Twitter yamaganye uwivugiye ko yinjiriye konti ya Perezida Trump

Yanditswe na Rosine Ingabire
Kuya 24 Ukwakira 2020 saa 02:40
Yasuwe :
0 0

Urubuga rwa Twitter hamwe n’ibiro bya Perezida wa Leta Zunze Ubumwe za Amerika byamaganye amakuru aherutse gutangazwa y’umuntu wivugiye ko yinjiye muri konti ya Perezida Donald Trump.

Inzobere akaba n’umushakashatsi mu by’umutekano w’ikoranabuhanga, Victor Gevers aherutse gutangaza ko yagerageje imibare y’ibanga ikoreshwa na Perezida Trump kuri Twitter, akaza kuyivumbura akayinjiramo.

Victor Gevers yavuze ko yasanze Trump akoresha umubare w’ibanga ‘maga2020!’, ujyanye n’intero Trump n’abamushyigikiye bari gukoresha biyamamaza mu matora azaba mu byumweru bibiri biri imbere.

Uwo mugabo avuga ko yagerageje imibare y’ibanga ine yose yanga, uwa gatanu akaba ariwo ukunda.

Ubuvugizi bwa Twitter bwatangarije ikinyamakuru The Verge ko nta muntu bigeze babona wagerageje kwinjira muri konti ya Trump, bityo ko ibyo Gevers yavuze nta shingiro.

Yagize ati “Nta kimenyetso na kimwe gishimangira ibyo avuga. Twafashe ingamba zikomeye ku bantu bakomeye bo muri Amerika bafite aho bahuriye n’amatora haba muri Guverinoma n’abandi.”

Ishami rishinzwe itangazamakuru muri Perezidansi ya Amerika naryo ryatangaje ko ayo makuru ku kwinjirira konti ya Trump ari ibinyoma.

Ikinyamakuru Vrij Nederland cyatangaje ko atari ubwa mbere Gevers yigamba kwinjira muri konti ya Perezida Trump, kuko ngo no mu 2016 we na bagenzi be babiri bayinjiyemo.

Perezida Trump azwiho gukoresha cyane urubuga rwa Twitter

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .