Ku Cyumweru, tariki 20 Ugushyingo 2022, ni bwo hakinwe imikino ya ½ n’iya nyuma mu Irushanwa ry’Abasora neza ‘Tax Payers Appreciation Volleyball Tournament 2022’, yabereye muri BK Arena.

Mu mikino ya ½ mu bagore APR VC yageze ku mukino wa nyuma itsinze Ruhango amaseti 3-0 (25-13, 25-12 na 25-13) mu gihe RRA VC yasezereye Forefront iyitsinze amaseti 3-1 (25-15, 20-25, 25-21 na 25-9).

APR VC yahuriye ku mukino wa nyuma na RRA VC maze iyi Kipe y’Ingabo z’Igihugu yegukanye igikombe itsinze iy’Ikigo cy’Imisoro n’Amahoro amaseti 3-1(26-24, 25-19, 23-25 na 25-19).

Mu bagabo mu mikino ya ½ habanje uwa Gisagara na Forefront yaje guhita itsinda iseti ya mbere ku manota 27-25. Abasore b’i Gisagara bahise bikubita agashyi irusha ForeFront bigaragara, umukino urangira Gisagara itsinze Forefront amaseti 3-1 (27-25, 25-23, 25-23 na 25-23).

Undi mukino w’injyanamuntu wakurikiye uwahuje APR VC na REG VC. Bitunguranye APR VC yatsinze iseti ya mbere ku manota 25-21.

Ikipe ya Sosiyete y’Igihugu ishinzwe Ingufu, yahise iyigaranzura iyitsinda amaseti yakurikiye, umukino warangiye REG VC igeze ku mukino wa nyuma itsinze APR VC amaseti 3-1.

Saa Yine zishyira saa Tanu z’ijoro ni bwo umukino wa nyuma mu bagabo wari utangiye maze ibilo bitangira kuvuza ubuhuha abari muri BK Arena ntibibukaga ko bucya ari umunsi w’akazi.

REG VC imaze iminsi yarigaranzuye Gisagara VC atsinze iseti ya mbere ku manota 26-24, iya kabiri iyitsinda ku manota 31-29.

Gisagara VC yaje gukoramo, itsinda iseti ya gatatu ku manota 25-20, REG VC yaje kwegukana iseti yayo ya gatatu ari na yo yayihesheje intsinzi ku manota 25-18.

REG VC yahise yegukana Igikombe cy’Abasora neza itsinze Gisagara VC amaseti 3-1.

Forefront yasoreje ku mwanya wa gatatu itsinze APR VC amaseti 3-1.

Ikipe ya mbere mu bagabo n’abagore zahembwe miliyoni 2 Frw, iya kabiri ihabwa miliyoni 1.5 Frw mu gihe ikipe ya gatatu yahembwe miliyoni 1 Frw.

Mu bihembo by’abakinnyi ku giti cyabo mu bagore, uwakinishije bagenzi be neza (Best server) yabaye Munezero Valentine wa APR VC; Best Receiver aba Mukandayisenga Benitha wa APR VC; Umwataka mwiza yabaye Msisai Pamella wa RRA VC; Myugariro mwiza aba Amito Shallon wa Forefront.

Uwamahoro Betty wa APR VC yabaye umu-libero mwiza; Umu-setter mwiza yabaye Akimanizanye Ernestine wa RRA VC, mu gihe umukinyi w’irushanwa yabaye Mukantambara Seraphine wa APR VC.

Mu bagabo, abakinnyi ba REG VC bihariye ibihembo by’umukinnyi ku giti cye, aho Guiondong Marcel yabaye uwakinishije bagenzi be neza (Best Server); Best receiver yabaye Akumuntu Kavalo Patrick wa Gisagara VC mu gihe Best Setter yabaye Mahoro Yvan wa REG VC.

Mu bandi bahembwe, Umwakata mwiza yabaye Guiondong Marcel wa REG VC; Uwugariye neza yabaye Rukerangabo Yvan wa Forefront; Umu-libero mwiza yabaye Rwigema Simon wa REG VC mu gihe Guiondong Marcel wa REG VC yabaye umukinnyi mwiza w’irushanwa.

REG VC yatsinze Gisagara VC mu mukino uba witezwe na benshi mu bakunzi ba Volleyball mu Rwanda

Umukino wa RRA VC na APR VC warimo guhangana gukomeye

Byari ibyishimo byinshi ku bakinnyi ba APR VC nyuma y'ifirimbi ya nyuma

Abakinnyi ba RRA bari mu gahinda nyuma yo gutsindwa na APR VC ku mukino wa nyuma

Abakinnyi ba APR VC ubwo bishimiraga intsinzi

REG VC yatwaye igikombe mu bagabo nyuma yo gutsinda Gisagara VC

Guiondong Marcel wa REG VC ni we wabaye umukinnyi mwiza w'irushanwa

APR VC yatwaye igikombe mu bagore yahembwe miliyoni 2 Frw

Amafoto: FRVB