00:00:00 IGIHE NETWORK KN KINYARWANDA EN ENGLISH FR FRANCAIS

Imyaka itanu y’ihangana: Byinshi ku mukino wa nyuma uzahuza REG BBC na Patriots BBC

Yanditswe na Iradukunda Olivier
Kuya 17 September 2022 saa 01:44
Yasuwe :

Ikipe ya Rwanda Energy Group Basketball Club (REG BBC) na Patriots Basketball Club zimaze imyaka igera kuri itanu zihurira ku mukino wa nyuma w’igikombe cya Shampiyona mu Rwanda muri Basketball.

REG BBC iri mu makipe atamaze igihe kinini muri iyi shampiyona kuko yashinzwe mu 2016 ubwo yemerwaga kuba umunyamuryango wa Ferwaba. Naho Patriots BBC yo yemewe muri Ferwaba mu mwaka wa 2014.

Kuva mu mwaka Patriots yashingiweho na REG BBC kugeza ubu zimaze kuba ubukombe, haba mu gutwara ibikombe, guhagararira u Rwanda kigabo, kongera abakunzi b’uyu mukino ku bibuga ndetse no mu buryo bw’ubucuruzi aya makipe yazanye itandukaniro muri Baskeball mu Rwanda.

Aya makipe kuva yabaho amaze guhurira ku mukino wa nyuma inshuro eshanu. Muri izo nshuro eshanu zirimo mu 2016-2017, 2018-2019, 2019-2020, 2020-2021 ndetse n’uyu mwaka wa 2021-2022.

Mu mwaka wa 2016-2017 REG BBC ikigera muri Shampiyona yahise igera ku mukino wa nyuma itsinze Espoir amanota 67-56. Gusa ku mukino wa nyuma ntabwo byaje kuyibera byiza iri kumwe n’umutoza John Bahufite, yabuze amahirwe itsindwa na Patriots BBC 76-75.

Muri 2017-2018 nabwo REG BBC yari yatwaye igikombe itsinze IPRC Kigali BBC amanota 76-71, iserukira u Rwanda mu mikino ihuza amakipe yabaye aya mbere iwayo yabereye mu Misiri 2018-2019.

Ku nshuro zose bamaze guhura, Patriots yegukanye iki gikombe inshuro enye, usibye mu mwaka wa 2020-2021 cyegukanwe na REG BBC itsinze amanota 64-49. Yahise ibona itike yo guhagararira u Rwanda mu irushanwa rya Basketball Africa League 2022.

Iyi kipeya REG BBC ku nshuro yayo ya mbere yitabira yari ihagarariye u Rwanda mu mikino ya BAL 2022 ariko yasezerewe muri iyi mikino nyuma yo kunanirwa kugera muri 1/4 itsinzwe na FAP BBC yo muri Cameroon amanota 66 kuri 63.

Mu Ukwakira 2019, u Rwanda nyuma yo kuzuza inyubako y’imyidagaduro BK Arena, hasyizwemo imbaraga kugira ngo hakirwe irushanwa rya BAL, Umuyobozi waryo Amadou Gallo Fall n’abo bafatanyije kuriyobora babiha umugisha. Icyiciro cya kabiri cy’iyi mikino cyabereye mu Rwanda.

Iri rushanwa ryari rije ariryo rya mbere rikomeye muri Afurika, ryagombaga kuba mu mwaka wa 2020 ariko nticyaba kubera gukomwa mu nkokora n’icyorezo cya COVID 19. Abanyarwanda n’abakunzi ba Basketball barisamiye hejuru, ubwo ryasubukurwaga mu mwaka wa 2021.

Ikipe ya Patriots yari ihagarariye u Rwanda yigaruriye imitima y’abanyarwanda haba abanzi ba Basketball ndetse n’abandi bajya kwirebera inyubako nziza yari yujujwe i Kigali ubu yitwa ‘BK Arena’.

Ntabwo iyi kipe yigeze ibatenguha, kuko icyo gihe yagarukiye ku mwanya wa Kane, iza mu makipe meza mu yitabiriye iryo rushanwa mu mwaka wa 2021.

Mu mwaka wa 2021, REG BBC nayo yahise ihiga ko igomba kujya gusogongera ku bwiza bwa BAL. Icyo gihe yahise yegukana igikombe mu mwaka wa 2021, ibona itike yo kujya mu majonjora y’iri rushanwa yaberaga muri Dakar Arena muri Senegal.

REG BBC ibifashijwemo na Nshobozwabyosenumukiza Jean Jacques, yatsinze US Monastir yo muri Tunisia amanota 77-74. Ibi byayihesheje kubona itike y’imikino ya nyuma yari kubera i Kigali ku nshuro ya kabiri mu mpera za Gicurasi 2021.

Kuri iyi nshuro aya makipe yombi asoje imikino ine ya nyuma mu mikino ya kamarampaka, hasigaye umukino wa gatanu ugomba kwerekana ikipe izatwara igikombe, ikabona itike yo gukina amajonjora yo gushaka itike yo kuba mu makipe 12 akina imikino ya nyuma ya BAL.

Imyiteguro irarimbanyije nayo kuko Patriots yongeyemo izindi mbaraga yinjiza abakinnyi bakomeye nka Kenny Gasana, umunyamerika ufite ubwenegihugu bw’u Rwanda, Umunyakenya Wamukota Bush.

Yongeyemo kandi Umunyamerika Crowford Christopher wakiniye amakipe nka US Monastir, ndetse na Kendall Lamar na we wavukiye muri Amerika ariko usanzwe unakinira ikipe y’Igihugu y’u Rwanda ya Basketball.

Ku ruhande rwa REG BBC ari nayo iherutse muri BAL ariko ikaba itarageze kure, na yo ifite abakinnyi bakomeye ndetse bari kumwe no mu mikino ya BAL iheruka nka Filer Jovon Adonis, Umunyamerika w’umunyarwanda wanakiniye Ikipe y’igihugu y’u Rwanda.

Harimo na Cleveland Thomas Junior Umunyamerika na we wakiniye ikipe ya REG mu mikino ya BAL n’ubu bakaba bakiri kumwe, Mpoyo Axel ndetse n’umunye-Congo, Kambuyi Manga Pitchou.

Mu mwaka wa 2019, nibwo Umunya-Tanzania watozaga Patriots, Henry Mwinuka yahawe akayabo ka miliyoni 45 FRW kugira ngo asinyire ikipe ya REG BBC, nyuma yo kuyitwara igikombe cya shampiyona.

Uyu mutoza yari yahaye ibikombe bitatu bya shampiyona mu myaka ine Patriots yari amaze igihe ayitoza.

Usibye ikipe y’igihugu muri Basketball, uwavuga ko umukino w’aya makipe yombi ariwo ukurura benshi ku mu Rwanda ntiyaba abeshye. Ni muri urwe rwego abaterankunga biyongereye muri uyu mukino by’umwihariko mu makipe nyirizina.

Ubwitabire bw’abakunzi ba Baskteball ku mukino wahuje Patriots BBC na REG BBC muri Playoffs za 2020 muri Kigali Arena yakira abantu ibihumbi 10.

Ubu bwitabire bwagarutsweho na Perezida Kagame, aho icyo gihe yavuze ko mu minsi mike yari ishize ishize BK Arena yuzuye, amakipe meza mu Rwanda rufite muri Basketball, aha yavugaga REG BBC na Patriots BBC, yakinnye umukino wa nyuma usoza shampiyona muri Kigali Arena [BK Arena] “ikuzura 100%” kandi abantu barebye imikino bishyuye.

Ati “Ubwo nabonaga Arena ifite ubushobozi bwo kwakira abantu ibihumbi 10 yuzuye, nahise ntangira kwibaza nti ni kuki tutubatse [Kigali] Arena yakira abantu ibihumbi 15, kuki tutubatse iyakira ibihumbi 20? Urabibona ko abantu banyotewe, kandi ibyo mvuga tubona mu Rwanda, biri ku rugero rwo hejuru y’ahandi.”

Aya makipe yubatse izina ku buryo ibigo byinshi byifuje kuyatera inkunga ndetse n’umukino wa Basketball mu Rwanda. Ku ikubitiro Patriots yasinye amasezerano amaze igihe gito asinywe na AZAM yo muri Tanzania ya Miliyoni 48 Frw.

Mu minsi ishize kandi ikipe ya REG BBC yasinyanye amasezerano y’ubufatanye na Prime Insurance afite agaciro ka Miliyoni 100 Frw.

Si aya makipe gusa kuko kuva yaza muri shampiyona, mu mwaka w’imikino wa 2018-2019, Banki ya Kigali yateye inkunga amarushanwa ya FERWABA. Inkunga yanganaga na miliyoni 300 Frw muri Basketball y’u Rwanda mu gihe cy’imyaka itatu. Ibintu bitari byarigeze bibaho.

Kuva icyo gihe shampiyona yitwa ‘BK Basketball National League’, kandi riranavugururwa ryitwa rizana impinduka zo gukina za “Playoffs”. Naryo ryegukanwa na Patriots uwo mwaka.

Amasezerano na Banki ya Kigali arangiye ku wa 18 Mutarama 2022. Ishyirahamwe Nyarwanda ry’umukino wa Basketball ryasinyanye amasezerano y’imyaka itatu, afite agaciro ka miliyoni 240 Frw, n’uruganda rwa Bralirwa binyuze mu kinyobwa cya "Cheetah Energy Drink".

REG BBC y’umutoza Henry Mwinuka wabaye muri Patriots BBC azakina nayo umukino wa nyuma. Patriots BBC nayo izaba iri gutozwa n’umutoza Alan Major wanditse amateka muri Basketball amazemo imyaka 26 ariko amaze umwaka urenga muri Patriots BBC.

Umukino wa Gatanu uhuza aba bombi uzaba kuri iki Cyumweru tariki ya 18 Nzeri 2022 Saa Moya muri BK Arena, uzatsinda azegukana igikombe anahagararire u Rwanda muri BAL.

Abakinnyi ba Patriots BBC barifuza gusubira muri BAL
Abakinnyi n'abatoza ba REG BBC biteguye gutsinda Patriots BBC
Umukino wa REG BBC na Patriots BBC umaze kuba ubukombe muri shampiyona ya Basketball mu Rwanda
Umukino wa REG BBC na Patriots BBC wanditse amateka wo kuba ariwo wa mbere wari ubaye abantu bishyuye hanyuma Kigali Arena ikuzura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .