00:00:00 IGIHE NETWORK KN KINYARWANDA EN ENGLISH FR FRANCAIS

NBA Playoffs: Boston Celtics yigaranzuye Miami Heat

Yanditswe na Mihigo Saddam
Kuya 24 May 2022 saa 10:52
Yasuwe :

Boston Celtics yigaranzuye Miami Heat ibona itsinzi ya kabiri ku manota 102-82 mu mukino w’umunsi wa kane mu mikino ya nyuma y’igice cy’uburasirazuba muri NBA.

Mu mukino uheruka w’umunsi wa gatatu, Miami Heat yari yabonye intsinzi ya kabiri bityo ijya imbere n’intsinzi ebyiri kuri imwe ya Boston Celtics.

Mu rukerera rw’uyu wa Kabiri, Boston Celtics nayo yinyaye mu isunzu ibona intsinzi ya kabiri itsinda ikipe bahanganye, Miami Heat amanota 102-82 (29-11, 28-22, 19-19, 26-30).

Muri uyu mukino, Miami Heat yagize imbaraga mu gutsinda mu gace ka nyuma k’umukino kuko yari yaganjwe n’abakinnyi ba Boston Celtics mu gace ka mbere.

Agace ka mbere k’umukino, abakinnyi ba Boston Celtics bashyizemo ikinyuranyo cy’amanota 18 kuko batsinze amanota 29-11.

Mu gace ka kabiri, abakinnyi ba Boston Celtics batsinze amanota 28-22 bityo ikinyuranyo cy’amanota atandatu kiyongera kuri 18 biba amanota 24.

Mu gace ka gatatu abakinnyi ba Miami Heat basabwaga gukuramo iki kinyuranyo ariko birangira amakipe yombi anganya amanota 19-19.

Mu gace ka nyuma, ikipe ya Miami Heat yakoze iyo bwabaga ishaka gukuramo amanota 18 ntibyakunda n’ubwo yagatsinze n’amanota 30-26.

Boston Celtics yafashijwe cyane na Jayson Tatum watsinze amanota 31, Robert Williams atsinda amanota 12 mu gihe Derrick White yatsinze amanota 13.

Undi mukinnyi wafashije Celtics kuzamura amanota ni Payton Pritchard watsinze amanota 14 mu minota 25 yamaze mu kibuga.

Ku ruhande rwa Miami Heat, Victor Oladipo yatsinze amanota 23 aba umukinnyi warushije amanota bagenzi be bakinana, uba uwa kabiri mu mukino rusange.

Duncan Robinson yatsinze amanota 14, Caleb Martin agira 12 mu gihe Dedmon Dewayne yasoje afite amanota arindwi.

Nyuma y’imikino ine imaze guhuza amakipe yombi, buri ruhande rwatsinzemo imikino ibiri bityo imikino itatu isigaye, ikipe izatsindamo ibiri izahita ikomeza.

Umukino w’umunsi wa gatanu hagati ya Boston Celtics na Miami Heat uzakinwa kuwa Kane tariki 26 Gicurasi 2022 saa munani n’igice z’urukerera.

Mu gice cy’uburengerazuba, Golden State Warriors izakina na Dallas Mavericks umukino w’umunsi wa kane kuri uyu wa Gatatu tariki 25 Gicurasi 2022 saa cyenda z’urukerera.

Mu mikino itatu imaze guhuza impande zombi, Golden State Warriors yayitsinze yose bityo ikaba isabwa gutsinda umukino umwe igahita ibona itike y’imikino ya nyuma.

Imibare ya Miami Heat yatangiye kuba mibi nyuma yo kuba inganya intsinze na Boston Celtics
Edrice Femi "Bam" Adebayo yatsinze amanota icyenda ku nyungu za Miami Heat
Kugeza ubu Miami Heat na Boston Celtics banganya intsinzi 2-2
Kugeza ubu Miami Heat na Boston Celtics banganya intsinzi 2-2
Abakinnyi ba Miami Heat bari biteze kuzamura amanota mu gace ka gatatu karangira banganya
Abakinnyi ba Miami Heat bananijwe n'ikinyuranyo cy'agace ka mbere
Umukino wahuje Miami Heat na Boston Celtics warangiye harimo ikinyuranyo cy'amanota 20

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .