Volkswagen yamuritse uburyo bwa ‘Move Ride’ bufasha abifuza gutembera mu modoka zayo i Kigali

Yanditswe na Mukaneza M.Ange
Kuya 1 Werurwe 2019 saa 07:41
Yasuwe :
0 0

Uruganda rwa Volkswagen rushyize imbere gufasha Abanyarwanda n’abarutuye kunogerwa n’ingendo zabo, rwamuritse ku mugaragaro uburyo bwa ‘Move Ride” bufasha abakeneye gutega imodoka zarwo mu Mujyi wa Kigali, bakishyura bitewe n’intera bagenze.

Kuri uyu wa Gatanu tariki ya 1 Werurwe 2019 nibwo ‘application’ ya ‘Move Ride’ yatangiye gukoreshwa ku mugaragararo, nyuma y’amezi agera kuri atanu igeragezwa.

Umuyobozi Mukuru w’Ishami rya Volkswagen mu Rwanda, Michaella Rugwizangoga, yavuze ko ‘Move Ride’ ije kunganira uburyo bukoreshwa mu gutwara abantu mu Rwanda.

Ati “Move Ride izajya ikora amasaha 24 mu minsi irindwi, izagira uruhare rukomeye mu kurushaho kunoza umutekano wo mu muhanda ari nako abatugana bahabwa serivisi z’umwihariko. Twifuza ko abakiliya bacu banyurwa na serivisi zacu bazenguruka umujyi wa Kigali mu mutuzo.”

Umuyobozi ushinzwe ikoranabuhanga muri Volkswagen Rwanda, Marvin Manzi, yavuze ko iyi porogramu ishyirwa muri telefoni itangijwe ku mugaragaro nyuma y’igihe bakora ibishoboka byose ngo inozwe, hakemurwa ibibazo birimo kuba igitangira kugeragezwa warifuzaga imodoka ugategereza umwanya munini.

Uretse kuba izorohereza abagenzi mu mujyi wa Kigali, Umuyobozi Ushinzwe iyamamazabikorwa, Nadege Gaju, yavuze ko izatuma hatangwa akazi ku bantu benshi kuko uku ukwezi kuzarangira bafite abashoferi basaga 150 bazajya bakora basimburana.

Volkswagen yari isanzwe ifite imodoka 25 zikoreshwa mu gutwara abagenzi hifashishijwe porogaramu ya ‘Move Ride’, ariko ubu ziyongereye ziba 57.

‘Move Ride’ ikoreshwa ite?

Kugira ngo ubashe gukora ingendo mu modoka zitandukanye za Volkswagen zirimo Polo, Passat na Teramont bigusaba kubanza gushyira muri telefoni yawe yaba ikoresha Android cyangwa iOS, ‘application’ ya ‘Move’.

Usabwa kubanza gufungura konti ukoresheje e-mail cyangwa nimero yawe ya telefoni (Sign up), ubundi gahita winjiramo (Log in).

Iyo birangiye uhabwa umwanya wuzuzamo aho uherereye n’aho wifuza kujya, ubundi bakakwereka ubwoko bw’imodoka zihari n’ikiguzi cy’urugendo bigendana bitewe n’ubwoko bw’imodoka ukeneye n’intera ushaka kugenda, wowe ukihitiramo iyo ushaka.

Urugendo rwishyurwa ku munota cyangwa ibilometero, kandi mu kwishyura hifashishwa amafaranga yoherezwa kuri telefoni igendanwa cyangwa ikarita ya banki. Ku munsi abasaga 120 bakoresha ‘Move Ride’ mu ngendo zabo zitandukanye.

Uretse ‘Move Ride’, Volkswagen isanzwe inafite uburyo bwitwa ‘Move Share’ aho abantu bashobora gusangira imodoka, umwe akayitwara akagenda yagera aho agiye akayiparika undi akaba yaza akayikoresha buri wese akishyura ku giti cye.

Umuyobozi Mukuru w’Ishami rya Volkswagen mu Rwanda, Michaella Rugwizangoga, yavuze ko ‘Move Ride’ ije kunganira uburyo bukoreshwa mu gutwara abantu mu Rwanda
Mugabo Jean Luc ushinzwe ubucuruzi muri CFAO Motors Rwanda Ltd, ikigo cyagiranye imikoranire na Volkswagen ari nacyo gifite mu nshingano ibijyanye no guteranya imodoka
Volkswagen Polo ni yo ihendutse kurusha izindi
Imodoka za Teramont ni zimwe mu zo umugenzi ashobora gutega akoresheje 'Move'
Abashoferi ba Volkswagen hamwe n'imodoka zabo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza