00:00:00 IGIHE NETWORK KN KINYARWANDA EN ENGLISH FR FRANCAIS

Sénégal yegukanye Igikombe cya Afurika ku nshuro ya mbere itsinze Misiri

Yanditswe na Bukuru JC
Kuya 7 February 2022 saa 12:20
Yasuwe :

Ikipe y’Igihugu ya Sénégal yegukanye Igikombe cya Afurika ku nshuro ya mbere nyuma yo gutsinda iya Misiri penaliti 4-2 ubwo ibihugu byombi byari byanganyije ubusa ku busa mu minota 120 y’umukino wa nyuma wabereye kuri Stade Olembé y’i Yaoundé kuri iki Cyumweru.

Sénégal yari hejuru muri uyu mukino, yakabaye yafunguye amazamu kuri penaliti yabonye ku munota wa gatandatu ubwo Mohamed Abdelmonem yakiniraga nabi Saliou Ciss, ariko Sadio Mané ayiteye ikurwamo n’umunyezamu Gabaski.

Habura iminota ibiri ngo igice cya mbere kirangire, Misiri yabonye uburyo bwiza ku ishoti ryatewe na Mohamed Salah, busubizwa inyuma n’umunyezamu Edouard Mendy.

Gukomeza kunganya ubusa ku busa mu minota 90 isanzwe, byatumye hongerwaho iminota 30 y’inyongera.

Muri iyi minota, Sénégal yabonye uburyo bubiri bukomeye, umunyezamu Gabaski akuramo imipira yatewe na Bamba Dieng mu gihe Edouad Mendy yabujije Marwan Hamdi gutsinda ku ruhande rwa Misiri.

Iminota 120 yarangiye nta kipe irebye mu izamu, hitabazwa penaliti zasize Sénégal yegukanye Igikombe cyayo cya mbere itsinze 4-2.

Penaliti enye za Sénégal zinjijwe na Kalidou Koulibaly, Abdou Diallo, Ahmadou Bamba Dieng na Sadio Mané mu gihe imwe yahushijwe na Bouna Sarr wateye ari uwa gatatu.

Ku ruhande rwa Misiri, izinjiye ni iya Zizo wateye bwa mbere na Marwan Hamdi wateye bwa gatatu mu gihe izahushijwe ari iya Mohamed Abdelmonem ya kabiri na Mohanad Lasheen wateye iya kane.

Edouard Mendy wa Sénégal ni we wabaye umunyezamu w’irushanwa naho Kapiteni wa Cameroun, Vincent Aboubakar watsinze ibitego umunani, aba rutahizamu w’irushanwa.

Umukinnyi mwiza w’iki Gikombe cya Afurika cyakinwe hagati ya tariki ya 9 Mutarama n’iya 6 Gashyantare 2022 yabaye Sadio Mané wa Sénégal.

Umunyezamu Edouard Mendy ashimirwa na bagenzi be
Sénégal yegukanye Igikombe cya Afurika ku nshuro ya mbere itsinze Misiri
Mohamed Salah na bagenzi be ntibiyumvishije uburyo batsinzwe
Byari ibyishimo bikomeye ku bakinnyi ba Sénégal
Umutoza Aliou Cisse yahesheje Sénégal igikombe nyuma yo gutsindirwa ku mukino wa nyuma mu 2019
Sadio Mane yifotoreza ku gikombe mbere y'uko ikipe ye igishyikirizwa
Abakinnyi ba Sénégal bishimira Igikombe cya Afurika batwariye muri Cameroun

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .