Umusifuzi wa Premier League ashobora gukorera miliyoni 270 Frw ku mwaka, abo mu Rwanda bahabwa angahe?

Yanditswe na Eric Tony Ukurikiyimfura
Kuya 24 Kamena 2020 saa 10:50
Yasuwe :
0 0

Umwuga wo gusifura ni umwe mu mirimo ikomeye mu mupira w’amaguru. Buri cyemezo ufashe cyakirwa bitandukanye n’abagize amakipe yombi. Iyo umukino urangiye, abasifuzi bavugwaho bitandukanye n’abatoza , itangazamakuru cyangwa abafana ko batitwaye neza mu mukino. Ariko se bakuramo izihe nyungu?

Nk’uko Isi ikomeje gutera imbere mu bijyanye n’ikoranabuhanga, n’umupira w’amaguru nawo ni uko kuko ubu hifashishwa ikoranabuhanga ry’amashusho rya VAR [Video Assistant Referees] mu gusifura ariko naryo rikaba ritarakuyeho impaka zose kuko rishinjwa kubogama dore ko rikoreshwa n’abasifuzi.

Mu cyumweru gishize ubwo Premier League yasubukurwaga, Sheffield United ntiyahawe igitego yatsinze Aston Villa kuko umusifuzi atabonye ko umupira warenze umurongo mu gihe n’ikoranabuhanga rya Goal-line Technology (ryerekana ko umupira warenze umurongo) ritigeze ribimenyesha umusifuzi binyuze mu itumanaho rikoresha.

Sosiyete ya Hawk-Eye ikoresha Goal-line Technology yasabye imbabazi ivuga ko “abakinnyi bakingirije umurongo” ntibigaragare ko umupira waba wageze mu izamu. Yavuze ko ari ubwa mbere habayeho iri kosa mu mikino isaga 9000 imaze gukoreshwamo iri koranabuhanga muri Premier League.

Igitego Sheffield United yatsinze Aston Villa mu cyumweru gishize, ntikibarwe, cyateje impaka muri Premier League
Umusifuzi Michael Olivier yereka abakinnyi ba Sheffield United ko atigeze amenyeshwa ko umupira warenze umurongo w'izamu

Abasifuzi ba Premier League nibo bahembwa neza muri Shampiyona zikomeye

Nka Shampiyona y’icyitegererezo irimo amafaranga menshi kurusha izindi, Premier League y’u Bwongereza ni yo ifata neza abasifuzi kurusha izindi zose, aho bo bagenerwa umushahara w’umwaka.

Gusa ntabwo ari bose kuko biterwa n’urwego umusifuzi agezeho kandi birumvikana kuko umusifuzi ukizamuka adafatwa kimwe n’umaze kugira uburambe ndetse akaba agaragaza ubuhanga mu kazi ke.

Abasifuzi batabigize umwuga mu Bwami bw’u Bwongereza bishyurwa hagati ya £20 (asaga ibihumbi 23 Frw) na £40 (asaga ibihumbi 47 Frw) ku mukino.

Abari hafi kubigira umwuga, basifura mu byiciro byo hasi by’umupira w’amaguru mu Bwongereza, bishyurwa hafi £80 (hafi ibihumbi 95 Frw) ku mukino. Bahabwa kandi n’ibyo bakenera bava cyangwa bajya ku mukino (amafaranga y’urugendo, ayo gufungura n’ibindi).

Hejuru y’abo bose hari aba Premier, bo bahabwa imishahara ihoraho ku mwaka ariko hakaba hari n’amafaranga umusifuzi yishyurwa kubera umukino yasifuye.

Martin Atkinson, Mike Dean na Michael Oliver buri umwe ahabwa ibihumbi 200£ (agera kuri miliyoni 237 Frw) nk’umushahara w’umwaka, hatarongerwaho ay’imikino yasifuye- 1500£ ku mukino)

Abasifuzi bo ku ruhande bahembwa umushahara w’ibihumbi 30£ ku mwaka na £850 kuri buri mukino mu gihe abakoresha VAR bahabwa ibihumbi 30£ ku mwaka na £850 ku mukino.

Hari abafite amasezerano ahoraho muri Premier (ubu ni 17) n’abandi bafite amasezerano asanzwe bo bishyurwa amafaranga ari hagati y’ibihumbi 38.5 $ (asaga miliyoni 45 Frw) n’ibihumbi 42 £ (hafi miliyoni 50 Frw) ku mwaka, yiyongera ku 1,150£ (hafi miliyoni 1.3 Frw) bahabwa kuri buri mukino basifuye.

N’abasifuzi bo mu cyiciro cya kabiri (Championship) bishyurwa amafaranga nk’ayo ku mwaka ariko bo ku mukino bishyurwa £600 (agera ku bihumbi 713 Frw).

Umushahara utangwa ku mwaka niwo uhesha agaciro imisifurire yo mu Bwongereza kuko nko mu bindi bihugu bifite shampiyona zikomeye ho abasifuzi bahembwa amafaranga menshi ku mukino basifuye gusa, ariko nta kindi bagenerwa.

Muri Espagne buri musifuzi ahabwa ibihumbi 5200£ (asaga miliyoni 6 Frw) ku mukino, mu Budage ni 3150£, mu Butaliyani ni 3000£, mu Bufaransa ni 2400£ mu gihe muri Portugal ari 1000£.

Mu irushanwa rya UEFA Champions League, abasifuzi bagabanywa mu byiciro bitewe n’ubunararibonye bafite ndetse abakuru muri bo babona asaga 5,500£ (miliyoni 6.5 Frw) ku mukino.

Mike Dean wasifuye imikino 29 ya Premier League mu mwaka w’imikino wa 2018/19, yayikuyemo ibihumbi 33.35£ kongeraho ibihumbi 200£ y’umushahara, akaba miliyoni 277.8 Frw ku mwaka.

Mike Dean ari mu basifuzi batatu bahembwa menshi kurusha abandi muri Premier League

Abasifuzi bo mu Rwanda bahembwa gute?

Bamwe mu bakurikirana imisifurire yo mu Rwanda bavuga ko iri ku rwego rwo hasi mu gihe hari abavuga ko kimwe mu byaba bibitera ari uko habamo ruswa bigatuma umusifuzi yica umukino.

Mu kiganiro Café Sport cya Televiziyo y’Igihugu cyabaye mu Ukuboza 2019, Umuyobozi wa Rayon Sports, Munyakazi Sadate n’uwa Kiyovu Sports, Ntarindwa Théodore, bavuze ko kuba abasifuzi bo mu Rwanda bahabwa agahimbazamushyi kadahagije ku mukino biri mu bituma batitwara neza mu kibuga.

Mu gukora kuri ibi, IGIHE yasanze abasifuzi bo mu Rwanda nta mushahara wihariye bagenerwa uretse amafaranga bishyurwa ko basifuye umukino runaka ariko nabwo ashobora kuza nyuma y’imikino itanu cyangwa icumi (yarabaye ibirarane by’igihe kirekire).

Mu Rwanda, iyo umusifuzi apanzwe ku mukino runaka, tuvuge wenda ari buve i Kigali akajya gusifura i Rusizi, aba agomba kwimenyera buri kimwe noneho amafaranga akazayahabwa nyuma.

Umwe mu baganiriye na IGIHE, yagize ati “Ubundi uba ugomba guhora ufite amafaranga kuko hari igihe runaka bayatangira ntabwo bayaduha mbere cyangwa nyuma ya buri mukino. Niyo mpamvu ubona bigoranye ko umuntu yasifura nta kandi kazi afite.”

Undi yagize ati “Kugira ngo hirindwe ko umusifuzi yamenya umukino azasifura agahita ajya gushakisha niba hari ruswa yabona kuri uwo mukino, batubwira imikino tuzasifura ku wa Kane. “

Gusifura umukino w’icyiciro cya mbere wabereye i Kigali, umusifuzi ahabwa ibihumbi 17.2 Frw ariko iyo wasifuwe n’umusifuzi mpuzamahanga, we ahabwa ibihumbi 23.5 Frw mu gihe gusifura umukino w’abagore wabereye i Kigali, umusifuzi ahabwa 9100 Frw.

Iyo bigeze ku mikino yabereye mu Ntara, i Musanze (Kigali- Musanze) umusifuzi ahabwa ibihumbi 27.6 Frw, i Rusizi ni 62,760 Frw, Rubavu- Rusizi ni 61,700 Frw, Kigali- Nyagatare ni 34,960 Frw, Kigali- Huye cyangwa Nyamagabe ni 27,740 Frw.

Iyo bigeze ku bakomiseri b’umukino, bo bafata menshi kurusha abasifuzi aho nk’urugero rw’uwakoze umukino wabereye i Rusizi yavuye i Kigali, ahabwa 71,760 Frw.

Ibi ntibisobanuye ko buri musifuzi aba afite umukino buri cyumweru nk’uko Gasingwa Michel uyobora Komisiyo ishinzwe Abasifuzi muri FERWAFA aherutse kubitangaza.

Ati “Buriya rero mugiye kureba hirya no hino ku isi mwasanga abasifuzi bose batanganya imikino. Mu gusifura nta gusaranganya kubamo rwose. Ikindi kandi, imibare dufite inaha mu Rwanda igaragaza ko abasifuzi bose bajya kunganya umubare w’imikino.”

Muri uyu mwaka wa 2020, FERWAFA yari yateganyije ko ibijyanye n’imisifurire byose bizatwara miliyoni 138 Frw arimo miliyoni 116.08 Frw yo kubahemba n’andi asaga miliyoni 21 Frw y’amahugurwa bakora.

Bamwe mu bafuzi b’Abanyarwanda bungukira mu gusifura imikino mpuzamahanga kuko nk’Impuzamashyirahamwe y’Umupira w’Amaguru muri Afurika (CAF) yishyura $1200 (agera kuri miliyoni 1.14 Frw) ku mukino.

Mutuyimana Dieudonné, Ishimwe Jean Claude na Bwiliza Raymond Nonati ni bamwe mu basifuzi 17 b'Abanyarwanda bashobora gusifura imikino mpuzamahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .