Formula One ni ryo siganwa rya mbere mu modoka nto rihenze cyane ku Isi, kuko yaba amakipe arikina cyangwa ibihugu biryakira bishoramo akayabo kugira ngo rigende neza.

Kugira ngo hatagira ikipe iryamira izindi mu gutegura no gukoresha imodoka zihenze cyane, ubuyobozi bwa Formula One bufatanyije n’Ishyirahamwe ry’Imikino yo gusiganwa mu Modoka ku Isi (FIA), hashyizweho amafaranga ntarengwa ikipe igomba gukoresha mu mwaka.

Kuva mu 2021 ingengo y’imari igomba gukoreshwa n’amakipe yavuye kuri miliyoni 145$, igera kuri miliyoni 215$, aho ikipe yayarenza igomba gufatirwa ibihano.

Christian Horner wahoze ari umukinnyi wo gusiganwa muri Formula One akaba yarayoboye ikipe ya Red Bull ndetse bikaba bivugwa ko ashobora kuyobora na Ferrari, yaganiriye na Autosport avuga ko amakipe akigongwa n’ibibazo by’amafaranga ntarengwa akwiriye gukoresha.

Yagize ati “Amategeko agenda ahinduka umwaka ku wundi. Uko twari tumeze mu myaka yatambutse si ko tumeze ubu. Gusa hari aho bigaragara ko bidahinduka.”

“Amakipe agenerwa gukoresha miliyoni 200$ arengaho gato, ariko ugasanga arakoresha miliyoni 500$ kugeza kuri miliyoni 600$ mu mwaka umwe. Kuko usanga akenshi amafaranga tuyakorera ariko ntituyakoreshe.”

Yavuze ko ingendo z’indege zahenze, ibikorwa ku modoka byahenze, ndetse n’ibindi bitandukanye bituma amafaranga yagenwe arenga.

Ubwo Horner yari umuyobozi muri Red Bull yahawe ibihano kubera kurenga ku mategeko y’ikoreshwa ry’umutungo mu ikipe. Icyo gihe hari mu 2021, ku ngengo y’imari ntarengwa yagenwe renzaho 10%.