00:00:00 IGIHE NETWORK KN KINYARWANDA EN ENGLISH FR FRANCAIS

Rwabusaza yakuyemo kandidatire, Murenzi Abdallah asigara ari umukandida rukumbi mu matora ya Ferwacy

Yanditswe na Mihigo Saddam
Kuya 24 May 2022 saa 12:21
Yasuwe :

Komisiyo y’amatora mu ishyirahamwe ry’umukino w’amagare mu Rwanda (FERWACY), yasohoye urutonde ntakuka rw’abimamariza kuriyobora muri manda nshya, aho Murenzi Abdallah ari umukandida rukumbi ku mwanya wa Perezida.

Mu gitondo cy’uyu wa Kabiri, nibwo Komisiyo y’amatora yasohoye urundi rutonde rw’abazavamo abatorerwa imyanya itandukanye mu matora azaba tariki 29 Gicurasi 2022.

Murenzi Abdallah asanzwe ayobora FERWACY kuva mu Ukuboza 2019, kuri ubu yongeye kwiyamamariza kuyobora iri shyirahamwe muri manda itaha. Ni umukandinda rukumbi nyuma y’uko Thierry Rwabusaza akuyemo kandidatire.

Perezida wa Komisiyo y’amatora muri FERWACY, Nzabamwita Charles yabwiye IGIHE ko Rwabusaza nta wamwirukanye ahubwo ko yakuyemo kandidatire ku giti cye.

Yagize ati “Twasohoye urutonde rushya rw’abiyamamaza mu myanya itandukanye. Thierry (Rwabusaza) yakuyemo kandidatire ku giti cye nta kindi kibazo cyabayemo.”

Ubwo yiyamamarizaga kuyobora FERWACY, ntabwo abanyamuryango bamwe babyakiriye neza kuko batiyumvishaga uko umuntu weguye yongera kugaruka.

Ku rutonde rwa burundu rw’abashaka kujya muri komite nyobozi ya FERWACY, ku mwanya wa Perezida ni Murenzi Abdallah wari uyoboye manda iheruka.

Ku mwanya wa Visi Perezida wa mbere hari Karangwa François mu gihe Visi Perezida wa kabiri hiyamamaje Kayirebwa Liliane.

Munyankindi Benoît na we ari ku mwanya w’Umunyamabanga Mukuru wa FERWACY, akaba ari umukandida rukumbi. Ingabire Assia yiyamamarije kuba umubitsi.

Abajyanama ni Me Bayisabe Irenee, Ntembe Jean Bosco, Karambizi Rabini-Hamin, Kayisabwa Deltha, Mupenzi Christophe na Umulisa Lita Delphine.

Akanama nkemurampaka hiyamamaje Rwanyange Réne Anthere, Nkurunziza Jean Pierre na Karama Geoffrey.

Murenzi Abdallah wayoboraga FERWACY kuva mu mpera za 2019 yongeye kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .