00:00:00 IGIHE NETWORK KN KINYARWANDA EN ENGLISH FR FRANCAIS

I Kigali hatangijwe umukino wa Tennis yo mu muhanda (Amafoto)

Yanditswe na Igirubuntu Darcy
Kuya 10 November 2022 saa 10:04
Yasuwe :

Minisitiri wa Siporo mu Rwanda, Munyangaju Aurore Mimosa na Minisitiri w’Ububanyi n’Amahanga wa Barbados, Kerrie Symmonds, batangije ku mugaragaro umukino wa Tennis ikinirwa mu muhanda “Road Tennis’’ mu Mujyi wa Kigali.

Iki gikorwa cyabereye mu masangano y’umuhanda uri imbere ya Kigali Heights, kuri uyu wa Kane, tariki ya 10 Ugushyingo 2022.

"Road Tennis" yatangijwe mu Rwanda nyuma y’urugendo Perezida Kagame yagiriye muri Barbados [aho ukomoka] muri Mata 2022, akagaragara anawukina.

Ku ikubitiro, mu Mujyi wa Kigali hashyizweho ibibuga bine bizajya bikinirwaho “Road Tennis’’ birimo ibiri kuri Roind Point ya Kigali Heights, i Nyamirambo, Kimisagara kuri Maison des Jeunes no ku Kigo cy’Urubyiruko i Kabuga. Biteganyijwe ko no mu bindi bice by’igihugu hazagenda hashyirwa ahantu ho gukinira "Road Tennis’’.

Minisitiri wa Siporo, Munyangaju, yavuze ko Road Tennis icyiza cyayo idasaba ibikorwaremezo byinshi ngo ikinwe.

Yakomeje ati “Twagerageje kureba ahantu hahurira abantu benshi, hahurira abana n’urubyiruko ku buryo ushaka kuwukina abona aho awukinira kandi ube wazamuka vuba mu Rwanda.’’

Yasobanuye ko u Rwanda rushaka kugira “Road Tennis” umwuga byihuse. Ati “Ni umukino dushaka kugira umwuga, birasaba ko abantu bawitabira bakagira ishyirahamwe riwushinzwe ku buryo uzamuka vuba.’’

Road Tennis yakiriwe neza n’abakina uyu mukino, bavuze ko kuba basanzwe bakina Table Tennis, uyu uzaborohera kuwiyumvamo.

Tuyikunde Thamar yagize ati “Kuba batuzaniye uyu mukino ni ibintu bishimishije hano mu Rwanda, natwe dushobora kuwukina kandi uraryoshye cyane.’’

Itangizwa rya “Road Tennis’’ ryabaye umusaruro wa mbere w’ishyirwa mu bikorwa ry’amasezerano u Rwanda na Barbados byasinyanye tariki 9 Ugushyingo 2022 yo gufatanya mu guteza imbere imikino. Akubiyemo imikoranire mu guhanahana impuguke n’abatoza bazobereye mu mikino itandukanye.

Umuyobozi wa Siporo muri Barbados, Neil Murrell, yavuze ko urugendo Perezida Kagame yagiriye mu gihugu cye n’ibiganiro byamuhuje n’abakanyujijeho muri Cricket rwaberetse urukundo rwe ku guteza imbere imikino.

Ati “Byari ibihe byiza kuri twe kuko byatweretse uko akunda Cricket na Road Tennis.’’

Yakomeje avuga ko ubufatanye bw’u Rwanda na Barbados buzanagukira no ku Mugabane wa Afurika n’Ibihugu bya Caraïbes.

“Road Tennis” imaze gushinga imizi muri Barbados, aho watangiriye gukinwa mu 1930.

Uyu mukino ujya gukinwa nka Tennis ikinirwa ku meza “Table Tennis”, aho hakinwa amaseti atatu buri imwe ifite amanota 21, utanze undi gutsinda amaseti abiri muri atatu niwe uba utsinze umukino.

Guverinoma ya Barbados yashyize imbaraga mu guteza imbere “Road Tennis” kubera agaciro kayo muri iki gihugu ariko n’uruhare rwayo mu kubaka no guteza imbere sosiyete.

Mu 2002 ni bwo hashinzwe Ishyirahamwe rya Tennis ikinirwa mu Muhanda ku Isi, World Road Tennis Federation (WRTR) hagamijwe guteza imbere uyu mukino.

WRTR yateguye amarushanwa abiri ariko nyuma y’igihe usa n’uwacecetse, mu 2006 hongerewe imbaraga mu kongera kuwumenyekanisha ku ruhando mpuzamahanga.

Mu Ugushyingo 2016, hateguwe Shampiyona Mpuzamahanga ya “Road Tennis” ku bihugu byari byasuwe mu 2015/2016.

Usibye u Rwanda, hari ibindi bihugu byagiye bigaragaza ko byifuza kwimakaza uyu mukino birimo Brazil, Mexique, Panama na Afurika y’Epfo.

WRTF yifuza ko “Road Tennis” izakinwa ku Isi yose ndetse ikanemerwa mu Mikino Olempiki.

Minisitiri wa Siporo, Munyangaju Aurore Mimosa nawe yakinnye iyi Tennis yo ku muhanda
Urubyiruko rw'u Rwanda rwaganuye kuri uyu mukino mushya
Uyu mukino utangijwe mu Rwanda ku bufatanye na Barbados
Ibibuga by'uyu mukino byashyizwe imbere y'inyubako ya Kigali Heights
Ikibuga cy'iyi Tennis yo ku muhanda kiba cyubatse mu buryo bworoheje

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .