Kwimurwa mu gihugu cya gatatu ni uburyo bwo kohereza impunzi zavanywe mu gihugu zahungiyemo bwa mbere, zijyanwa mu kindi gihugu cyize kuri dosiye yazo, kikemera kuzakira yaba ari imwe cyangwa umuryango wayo wose, hanyuma kikayiha uburenganzira bwo gutura bwa burundu.

Bukemura ibibazo by’ubuhunzi mu buryo bwa burundu ku mpunzi zidafite amahitamo yo kwisanga mu gihugu zahungiyemo cyangwa gusubira mu gihugu kavukire kandi zikeneye guhabwa umutekano mu gihugu zibamo.

HCR ikorana n’ibihugu bitandukanye bigaragaza ubushake bwo kwakira impunzi, bikagaragaza umubare bashaka n’ibyo bemera, hanyuma iryo shami rya loni na ryo rikoherezayo dosiye z’imyirondoro z’impunzi zasabye kwimurwa, byazemera zikoherezwa.

Icyakora abantu barategereza ku buryo nk’uwasabye mu 2019 ashobora kubona igihugu mu 2024.

Ibi byumvikana ko umwaka umuntu yasabyemo atari ihame ko awubonamo igihugu, ari na yo mpamvu abo 3088 barimo n’abari basabiwe mu myaka ishize.

Kugeza ku wa 30 Kamena 2024, mu Rwanda habarurwaga impunzi 134.272. Muri izo izigera ku 82.262 zingana na 61% ni izaturutse muri Repubulika Iharanira Demokarasi ya Congo, mu gihe impunzi 51.134 zingana na 38% zavuye mu Burundi.

HCH ishami ry’u Rwanda igaragaza ko mu 2024 yakiriye ubushake bw’ibihugu bitandukanye byemeye ko bizakira impunzi zo mu Rwanda 7037, bivuze ko iyo myanya izagabanywa abujuje ibisabwa.

Kugeza uyu munsi iryo shami ryohereje amadosiye 2905 y’impunzi zasabye kwimurwa, kugira ngo ibihugu bashaka kujyamo biyasuzume birebe niba byabafata.

Uretse abo 3088 hari abandi 50 babonye ibihugu bya gatatu ariko binyuze mu zindi porogaramu zirari izo za HCR, nk’umuntu wibonera abamufasha, uwihuza n’umuryango we n’ibindi.

HCR kandi igaragaza ko ibihugu byagaragaje ubushake bwo gutwara impunzi byateye n’intambwe biza gushaka amakuru ku bashaka kubijyamo ndetse bibaza abasabiwe kubijyamo ibibazo bitandukanye.

Muri Kamena 2024 Danemark yabajije impunzi 200, Norvège ibaza 200, Leta Zunze Ubumwe za Amerika ibaza 500, Finlande ibaza 199.

Impunzi 37 zabajijwe ni izo muri Emergency Transit Mechanism, ETM, gahunda ya HCR igamije gushakira impunzi zo muri Libya aho zaba by’agateganyo mu gihe ikizishakira uburyo burambye zafashwamo.

Mu 2024 HCR yafashije impunzi 95 zo mu Burundi gutaha, bituma iryo shami ribarura impunzi 30.877 z’Abarundi zatashye kuva mu 2020.

Ubu izindi mpunzi z’Abarundi 200 zagaragaje ubushake bwo gutaha ku bushake, ibizakorwa mu mezi ari imbere.

HCR ikomeje gushakira impunzi zahungiye mu Rwanda ibihugu bya gatatu uko ishoboye.

Nk’ubu mu 2023 izigera ku 7826 zabonewe ibihugu bya gatatu. Uwo mwaka kandi amadosiye y’impunzi 6388 yari yoherejwe mu bihugu byagaragaje ubushake bwo kuzakira.

Muri zo impunzi 7226 zari izo muri RDC, 290 ari zo muri Eritrea, 188 zo muri Sudani, 85 zo mu Burundi ndetse n’izindi 37 zo mu bindi bihugu.

Muri abo boherejwe hanze harimo impunzi 514 zo muri ETM ndetse 123 zabonye ibihugu bya gatatu mu 2023 binyuze mu zindi porogaramu zitari iza HCR.

Zakiriwe n’ibihugu birimo Amerika nk’igihugu cyiharira umubare, Norvège, Canada, France, Pays-Bas, Suède, Danemark, Finlande, Australie na Nouvelle-Zélande.

Ku bijyanye n’ubushobozi bw’amafaranga ku kwita ku mpunzi, HCR igaragaza ko kuyabona ari ingorabahizi, kuko nko mu 2023 yateganyaga ingengo y’imari y’arenga miliyoni 90,5$ (arenga miliyari 119 Frw y’ubu), icyakora ibona miliyoni 37$ (arenga miliyari 48 Frw) bingana na 41%.

Ayo miliyari 48 Frw yatanzwe n’ibihugu birimo Amerika, Umuryango w’Ubumwe bw’u Burayi, Danemark, u Budage, u Buyapani, Canada, u Busuwisi, Norvège n’abandi.

Mu 2024 HCR iteganya ko izakenera ingengo y’imari ya miliyari 91,7$ (arenga miliyari 121 Frw y’ubu) mu bikorwa bitandukanye byo kunoza imibereho y’impunzi ziri mu Rwanda.

Icyakora kugeza muri Kamena 2023, HCR Rwanda yari imaze kubona miliyari 20,1$ (arenga miliyari 26 Frw y’ubu).

Inkambi ya Mahama iherereye mu Karere ka Kirehe ni imwe icumbikiye impunzi nyinshi zo muri RDC n'u Burundi