Ubwo hasozwaga Imikino ya FEASSA 2026 yabereye i Morogoro muri Tanzania kuva tariki ya 12 kugeza ku wa 22 Kanama 2026, Perezida w’iri Shyirahamwe, Justus Mugisha, yavuze ko u Rwanda ari rwo rutahiwe mu kwakira iyi Mikino.

Ati "U Rwanda ruzakira irushanwa ritaha ry’Imikino ya FEASSA. Twiteguye gukorana na bagenzi bacu bo mu Rwanda kugira ngo iyi Mikino izagende neza."

Amakuru IGIHE yamenye ni uko Ishyirahamwe Nyarwanda ry’Imikino n’Umuco mu Mashuri (FRSS) riteganya ko iyi Mikino ya FEASSA 2027, izaba ku nshuro ya 24, izabera mu Mujyi wa Musanze.

U Rwanda rwaherukaga kwakira FEASSA mu 2023 i Huye aho yitabiriwe n’abanyeshuri bo mu Rwanda, Tanzania, Uganda na Kenya.

Kuva rwinjiye muri iryo Shyirahamwe mu 2005, rwakiriye imikino kandi mu 2008 i Kigali, 2015 i Huye na 2018 i Musanze.

Abakinnyi bagera ku 6000 n’ababaherekeje bagera ku 2000 ni bo bitabiriye Imikino ya FEASSA 2026 i Morogoro, bahatana muri siporo 43 zitandukanye.

Ibihugu byari byitabiriye ni Tanzania, u Rwanda, Kenya, u Burundi na Uganda.

Inkuru bifitanye isano: Amakipe y’u Rwanda yakoze amateka muri FEASSA 2026

U Rwanda rwemejwe nk'igihugu kizakira Imikino ya FEASSA 2027

U Rwanda rwari mu bihugu bitanu byitabiriye FEASSA 2026 i Morogoro muri Tanzania

Huye ni yo yakiriye Imikino ya FEASSA ubwo iheruka kubera mu Rwanda mu 2023