Uko amakipe yagabanye miliyoni $400 mu bihembo n’ibyihariye mu Gikombe cy’Isi cyegukanywe n’u Bufaransa

Yanditswe na Manzi Rema Jules
Kuya 16 Nyakanga 2018 saa 02:32
Yasuwe :
0 0

U Bufaransa bwatahanye miliyoni $38 nyuma yo kwegukana Igikombe cy’Isi cya 2018, ibihugu bya Afurika n’ibindi byasezerewe mu matsinda bihabwa miliyoni $8, mu gihe urebye ku makipe (club) afite abakinnyi mu makipe y’ibihugu, Manchester City ihiga andi mu kubona agahimbazamusyi gatubutse.

Nyuma y’ukwezi Isi y’abakunda ruhago ihanze amaso mu Burusiya mu gikombe cy’Isi cyari kitabiriwe n’ibihugu 32, u Bufaransa bwahikuye gitwari bwegukana iri rushanwa butsinze ku mukino wa nyuma Croatia ibitego 4-2 kuri iki Cyumweru.

Uretse kuba ari ishema kuri buri mukinnyi, umutoza, umufana n’igihugu, kwegukana iri rushanwa rikomeye kurusha ayandi yose byahesheje buri gihugu cytabiriye gutahana igihembo cy’amafaranga ahwanye n’umwanya cyarangijeho.

U Bufaransa bwatahanye akayabo…

Nubwo ikipe yegukanye igikombe cy’Isi itagenda ngo igumane burundu iyi zahabu y’umwimerere ibarirwa agaciro ka miliyoni $20, kwegukana igikombe cy’Isi bigenda bizana inyungu zihariye. Miliyoni $400 ni zo zakoreshejwe umu bihembo bitandukanye.

U Bufaransa bwatahanye miliyoni $38 nyuma yo kwegukana Igikombe cy’Isi cya 2018

Ikipe y’Igihugu y’u Bufaransa itozwa na Didier Deschamps, nyuma yo kwegukana iki gikombe yanahawe miliyoni $38, Croatia ya kabiri ihabwa miliyoni $28, u Bubiligi bwa gatatu butahana miliyoni $24 naho u Bwongereza bwa kane bubona miliyoni $22.

Amakipe yose yasezerewe muri ¼ arimo u Burusiya, Uruguay, Brazil na Suède buri imwe yahawe miliyoni $16, amakipe yatahiye muri 1/8 ahabwa miliyoni $12 naho atarabashije kurenga amatsinda arimo n’ayari ahagarariye Afurika uko ari atanu, buri imwe ihabwa imperekeza ya miliyoni $8 yiyongeraho miliyoni $1.5 ibihugu byose byahawe mbere y’irushanwa yo kwitegura.

Uyu mwaka ibihembo mu mafaranga bihabwa amakipe muri iri rushanwa byiyongereyeho 12%. Urebye nk’u Budage bwegukanye Igikombe cy’Isi cya 2014 bwahembwe miliyoni $35 mu gihe u Bufaransa kuri iki Cyumweru bwatahanye miliyoni $38 ndetse n’indi myanya yose ibihembo birazamuka.

Manchester City yahize andi makipe ku gahimbazamusyi

Nubwo abakinnyi bitabira Igikombe cy’Isi baba bagiye ari ab’ibihugu ari nawo mwenda bambaye, FIFA hari umubare w’amafaranga igenera amakipe basanzwe bakinira nk’agahimbazamusyi.

Uyu mwaka FIFA yabariraga buri kipe £6,460 ku munsi kuri buri mukinnyi ifite mu gikombe cy’Isi. Amakipe 384 yo muri shampiyona zitandukanye ku Isi niyo yohereje abakinnyi muri iri rushanwa.

Manchester City yo mu Bwongereza niyo yari ifitemo benshi (16), byanayihesheje kuba ariyo yahawe agahimbazamusyi kisumbuye ku yandi. Iyi kipe yahawe miliyoni £3,9, ikurikirwa na Real Madrid yahawe miliyoni £3,8 ku bakinnyi 15.

Indi mibare yihariye mu gikombe cy’Isi cya 2018

Mu mikino 64 yakinwe muri iri rushanwa, habonetsemo ibitego 169 harimo 12 byitsinzwe n’abakinnyi batandukanye, bikaba aribyo byinshi byitsinzwe mu Gikombe cy’Isi kuva mu 1998 ubwo abakinnyi bitsindaga bitandatu.

Rutahizamu w’u Bwongereza Harry Kane niwe watsinze ibitego byinshi muri iri rushanwa (6), we na Cristiano Ronaldo bakaba aribo bonyine babashije gutsinda ibitego bitatu mu mukino umwe.

Mu irushanwa ryose yabonetsemo penaliti 29 (hatabariwemo izatewe nka kamarampaka mu mukino amakipe yabaga yanganyije) habasha kwinjira 22.

U Bubiligi ni cyo gihugu cyatsinze ibitego byinshi (16), u Budage, Australia, Costa Rica, Misiri, Iceland, Iran, Maroc, Panama, Peru, Pologne, Arabia Saoudite na Serbia bisezererwa bitsinze ibitego bibiri gusa.

Amateka yanditswe

Cristiano Ronaldo yabaye umukinnyi wa kane mu mateka utsinze igitego mu bikombe by’Isi bikurikirana (2006, 2010, 2014 na 2018) yiyongera kuri Pelé, Uwe Seeler na Miroslav Klose.

Uyu mukinnyi yanditse n’amateka mashya yo kuba ariwe mukinnyi wo ku mugane w’u Burayi utsinze igitego mu marushanwa umunani akurikirana y’igikombe cy’Isi n’igikombe cy’u Burayi.

Kylian Mbappé yanditse amateka ko ariwe mukinnyi muto watsinze ibitego bibiri mu mukino w’Igikombe cy’Isi

Ku myaka 39 n’iminsi 139, Umunya-Mexique Rafael Marquez yabaye umukinnyi wa mbere ukuze mu mateka utari umuzamu, utangiye umukino mu gikombe cy’Isi, agahigo kari gafitwe n’Umwongereza Stanley Matthews wawutangiye mu 1954 afite imyaka 39 n’iminsi 145.

Umunyezamu wa Misiri Essam El-Hadary w’imyaka 45 n’iminsi 161 yashyizeho agahigo ko kuba umukinnyi ukuze kurusha abandi ukinnye igikombe cy’Isi akaba aruta imyaka 2 n’iminsi 158 umuzamu wa Colombia Faryd Mondragón wari usanzwe afite ako gahigo.

Kylian Mbappé yanditse amateka ko ariwe mukinnyi muto watsinze ibitego bibiri mu mukino w’Igikombe cy’Isi, ubwo u Bufaransa bwahuraga na Argentine muri 1/8, bikaba byari byarakozwe na Pelé mu 1958 ubwo Brazil yatsindaga Suède ku mukino wa nyuma.

Umutoza w’u Bufaransa Didier Deschamps yabaye umutoza wa gatatu mu mateka watwaye igikombe cy’Isi nk’umukinnyi akanabikora nk’umutoza nyuma y’umunya-Brazil Mario Zagallo n’umudage Franz Beckenbauer.

Joachim Low utoza u Budage yabaye umutoza wa gatatu mu mateka wahesheje ikipe ye Igikombe cy’Isi yayisubizayo igasezererwa mu matsinda nyuma ya Vicente Del Bosque mu 2014 atoza Espagne na Marcelo Lippi mu 2010 atoza u Butaliyani.

Umutoza w’u Bufaransa Didier Deschamps yabaye umutoza wa gatatu mu mateka watwaye igikombe cy’Isi nk’umukinnyi akanabikora nk’umutoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza