:00:00 IGIHE NETWORK KN KINYARWANDA EN ENGLISH FR FRANCAIS

Abahanzi 20 bazahora bibukwa mu mateka y’igisekuru cya nyuma ya Jenoside mu muziki w’u Rwanda (Igice cya mbere)

Yanditswe na Uwiduhaye Theos
Kuya 5 June 2022 saa 09:13
Yasuwe :

Mu ndirimbo ya nyakwigendera Jay Polly yumvikana aririmba ati “Amateka ni amateka njya nibuka bya bihe, abo ba Saida Karoli, Ragaddy na Kanyomozi barafashe umujyi!” Aha yumvikanishaga ko hari ibihe bya Nyuma ya Jenoside yakorewe abatutsi mu 1994 abahanzi bo hanze y’u Rwanda bageze aho bakigarurira imitima ya benshi mu muzika nyarwanda.

Ntabwo ari uko mu Rwanda nta banyempano bari bahari ahubwo benshi bakiri kwiyubaka no kwisuganya. Igihe cyarageze birigaragaza nk’uko uyu muhanzi yabiririmbye abahanzi benshi batangira kwiganza mu muziki nyarwanda ndetse iyi miziki yari yarafashe igihugu itangira kuburizwamo.

IGIHE yakoze urutonde rwa bamwe mu bari ku ruhembe rw’umuziki w’u Rwanda kuva mu myaka irenga 10 ishize. Benshi bafashe iya mbere mu gukora injyana zitari zitamenyerewe mu gihugu.

Aba bahanzi barimo ab’igitsinagore binjiye mu muziki mu bihe bigoye ndetse n’abandi bagiye baza bakora injyana nka Hip Hop, itari isanzwe bagatuma abantu bayikunda ndetse bagatera benshi imbaraga zo kuyikora.

Urutonde rwakozwe hagendewe ku bitekerezo by’abanyamakuru ba IGIHE ndetse rwakozwe nta kindi kigendeweho kidasanzwe uretse kuba umuhanzi yarahirimbaniye umuziki. Abahanzi bashobora kuba ari benshi bakoze byinshi byiza mu myaka ishize ku buryo mu minsi iri imbere hakorwa indi nkuru igaragaza abandi nk’aba tugiye kubona muri iyi nkuru.

Senderi

Ubu uyu muhanzi yitwa Eric Senderi Nzaramba, yavukiye mu Ntara y’I Burasirazuba mu Karere ka Kirehe, Umurenge wa Nyarubuye, Akagari ka Nyarutunga ubu atuye mu mujyi wa Kigali.

Uyu mugabo yavutse tariki 15 Werurwe 1977, mu muryango w’abana icyenda. Yigeze kubwira IGIHE ko yinjiye mu muziki nyuma yo kuba mu itorero.

Ati “Ninjiye ubuhanzi kera nkiri mu itorero ry’aho twari dutuye hitwa Nyarutunga. Twayoborwaga n’umugabo witwa rwabizankwaya n’uwitwa Masasu. Ariko abo bose baje gupfa mu 1994. Nakomeje kugendera kubyo natojwe n’abo bagabo mu buhanzi birimo ubuhanga bari bafite ndetse nkabuvangamo n’ubwo nanjye nari nifitemo. Ni nanjye wayoboraga abo twari turi kumwe n’ubwo nari nkiri umwana bwose.”

Gushyushya bagenzi be ubwo yari ari mu gisikare avuga ko biri mu byamufashije mu muziki. Aza kuvamo atangira guhimba indirimbo zivuga kuri Jenoside yakorewe abatutsi mu 1994 nk’iyitwa Intimba y’Intore z’Imana, Humura ntibizongera, Nyarubuye Iwacu, Twigirire Icyizere n’izindi nyinshi.

Nyuma yakoze indirimbo zivuga ku buzima busanzwe, nka Abanyarwanda Twaribohoye, Abasore Bariho Nta Cash, Reka Jarousie, Ndanyuzwe, Sofia, Umunyana, Kora, Abareyo, APR Fc, Sukura Umujyi, Stop Nyakatsi, Cyusa n’izindi.

Senderi ari mu bahanzi bafite ibigwi mu muziki nyarwanda bakanyujijeho mu bihe byo hambere

Makonikoshwa

Makonikoshwa, ni izina rifite ibigwi mu muziki w’u Rwanda kuva mu myaka yo hambere. Uyu muhanzi yatangiriye umuziki muri Uganda mu 2004 aza kwimukira mu Rwanda aho yakomokaga ariko atarahakuriye.

Makonikoshwa yavukiye muri Uganda aba ari naho akurira. Ku bw’amateka mabi yahagiriye uyu muhanzi ntabwo yabashije kwiga amashuri yisumbuye ngo ayarangize kuko yapfushije ababyeyi akiri muto.

Mu kiganiro kirambuye yagiranye na IGIHE mu minsi ishize, yavuze ko ubuzima bwatangiye kumusharirira mu buto bwe nyuma y’urupfu rwa se.

Makonikoshwa nyuma y’uko ubuzima bw’ishuri bwanze yatangiye kubaho mu bushaririye, yaje kwimukira Kampala aho yanatangiriye gukina umupira nyuma aza kuririmba. Uyu muhanzi avuga ko yagiye mu muziki aherekeje umusore w’inshuti ye wavaga mu muryango w’abakire.

Uwari waherekejwe kuririmba neza byaramunaniye bituma Makonikoshwa amufasha muri studio, byaje kurangira ubuhanga yagaragaje butumye bashwana.

Ati "Kuririmba bimunaniye producer ansaba ko namufasha nkaririmba agasubiramo, uyu musore yababajwe n’ukuntu arutishijwe Makonikoshwa arikubura aragenda biha amahirwe uyu Munyarwanda wabaga muri Uganda.”

Uyu mugabo yatangiye kujya acuranga mu kabyiniro kamwe kabagamo Abanyarwanda, aha yahahuriye n’umusore witwaga Kayibanda wari n’umunyamakuru amusaba ko bakorana indirimbo “Mariya Rose”.

Bari gukorana iyi ndirimbo nyiri studio yamusabye ko yakora album y’indirimbo esheshatu z’ubuntu, yakoze "Christmas", "Bonne Année", "Agaseko", "Nkunda kuragira" n’izindi zinyuranye zakunzwe cyane.

Mu 2006 Makonikoshwa yahamagawe na KNC wari wamutumiye mu gitaramo anamwishyura neza, iki gihe ngo yahakoze akazi abantu bamwereka urukundo rukomeye.

Nyuma Makonikoshwa yigiriye inama yo gutaha ngo akorere umuziki mu Rwanda ndetse anahashinga studio. Ntabwo byamuhiriye kuko ibyuma bya studio ye byaje kwibwa bituma umugambi we usa n’usubiye inyuma asubira muri Uganda.

Izina rye ryari ryakuze cyane muri Uganda gusa atatumirwa mu bitaramo ibyo aribyo byose uretse iby’Abanyarwanda. Makonikoshwa yaje gufata icyemezo cyo gutaha ava muri iki gihugu cy’igituranyi yimukira mu Rwanda gutyo mu 2008 nubwo mbere yaho yakunze gukorera ibitaramo ku butaka bw’u Rwanda.

Uyu mugabo yamenyekanye mu ndirimbo zirimo “Nkunda kuragira”, “Mujyane”, “Agaseko” n’izindi nyinshi.

Makonikoshwa yabaye umuhanzi ukomeye kubera ibihangano binyura benshi yahimbye mu bihe byo hambere

MC Mahoniboni

Amazina asanzwe yitwa Bienvenue Mahoro Ruhungande. Avuka mu muryango w’abakobwa babiri n’abahungu babiri. Afite imyaka 40.

Mc Mahoniboni ari mu bahanzi ba mbere bakundishije Abanyarwanda injyana ya Hip-Hop, mu gihe mu Rwanda humvikanaga cyane abahanzi nka Cassanova na DMS.

Yatangiye gushyira hanze ibihangano bye mu 1997. Mu 1999 yasohoye indirimbo yise ‘Malariya ni Indwara y’Icyorezo kandi Yica’. Iyi ndirimbo yanakoreshejwe na Minisiteri y’Ubuzima muri gahunda yo kurwanya Malariya mu 2000.

Indirimbo zatumye arushaho kumvikana no kumenyekana cyane mu Rwanda ni ‘Dusenge’, ‘Kubaka Izina’, ‘Twitabire Imirimo’. Izo ndirimbo akaba yarahise azishyirana hanze n’izindi umunani zari kuri album yise “Ubutumwa" zatumye yamamamara mu Rwanda.

Mu 2009, uyu muhanzi yaje kwerekeza mu Buholande.

Mahoniboni ari mu bahanzi bahumuye amaso abaraperi ko Hip Hop ishobora gukundwa baramutse bayikoze

The Brothers

Ni itsinda ryamenyekanye cyane mu muziki w’u Rwanda. Ryari rigizwe na Victor Fidele[Koudou], Danny Vumbi na Zigg 55.

Ryatangiye kuririmba mu 2004 ubwo bari bakiri babiri gusa, Danny na Victor Fidele. Ziggy yaje kwinjiramo mu 2006.

Kugira ngo iri tsinda rivuke, umuhanzi Victor Fidele yahuriye na Danny Vumbi muri kaminuza y’u Rwanda ishami ry’uburezi rizwi nka KIE n’uko yumva aririmba neza biyemeza gutangirana urugendo rw’ubuhanzi.

Iri zina baryiyise babikomoye ku rugero rubi u Rwanda rwanyuzemo nuko biyemeza kubaho bitwa abavandimwe. Danny Vumbi yigeze kubwira IGIHE ko iri zina barikomoye ku mateka y’u Rwanda, ati ”Nyuma ya Jenoside yakorewe abatutsi mu Rwanda twabonye nta kindi gishobora kubafasha uretse kubana nk’abavandimwe nuko twiyita The Brothers”.

Iri tsinda ryatwaye igihembo bitandukanye birimo icya cya Never Again 2004, PAM Awards 2006, Salax Awards 2008, Ijoro ry’Urukundo Awards 2009 na East African Music Awards 2011 n’ibindi.

Iri tsinda ryamenyekanye mu ndirimbo zirimo ‘Ikirori’, ‘Yambi’, ‘Nyemerera’, ‘Nagutura iki ?’ n’izindi. Iri tsinda ryatandukanye mu 2013.

The Brothers yari igizwe na Victor Fidele[Koudou] uri iburyo , Danny Vumbi uri imbere na Zigg 55

Miss Jojo

Ubusanzwe yitwa Uwineza Josiane. Yamenyekanye mu ndirimbo zitandukanye zirimo ‘Respect’, ‘Beletlide’, ‘Tukabyine’ yakoranye na Rafiki, ‘Nganirira’, ‘Inshuti’ n’izindi nyinshi.

Ni umwe mu bakobwa bafashe iya mbere mu muziki nyarwanda wari ukiri kuzahuka nyuma ya Jenoside yakorewe Abatutsi ndetse abahanzi bamwe bari ibihangange barahitanywe nayo.

Ubusanzwe yavukiye mu Bugesera mu 1982. Yatangiye kumenyekana mu 2007 mu gihe ariwe mukobwa wari imbere mu bo gisekuru yajemo. Yarakunzwe karahava ndetse anatuma abakobwa bamwe bamukurikiye mu muziki batinyutse bakawinjiramo. Ubu ntabwo akibarizwa mu muziki.

Miss Jojo ni umwe mu bahanzikazi bagize igikundiro mu myaka yashize ndetse uri no mu batinyuye benshi mu gisekuru cya nyuma ya Jenoside

Mani Martin

Mani Martin afatwa nk’umwe mu bahanzi b’abahanga u Rwanda rufite ubu. Uyu muhanzi mu myandikire ye yibanda ku rukundo ndetse no gukangurira abantu kugira ubumwe n’amahoro.

Mani Martin asanzwe afite izindi album eshanu ziriho indirimbo ziganjemo izakunzwe, Isaha ya 9 yasohotse mu 2007, Intero y’amahoro (2011) n’iyitwa My Destiny yagiye hanze mu 2012.

Album aheruka gushyira hanze ni iyo yise ‘AFRO’ igizwe n’indirimbo 15 yahanze agendeye ku bitekerezo yasomye mu ibaruwa Patrice Lumumba yandikiye umugore we amubwira ko Afurika izagera igihe ikiyandikira amateka yayo uko ari.

Mu rukurikirane rw’indirimbo zigize album ya Mani Martin hariho iyitwa Afurika Ndota, Mwarimu, Karibagiza, Kinyaga, Afro, Ndaraye, Iyizire, Chalala, Sogea, Rubanda, Baba ni nani, Umumararungu, Akagezi ka Mushoroza, Serafina, Same room n’izindi.

Mani Martin yatangiye umuziki akiri umwana muto aririmba indirimbo zihimbaza Imana.

Mani Martin ari mu bahanzi bamaze igihe kinini muri muzika nyarwanda

Cassanova

Cassa Manzi wamenyekanye nka Daddy Cassanova ni umwe mu bahanzi bashyize itafari rikomeye ku muziki w’u Rwanda mu bihe bya nyuma ya Jenoside yakorewe Abatutsi mu 1994.

Uyu muhanzi yatangiye umuziki mu 1998 ari umubyinnyi mu itsinda rya Cool Family. Ubwo ryatandukanaga mu 2006 yahise atangira kuririmba ku giti cye nk’umuhanzi wigenga.

Uyu muhanzi yamenyekanye mu ndirimbo nka ‘My dance Floor’, ‘Ihorere’, ‘Imyaka itatu’ yatumye izina rye ritumbagira, ‘Ishiraniro’ ya Phocas Fashaho yasubiyemo n’izindi. Uyu muhanzi ubu aba muri Canada.

Cassanova ni umwe mu bahanzi babimburiye abandi muri muzika nyarwanda

Kode (Faysal)

Ngeruka Fayçal wahisemo kwiyita Kode ukorera umuziki mu Bubiligi, ni umwe mu bahanzi bamamaye mu muziki nyarwanda mu myaka yo hambere nawe akaba umwe mu bafashe iya mbere mu kuwuteza imbere mu bihe byari bigoye.

Uyu muhanzi ni umwe mu bamamaye cyane mu Rwanda mu muziki mu myaka irenga icumi ishize. Yaririmbye indirimbo zitandukanye zakunzwe ‘Impeta’ yabaye n’ikirango kuri we, ‘Ikirungo’, ‘Ese uzabyihanganira’, ‘Igikomere’, ‘Sinzahinduka’ yakoranye na Urban Boyz n’izindi.

Yakoze indirimbo nyinshi zitandukanye zatumye ubuhanga bwe bushimwa na benshi ndetse zirakundwa ku buryo buhambaye zinatuma anitabira amarushanwa atandukanye mpuzamahanga arimo ‘Imagine Afrika’ na ‘Idols 2007’.

Kode ni umwe mu bahanzi banditse izina rikomeye mu Rwanda kubera ijwi rihogoza benshi

KGB

Iri tsinda ryamenyekanye mu Rwanda mu myaka yo hambere nka Kigali Boyz mu mpine bikaba KGB. Ryari rigizwe n’abasore batatu barimo Mr Skizzy, Hirwa Henry witabye Imana mu 2012 na Manzi Yvan Pitchou [MYP].

KGB yatangiye mu 2004 yamenyekanye mu ndirimbo zirimo Arasharamye, Abakobwa b’i Kigali, Byasaze n’izindi.

KGB yanditse amateka muri muzika nyarwanda

Nirere Shanel

Ubusanzwe yitwa Ruth Nirere Shanel ari yamenyekanye nka Miss Shanel, ni umwe mu bahanzi bakomeye bagize uruhare rukomeye mu muziki nyarwanda by’umwihariko nk’igitsinagore.

Asanzwe afatanya umuziki no gukina filime, yakunzwe cyane muri filme zirimo ‘Le Jour Où Dieu est Parti en Voyage (The Day God Walked Away) yasohotse mu 2008 hamwe , The Mercy of the Jungle yagiye hanze mu 2018 na Long Coat yo mu 2009.

Uyu muhanzikazi w’imyaka 36 yatangiye umuziki mu 1998. Yatangiye kumenyekana mu 2004 aba umwe mu bakobwa babimburiye abandi nyuma ya Jenoside ndetse aranahirwa muri muzika.

Yamenyekanye mu bihangano bitandukanye birimo “Ndarota”, “Nakutaka” yakoranye Wyre wo muri Kenya, “Ubufindo”, “Ndagukunda Byahebuje” n’izindi nyinshi.

Miss Shanel ari mu bakobwa batinyutse gukora umuziki mu bihe bigoye

DMS

Amazina ye asanzwe ni Muhire Tembwe Christian yamenyekanye nka DMS muri muziki nyarwanda. Azwiho kuba umwe mu bafashe iya mbere ,mu gukundisha abanyarwanda injyana ya Hip Hop.

DMS yatangiye kugaragaza impano yo kuririmba ubwo yari afite imyaka umunani gusa, mu 2003 aba aribwo atangira gushyira hanze bitandukanye. Yaririmbaga cyane mu rurimi rw’Icyongereza.

Mu 2005 ni umwe mu bahanzi bakoranaga na BZB muri TFP, mu 2007 yashyize hanze album ye ya mbere. Nyuma y’imyaka ibiri yagiranye amasezerano na Barrick Music aba ari nawe umufasha gushyira hanze album yise “Live & Love” yamuritse mu Ukuboza 2011 iyi album yaje ikurikira iyo yashyize hanze mu 2007 yise “Peace”.

DMS yamenyekanye mu ndirimbo zirimo “Kigali City”, “Yego” , “To the Lost ones”, “Bari hehe?”, “It’s over” yakoranye na Cassa Manzi n’izindi.

Rafiki

Rafiki Mazimpaka azwi cyane mu njyana yihariye ya ’Coga Style’ ku izina rye ry’ubuhanzi ’Rafiki’, yavutse mu 1984 , avukira muri Repubulika Iharanira Demokarasi ya Congo. Ni imfura mu muryango w’abana batanu, ni Umunyarwanda.

Amashuri abanza yayize i Goma muri RD Congo, ayisumbuye ayiga muri CGFK (College George Fox de Kagarama). Yatangiye muzika kera kuko aho yigaga mu mashuri yisumbuye aho yabaga muri Korali y’ikigo, nyuma mu 2002 ayivamo ajya mu itsinda ryo kubyina ryitwaga ‘Hot Side’ yari ahuriyemo na Kamichi, Platini, Prince Kidd na Bad Rama.

Muri iyo minsi, nibwo yahuye na Producer Jay P amukorera indirimbo ya mbere yitwa ‘Igipende’ yasohotse mu mpera za 2004, nyuma y’aho haza ‘Igikosi’, n’izindi n’izindi yagiye akora agitangira umuziki zikamwubakira izina mu Rwanda.

Uyu muhanzi yazanye umwihariko w’injyana ya "Coga Style" yumvikanamo ururimi rw’Ikinyarwanda ruvugwa na benshi mu batuye mu Majyaruguru y’u Rwanda nk’umwihariko.

Iyi njyana ya "Coga" yagereranywa na (Kinyarwanda Dancehall) yazanywe n’uyu muhanzi, bituma bamutazira "Umwami wa Coga Style".

Rafiki yasohoye album ye ya mbere yitwa "Ica Mbere" kuwa 4 Ukwakira 2008, yari igizwe n’indirimbo 12 zose ziririmbwe mu njyana ya Coga yanyuze benshi mu Banyarwanda.

Rafiki wakuze akunda injyana ya Reggae na Lumba mu bahanzi yakoranye nabo harimo Miss Jojo, Miss Shanel, Professor Jay, Dr. Jose Chamelone, Washington, Youth Wave, Dream Boyz n’abandi.

Mu bihembo yatwaye harimo Pama Award (Pan African Music Awards) inshuro ebyiri mu 2007 na 2008 muri Uganda. Yitabiriye kandi irushanwa rya Primus Guma Guma Superstar mu Rwanda mu bihe bitandukanye gusa ntiyabasha kwegukana iki gikombe.

Rafiki ni umwe mu bahanzi bagacishijeho muri muzika nyarwanda binyuze mu njyana ya 'Coga Style'

Tom Close

Uyu nawe ni umwe mu bahanzi bo mu gisekuru cya Nyuma ya Jenoside bubatse amateka mu muziki nyarwanda. Ubusanzwe amazina ye ni Muyombo Thimas yavutse mu 1984.

Tom Close yavukiye muri Uganda aba ariho yiga amashuri abanza. Nyuma yaho ababyeyi be bimukiye mu Rwanda yize amashuri yisumbuye muri Kiziguro ndetse na Lycée de Kigali.

Uyu muhanzi yasoje kaminuza mu 2013 mu ishami ry’ubuganga.

Mu 2005 nibwo uyu muhanzi yatangiye umuziki ubwo we n’inshuti ze bashinze itsinda bise ‘Afro-Saints’ bakoze indirimbo mu myaka ya 2006 na 2007 ntizakundwa.

Mu 2007 uyu muhanzi yahisemo kwikorera indirimbo ku giti cye yise “Mbwira” yakunzwe akurikizaho album yise “Kuki” yariho indirimbo ze zakunzwe. Indirimbo zazamuye izina rya Tom Close zirimo ’Si beza’, ’Ntibanyurwa’, ’Komeza Utsinde’, ’Sinari nkuzi’ n’izindi.

Tom Close ni umwe mu bahanzi bagize uruhare mu guteza imbere umuziki

Riderman

Ubusanzwe yitwa Emery Gatsinzi ni umwe mu baraperi babaye inkomarume. Riderman yavutse mu 1987 akaba imfura mu bana batanu. Uyu muhanzi yavukiye mu muryango wa gikirisitu ndetse umubyeyi we na mushiki we bose bari abaririmbyi b’indirimbo zihimbaza Imana.

Riderman nawe yakundaga kubiyungaho bakaririmbana mbere yo kuryama. Uyu muhanzi yiyumvagamo ubusizi ndetse n’umuziki nyuma yo kwitabira igitaramo cya Lucky Dube cyabaye mu 2003 kuri Stade Amahoro yahisemo guhuza ibi byombi.

Mu 2006 yatangije itsinda rya UTP Soldiers yari ahuriyemo na Neg G The General ndetse MIM nyuma aza gutandukana na bagenzi be. Uyu muhanzi yahise atangira kuririmba ku giti cye.

Mu 2009 yashyize hanze album ye ya mbere. Mu bwana bwe Riderman yakundaga abahanzi barimo Jean-Christopher Matata, Benjamin Rutabana na Kidumu. Nyuma yaje kwiyumvamo abaraperi nka Tupac Amaru Shakur, 50 Cent na Lil Wayne.

Yahuriye ku rubyiniro n’abahanzi mpuzamahanga batandukanye barimo Sean Paul, Lauryn Hill, Mr Flavour, Elephant Man, Koffi Olomide, Brick and Lace, Sean Kingston, D’banj, Shaggy n’abandi.

Umva “Get Down”, indirimbo Riderman yakoze akiri muri UTP

Inkuba imwe mu ndirimbo Riderman yamenyekaniyeho

Riderman amaze igihe kinini mu muziki nyarwanda ndetse ari mu baraperi bakoze Hip Hop mu bihe byari bigoye

Tuff Gangz

Ni itsinda ryamenyekanye mu muziki nyarwanda cyane cyane Hip hop. Ni ryo tsinda ryashinze ibirindiro by’umwihariko riririmba iyi njyana. Ryari rigizwe n’abarimo Jay Polly witabye Imana umwaka ushize, P Fla, Bulldogg, Green P na Fireman.

Iri tsinda ryatangiye kumenyekana cyane mu 2008 biturutse ku ndirimbo yaryo yiswe ‘Kwicuma’ nyuma yayo ryagiye rikora izindi ndirimbo nyinshi nazo zakunzwe.

P Fla wari mu bari abaraperi ngenderwaho muri Tuff Gangs ariko wakunze guhora mu mahari na bagenzi be, akenshi mu itsinda hagahora umwiryane wanatumye bamwereka umuryango.

Yatandukanye na Tuff Gangs muri Mutarama 2012, icyo gihe yahise ashinga itsinda yise “Imperial Mind State”, yaje guhinduka "Imperial Mafia Land" aho yari ari kumwe na El Poeta bari baranabyaranye.

Mu 2015 benshi batunguwe no kumva inkuru yavugaga ko Jay Polly yatandukanye na bagenzi be ndetse agahita yinjiza amatwara mashya mu itsinda akanashyiramo amaraso mashya.

Tuff Gangs ya Jay Polly yari irimo Khalifan, Romeo na Young T bahoze mu itsinda rya Home Boyz; mu ndirimbo ya mbere bakoze bise ‘Wiyita Iki?’ batangiranye amashagaga bereka abari bagize Tuff Gangs ya mbere ko nta buhangange bari bafite bwatuma bigira ibyatwa. Bulldogg, Fireman na Green P nabo bahise bashinga itsinda bise Stone Church bahise bongeramo na Nick Breezy.

Icyo gihe Stone Church yakoze indirimbo zitandukanye zirimo ‘Imirimo’, ‘Ndakuzi’ na ‘Ndi Iniga’. Tuff Gangs basubiranye mu 2017, muri East African Party 2018 bigaragariza abakunzi babo. Cyari igitaramo cyo gutangiza umwaka.

Kuva basubirana bakoranye indirimbo imwe bise ‘For Someone’. Mu minsi ishize mu bihe bya Coronavirus aba bahanzi bakoranye ibitaramo byashimishije benshi.

Tuff Gangz yagacishijeho muri muzika nyarwanda. Jay Polly wa kabiri uhereye imbere ibumoso uri mu bayitangije yitabye Imana umwaka ushize

The Ben

Mugisha Ben, uzwi ku izina rya The Ben yavutse ku itariki ya 9 Mutarama 1988. Yavukiye i Kampala muri Uganda. The Ben ni umuhanzi nyarwanda uririmba injyana ya RnB/Pop.

Ni uwa kabiri mu muryango w’abana batandatu barimo nka Danny (nawe w’umuhanzi n’ubwo atigeze amenyekana mu Rwanda), Green P uzwi muri Tuff Gangz.

Iby’ubuhanzi The Ben yabihereye mu muryango aho yakuze akundishwa n’ababyeyi be gusenga cyane. Byatumye ajya muri Korali aho yari ari kumwe n’abandi bahanzi bamenyekanye nka Meddy, Lick Lick na Nicolas.

Uyu muhanzi atangira umuziki yabaga ari mu mutaka wa Tom Close gusa mu myaka ya 2008 nawe atangira kumenyekana. Icyo gihe atangira umuziki yamenyekanye mu ndirimbo nka “Amaso ku Maso”, “Amahirwe ya nyuma” n’izindi nyinshi zamenyekanye cyane yari yararirimbiyemo Tom Close nka ‘Si beza’ na ‘Mbwira’.

Yaje gukora indirimbo nka Uzaba Uza (yaririmbanye na Roger), Wirira, Imfubyi, Wigenda, Uri he, Sinzibagirwa, Zoubeda, Ese Nibyo n’izindi. The Ben ni umwe mu bahanzi bambukiranyije ikinyecumi bagifite igikundiro cyane n’ubu indirimbo zigakundwa. Aheruka gushyira hanze iyo yise ‘Why’ yakoranye na Diamond Platnumz.

The Ben ari mu bagize uruhare mu guteza imbere injyana ya RnB mu Rwanda

Meddy

Ubusanzwe yitwa Ngabo Médard Jobert. Yamenyekanye cyane mu muziki nyarwanda nka Meddy. Uyu muhanzi yavutse ku wa 7 Kanama 1989 mu Burundi. Meddy aririmba RnB n Pop. Yamenyekanye mu myaka ya 2008 mu ndirimbo nka "Amayobera", "Akaramata", "Ubuntu", "Ese Urambona" n’izindi.

Meddy yatangiye aririmba mu rusengero ndetse indirimbo ye ya mbere yari ihimbaza Imana. Iyi yayise ‘Ungirira ubuntu’.

Meddy mu 2010 yavuye mu Rwanda we na The Ben mu gitaramo bari batumiwemo n’umuryango w’abanyarwanda baba muri Amerika ntibagaruka.

Nawe mu gihe cy’imyaka irenga icumi uyu muhanzi amaze akora umuziki aracyakunzwe ni n’umwe mu birahirwa kubera ibihe yatangiriyemo umuziki na bagenzi be ntacike intege. Yigeze kubwira IGIHE ko yigeze kumva yava mu muziki nyuma yo gutegura igitaramo kikazamo abantu 20.

Ati “Nakoze igitaramo ngira ngo kizamo abantu 15 cyangwa 20, nacitse intege cyane. Icyo gihe nigaga muri La Colombière mu wa Gatandatu dusoza amashuri yisumbuye. Kuri njyewe iyo ndebye uwo munsi ibyo natekerezaga naho ndi mpita mbona ko mu buzima ikibi ari ugucika intege. Sinigeze na rimwe ntekereza kuzagera ku rwego ndiho uyu munsi mu muziki kubera iryo joro rimwe.”

Meddy ari mu bahanzi bateje imbere umuziki nyarwanda mu buryo bugararira buri wese. Afite umwihariko wo kuba indirimbo ze zirebwa cyane ndetse 'Slowly' imaze kurebwa n'abasaga miliyoni 67

Urban Boyz

Itsinda rya Urban Boyz ni rimwe mu matsinda yakanyujijeho mu muziki nyarwanda. Naryo umuntu avuze ko riri mu ya mbere yabayeho ntabwo yaba abeshya. Ryatangiriye i Butare rigizwe n’abantu batanu barimo uwitwaga Lino G, Safi Madiba, Humble Jizzo, Nizzo n’undi mugenzi wabo umwe.

Urban Boyz yamenyekanye mu ndirimbo nka ‘Sindi indyarya’ na ‘Icyicaro’ ndetse ziri mu zatumye izina ryayo rigwiza igikundiro. Nyuma Lino G yavuyemo basigara ari batatu ndetse baza no kwimukira mu Mujyi wa Kigali kuhakorera umuziki.

Iri tsinda ryagize igikundiro mu muziki nyarwanda. Ryamenyekanye nka rimwe mu matsina yagiye yijajara agakorana n’abahanzi bakomeye muri Nigeria cyane ko bakoranye na Timaya na Iyanya.

Mu 2017 Safi yavuye mu itsinda ajya kuba umuhanzi ku giti cye asiga bagenzi be. Ubu Urban Boyz isa nk’iyabaye amateka kuko gihangano iheruka.

Urban Boyz ni itsinda ryakanyujijeho , ubu risa niryasenyutse burundu

Dream Boyz

Dream Boyz ni itsinda ryaririmbaga injyana ya R’n B ndetse na Afrobeat ryari rigizwe na Platini na TMC.

Platini ubundi yitwa Nemeye Platini akaba yaravutse muri nzeli 1988 I Bukavu kuko niho ababyeyi be bari barabaye bahamaze igihe kirekire.

Nyuma yaho yaje gutahuka cyimwe n’abandi banyarwanda bose atangira amashuli ye abanza abiri yayize muri Congo, akomereza kuri ecole primaire ya Nyanza ya Kicukiro , icyiciro rusange cy’amashuli yagikomereje kuri ecole secondaire de Gasange I Byumba, akomereza mu rwunge rw’amashuli rwa leta I Butare. Yaje gukomereza muri kaminuza nkuru y’U Rwanda mu ishami ry’itangazamakuru.

Platini akiri umwana yaririmbaga muri cholare aza kuhava atangira gukora muzika ye.

Mujyanama Claude uzwi nka TMC ni undi musore wabarizwaga mu itsinda rya Dream Boyz, TMC yabonye izuba kuri 25 nzeli 1988 I Bukavu muri Congo. Yaje gutahuka muri 1994 atangira amashuli ye abanza kuri Ecole Primaire de Kicukiro aza gukomereza amashuli ye yisumbuye kuri ecole secondaire de Kicukiro yaje gundinduka E.T.O Kicukiro.

TMC yaje gukomereza amashuli ye mu rwunge rw’amashuli i Butare mu ishami ry’imibare n’ubugenge, akomereza muri KIST. TMC akiri muto yakundaga kumva indirimbo zo muri Tanzaniya cyane cyane umuhanzi Mr. Nice bituma akura yiyumvamo umuziki.

Mu 2000 nibwo yavuye muri chlorale yaririmbagamo. Mu mwaka wa 2007 arangije amashuli yisumbuye nibwo yakoze indirimbo ya mbere.

Mu 2008,Platini acyirangiza amashuli yisumbuye yahuye na TMC bari bariganye I Butare mu mashuli ndetse ko bari banaturanye byatumye bakora itsinda baryita Dream Boyz.

Muri uwo mwaka nibwo barebye Lick Lick atangira kubakorera.

Dream Boyz yamenyekanye mu ndirimbo yitwa Nirizingua yo mu njyana ya bongo irakundwa, ariko iyatumye Deam Boyz ikundwa ikanamenyekana cyane ni “Magorwa”. Nyuma yaho dream Boyz yakoze izindi ndirimbo nyinshi zivugisha abantu menshi nka ‘Si inzika’ n’izindi nyinshi.

Mu 2019 aba basore bafashe wo gutandukana. Ubu buri wese akora umuziki ku giti cye.

Aba basore bagize uruhare rukomeye mu muziki nyarwanda, kugeza ubu Dream Boys ntikiri itsinda rya muzika kuko buri wese yatangiye urugendo rwo gukora umuziki ku giti cye

Oda Paccy

Ubusanzwe yitwa Uzamberumwana Oda Paccy ariko yaje mu muziki akoresha izina rya Oda Paccy. Niwe mukobwa wabimburiye abandi mu gukora injyana ya Hip Hop mu Rwanda.

Paccy yavutse mu 1990. Ni umwana w’imfura mu muryango w’abana babiri. Yize muri Ecole Secondaire de Buringa, APEM Ruli na EAV Bigogwe. Yize muri Kaminuza muri KIST ariko ntiyaharangiriza ahubwo ahita ajya muri RTUC.

Yakuze akunda Hip Hop kuko yari umufana ukomeye wa Eminem na Dr. Dre ndetse bituma akora iyi njyana.

Uyu muhanzikazi yamenyekanye mu ndirimbo zirimo ‘Ese Nzapfa?’ yatumye amenyekana cyane ‘Miss President’, ‘Biteye ubwoba’ n’izindi.

Oda Paccy ni umwe mu bahanzikazi bafashe iya mbere mu gukora Hip Hop

Bitewe n’uko mu myaka 28 ishize hari abahanzi benshi bakoze mu muziki, birashoboka ko wabona muri iki gice cya mbere y’iyi nkuru hari umuhanzi twaba tutashyizemo kandi ubona abikwiye, ibitekerezo byanyu nk’ubusanzwe bihabwa agaciro. dutegerezanyije yombi ibitekerezo bigaruka ku bahanzi mubona batakabuze mu gice cya kabiri cy’inkuru nk’iyi turi kubategurira.

Tubibutse ko atari ukwibagirwa abahanzi bakora umuziki wo kuramya no guhimbaza Imana ahubwo nabo tuzabagarukaho mu nkuru zacu nk’izi ubutaha, aha naho ntibyababuza kuduha ibitekerezo by’abo mwumva batazabura kuri urwo rutonde.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .