00:00:00 IGIHE NETWORK KN KINYARWANDA EN ENGLISH FR FRANCAIS

Musanze: Bishimiye guhembwa na Cogebanque muri Poromosiyo “Tugendane”

Yanditswe na Ishimwe Israel
Kuya 5 Gicurasi 2021 saa 11:08
Yasuwe :
0 0

Abaturage bo mu Karere ka Musanze bishimiye guhembwa binyuze muri Poromosiyo ya Cogebanque yiswe “Tugendane” igamije gushishikariza abaturarwanda gukoresha ikoranabuhanga mu gihe bashaka serivisi z’imari.

Ni ibihembo bahawe ku wa Gatatu, tariki ya 5 Gicurasi 2021, nyuma ya etape ya kane ya Tour du Rwanda yasorejwe mu Karere ka Musanze, ihagurutse mu Mujyi wa Kigali ku ntera y’ibilometero 123,9. Yegukanywe n’Umufaransa w’imyaka 23 Valentin Ferron ukinira Total Direct Energie yo mu Bufaransa.

Valentin Ferron yegukanye iyi etape yahagurukiye Kimironko isorezwa imbere y’isoko rya Musanze nyuma yo gukoresha amasaha atatu, iminota 13 n’amasegonda 47.

Umunyarwanda Manizabayo Eric ukinira Benediction Ignite, yabaye uwa gatatu yasizwe amasegonda ane mu gihe Nsengimana Jean Bosco (Team Rwanda) yabaye uwa karindwi asizwe amasegonda 46.

Cogebanque nka Banki Nyarwanda itera inkunga iri siganwa, yakomeje gufasha abayigana gukabya inzozi zabo mu by’imari. Nyuma yo gusobanurirwa ibyiza biri mu gukorana na yo bamwe mu batuye muri Musanze bafunguje konti ndetse baninjira mu banyamahirwe batomboye ibihembo bitandukanye.

Hakizimana Jean Pierre ukorera ubushabitsi butandukanye mu Karere ka Musanze yavuze ko yashishikarijwe gukorana na banki yumva ari ingenzi.

Yagize ati “Bambwiye inyungu iri mu gukorana na Cogebanque numva ndabikunze. Icyankuruye ni serivisi nziza batanga kuko baguha inguzanyo igufasha mu ishoramari no kubaka inzu.’’

Yavuze ko yinjiye muri Cogebanque yitezeho ko izamfasha kuzamura urwego rw’ibyo nkora mu bucuruzi bw’iduka n’ubw’imodoka akora.

Ati “Imbaraga za banki ndazikeneye, nzanyurwa no kubona serivisi nziza. Ushaka kugira icyo akora yagana Cogebanque, ikamufasha akagera ku rundi rwego.’’

Uwamahoro Joséline usanzwe ari umu-agent wa Airtel Money, yavuze ko yafunguje konti muri Cogebanque yizera ko azayungukiramo byinshi.

Ati “Biranshimishije kuba nagiriwe icyizere cyo guhembwa. Nafunguje konti kuko numvaga nyikunze. Nabonye ko mu mikorere yanjye hari icyo izamfashaho ngatera imbere. Igihe nkeneye kwagura ubucuruzi bwanjye. Nzatera imbere kuko nzajya nizigama kandi ninshaka inguzanyo binyorohere.’’

Yakomeje ati “Ndashishikariza abaturarwanda gukunda serivisi za banki kuko zabafasha kwiteza imbere.’’

Binyuze muri Poromosiyo ya “Tugendane”, Cogebanque yashyizeho amakarita atandukanye afasha kwishyura mu buryo bworoshye mu mahahiro no kuri murandasi.

Umukozi ukora muri serivisi z’ikoranabuhanga muri Cogebanque, yavuze ko abaturarwanda bakomeje kuyoboka ikoranabuhanga mu gihe bashaka serivisi z’imari.

Yagize ati “Abaturarwanda batangiye gusobanukirwa serivisi z’imari, no gufunguza konti kugira ngo biteze imbere. Nubwo hari icyorezo cya COVID-19, tugerageza kwegera abakiliya bacu ariko dukomeza kubashishikariza kuyoboka serivisi z’ikoranabuhanga.’’

Yavuze ko ibihembo bahawe ari iby’amafaranga ndetse yashyizwe kuri konti zabo mu buryo bwo kurushaho kwimakaza ikoranabuhanga mu guhererekanya amafaranga.

Abakiliya bashya bahembwe binyuze muri Poromosiyo ya “Tugendane” yatangijwe muri Tour du Rwanda ndetse ikazanakomeza nyuma yayo.

Muri iki gihe cy’iminsi umunani ya Tour du Rwanda, abazakoresha konti yabo bifashishije ikoranabuhanga, abazizigamira, bazagira amahirwe yo gutsindira ibihembo bitandukanye.

“Tugendane” ni poromosiyo igamije gufasha Abanyarwanda guhindura inzozi zabo mu by’imari impamo. Bumwe mu buryo ushobora kugendana na Cogebanque ni ugukoresha imiyoboro yayo y’ikoranabuhanga mu kwishyura serivisi n’ibicuruzwa, kohereza amafaranga n’ibindi.

-  Indi nkuru wasoma: Valentin Ferron yegukanye etape ya kane ya Tour du Rwanda 2021, Manizabayo aba uwa gatatu (Amafoto)

Umu-agent wa Airtel Money, Uwamahoro Joséline, yavuze ko yafunguje konti muri Cogebanque yizera ko azayungukiramo byinshi
Umukinnyi wahize abandi mu guterera imisozi wahembwe na Cogebanque ni Umubiligi Lennert Teugels ukinira Tarteletto-Isorex
Hari abafungurijwe amakonti abemerera gukorana na Cogebanque
Abaturarwanda babanzaga gusobanurirwa serivisi zitangwa na Cogebanque hanyuma bagafunguza na konti
Aho Tour du Rwanda yanyuze hose, abaturage b'ibyiciro bitandukanye basobanuriwe uko bakoresha ikoranabuhanga mu gusaba serivisi z'imari
Cogebanque nk'umuterankunga mukuru wa Tour du Rwanda yaherekeje iri siganwa kuva ritangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .