00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwegukanye Igikombe cya Afurika rubona itike y’icy’Isi muri Cricket

Yanditswe na Byiringiro Osée Elvis
Kuya 12 September 2022 saa 08:37
Yasuwe :

Ikipe y’Igihugu y’u Rwanda y’Abangavu batarengeje imyaka 19 muri Cricket, yegukanye Igikombe cya Afurika, inakatisha itike yo kujya mu Gikombe cy’Isi.

Ni umukino wa nyuma wabereye muri Botswana kuri uyu wa Mbere, tariki 12 Nzeri 2022, warangiye u Rwanda rutsinze Tanzania ku kinyuranyo cya wickets esheshatu.

Muri uyu mukino Tanzania ni yo yawutangije ikubita udupira ibizwi nka Batting ndetse byatumye isoza igice cya mbere yashyizeho amanota 84 muri Overs 18.

Iki gice kandi cyarangiye u Rwanda rwasohoye abakinnyi bose ba Tanzania, mu bizwi nka “all out of wickets”.

Ikipe y’Igihugu y’u Rwanda yatangiye igice cya kabiri isabwa gutsinda amanota 85 ngo ibe yegukanye igikombe.

Bigoranye Abangavu b’u Rwanda baje kubigeraho kuko batsinze amanota 86 muri overs 15 n’udupira tune.

Muri icyo gice Tanzania yasohoye abakinnyi bane b’u Rwanda.

Ishimwe Henriette ni we wabaye umukinnyi mwiza w’umukino nyuma yo gusohora abakinnyi batatu ba Tanzania.

Iyi ntsinzi yahesheje u Rwanda itike yo kuzitabira imikino y’Igikombe cy’Isi, kizabera muri Afurika y’Epfo muri Mutarama 2023.

Uyu mukino wabanjirijwe ni uwo gushaka umwanya wa gatatu, Namibia itsinda Uganda ku kinyuranyo cya Wickets enye.

Ibihugu bimaze kubona itike yo kuzakina Igikombe cy’Isi birimo Afurika y’Epfo, u Rwanda, Australia, Bangladesh, u Bwongereza, u Buhinde, Ireland, Nouvelle-Zélande, Pakistan, Sri Lanka, Leta Zunze Ubumwe za Amerika, Zimbabwe, Indonesia, Ecosse na Leta Zunze Ubumwe z’Abarabu.

U Rwanda rwegukanye Igikombe cya Afurika muri Cricket mu Batarengeje imyaka 19
Tombola y’ibihugu bizitabira Igikombe cy’Isi cya Cricket mu Batarengeje imyaka 19 yasize u Rwanda ruri mu Itsinda rya Kabiri ririmo u Bwongereza, Pakistan na Zimbabwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .